1 Bakolinti 7

Mibuzyo yaamba makani aalukwatano

1Lino njanda kwiingula mibuzyo njimwakandilembela. Ncintu cibotu kumwaalumi kuti atakwati. 2Pele kulesya bumambe, mwaalumi umwi aumwi uleelede kuba aamukaintu wakwe mwini, awalo mukaintu umwi aumwi uleelede kuba aamulumaakwe mwini. 3Mulumi uleelede kucitila mukaintu wakwe zyeelede, awalo mukaintu uleelede kucitila mulumaakwe zyeelede mbubonya. 4Mukaintu takonzyi kucita mbuli mbwayanda amubili wakwe, pele mulumi. Mbubonya oobo awalo mwaalumi takonzyi kucita mbuli mbwayanda amubili wakwe, pele mukaintu. 5Mutakacilani ccita mwazuminana kucita oobo kwaciindi, kuti mulipe kukukomba. Kwamana muleelede kuswaangana alimwi, kutegwa Saatani atamusunki nkaambo cilamukatazya kulijata.

6Ncindaamba nkumulailila buyo, kutali kuti mulawo pe. 7Nicabota bantu boonse nibali mbuli ndime. Pele umwi aumwi ulijisi cipego cakwe mwini cizwa kuli Leza, umwi cili boobu, aumwi cili bumbi.

8Kuli baabo batakwete abamukabafu, ndabaambila kuti ncibotu kulimbabo kuti bakkale buyo oobo, mbuli ndime. 9Pele kuti naa tabakonzyi kulijata, baleelede kukwata. Nkaambo ncibotu kukwata kwiinda kunyomenena.

10Kuli baabo bakwetene kale mulawo wangu walo uuli uzwa ku Mwami ngooyu, mukaintu teelede kwaandaana amulumaakwe. 11Pele kuti naa wacita oobo, akkale buyo, naa kakutali boobo ayanzane amulumaakwe. Mbubonya buyo awalo mulumi teelede kulekana amukaintu wakwe pe.

12Kuli aabo bamwi inga ndaamba kuti, pele ndinyina mulawo uuzwa ku Mwami, naa kuli umwi musyomi uukwete mukaintu uutasyomi, kuti mukaintu ooyo kayanda kukkala anguwe, teelede kumuleka pe. 13Alimwi kuti naa kakuli mukaintu uukwetwe kumulumi uutasyomi, kuti mwaalumi ooyo kayanda kukkala anguwe, teelede kuzwa pe. 14Nkaambo mulumi uutasyomi ulalelekwa akaambo kamukaintu wakwe uusyoma, awalo mukaintu uutasyomi ulalelekwa akaambo kamulumi wakwe uusyoma. Nikwatali boobo bana banu nibatali kutambulika kuli Leza, pele mbuli mbocibede lino, balatambulika. 15Pele kuti naa ooyo uutasyomi wayanda kulekana, mbubo balekane, nkaambo mumulandu uuli boobo musyomi mwaalumi naa mukaintu taangidwe. Nkaambo Leza wakatwiita kuti tukkale muluumuno. 16Nkaambo yebo, omukaintu, ino uzi buti kuti ambweni uyoofutula mulumaako? Ayebo, mwaalumi, ino uzi buti kuti ambweni inga uyoofutula mukaintu wako?

Zyakwiitwa a Leza

17Lino umwi aumwi akkale abuumi mbwaakakkede naakaitwa a Leza. Ooyu ngomulawo wangu mumbungano zyoonse. 18Kuti naa umwi Leza wakamwiita kapalwidwe, atapengi abupalule bwakwe. Naa kuli watakanapalulwa atapengi pe. 19Nkaambo bupalule tabukwe makani, akutapalulwa takukwe makani, pele cipati nkubamba milawo ya Leza. 20Umwi aumwi akkale mbuli mbwaakabede ciindi ncaakaitwa. 21Sena wakali muzike nookaitwa? Tacikwe makani. Pele kuti naa kokonzya kujana lwaangunuko, lutambule. 22Nkaambo ooyo Mwami ngwaakaita kali muzike ngomwaangunune kulinguwe. Mbubonya oobo awalo wakali mwaangunune ciindi ncaakaitwa ngomuzike wa Kilisito. 23Nywebo mwakaulwa amuulo uudula, aboobo mutabi bazike babantu. 24Nobakwesu, umwi aumwi uleelede kukkala muli Leza mbubonya mbuli mbwaakabede ciindi naakaitwa.

Mibuzyo imwi yankwato

25Lino zyamakani aabaabo batakwetwe, nsijisi mulawo uuzwa ku Mwami, pele ndamupa miyeeyo yangu mbuli yooyo Mwami ngwaakafwida luse kuti mbe musyomesi. 26Ndiyeeya kuti akaambo kamapenzi aacitika, muntu akkale mbubonya mbuli mbwabede. 27Sena ulikwete? Utakanzi kuleka mukaintu wako. Sena tokwete? Utakanzi kukwata. 28Pele kuti naa wakwata, toobisya pe, awalo musimbi kuti naa wakwatwa taabisya pe. Njanda kumuvuna buyo kuzwa kumapenzi ngobajana aabo bakwatana.

29Ncendaamba, nobakwesu, ncakuti ciindi caceya. Kuzwa sunu aabo bakwete babe mbuli batakwete, 30abaabo balila babe mbuli baabo batalili, abaabo basekelela babe mbuli batasekeleli, abaabo basimakwebo babe mbuli batasambali, 31babelesya zintu zyaansi batabikki myoyo yabo kuli nzizyo. Nkaambo ziyanza zyaansi aano zilamana.

32Njanda kuti mutalibiliki. Muntu uutakwete ulasungwaala kumakani aa Mwami, mbweelede kubotezya Mwami. 33Pele muntu uukwete usungwaalila makani aaansi, kuti abotezye mukaintu wakwe, 34aboobo ujata maanka-maanka. Awalo mukaintu uutakwetwe naa musimbi uutazi musankwa ulasungwaala kumakani aa Mwami, kuti alipe mubili amuuya antoomwe ku Mwami. Pele mukaintu uukwetwe usungwaalila makani aaansi, kuti abotezye mulumaakwe.

35Aaya ndaaamba kuti ndimugwasye, nsiyandi kumubikkila mukuli pe. Pele njanda kuti mucite zyoonse bweelede, alimwi kuti mulipe cakumaninina mukubelekela Mwami.

36Kuti naa umwi wayeeya kuti ulabisya alesya mwanaakwe kukwatwa kali wakula, acite mbwayeeya. Tabisyi naa wakwasya mwanaakwe. 37Pele kuti umwi mulwaangunuko lwakwe wayeeya kuti mwaanakwe musimbi atakwatwi, wacita kabotu. 38Nkokuti ooyo uukwasya mwanaakwe wacita kabotu, pele ooyo uutakwasyi waindilizya kucita kabotu.

39Mukaintu uukwetwe ulaangidwe amulawo walukwato mulumi nacipona. Kuti naa wafwa, ulaangunuka akukwatwa kufumbwa ngwayanda, kufumbwa buyo kuti lukwato oolo kaluli mu Mwami. 40Pele uyookondwa kapati kuti naa wakkala buyo takwatwi. Eeyi mizeezo yangu, alimwi ndiyeeya kuti ambebo ndijisi Muuya wa Leza.

Currently Selected:

1 Bakolinti 7: Tonga96

Highlight

Copy