1 Bakolinti 6

Zyamilandu akati ka Bakilisito

1Kuti naa umwi wanu kajisi kaambo amweenzinyina, mbuti mbwanga watola mulandu kubabetesi bakunze kuleka kubasyominyina? 2Sena tamuzi kuti basyomi bayoobeteka bantu baansi? Lino kuti bantu bakabetekwe andinywe, sena tamukonzyi kubeteka tukani tuniini akati kanu? 3Sena tamuzi kuti tuyoobeteka bangelo? Ino tulakacilwa buti zyaansi aano? 4Kuti kamujisi milandu azintu zili boobo, nkaambo nzi ncomwiitola kubabetesi batazi zyambungano? 5Ndaamba boobo kuti muusye nsoni. Sena caamba kuti taakwe muntu musongo naba omwe akati kanu uukonzya kubeteka makani akati kabasyominyina? 6Mbuti musyomi mbwabetesya munyina akutola mulandu kubabetesi batasyomi?

7Nciconya cakuti muli aamilandu akati kanu nobeni catondezya kale kuti mwakacilwa. Sena tacili cibotu kubisisilwa buyo? Nkaambo nzi ncomutabelekeli buyo kuti batole zintu zyanu? 8Pele lwanu nobeni mulabisya akutola zintu zyabamwi. Eezi mucita kubasyominyoko.

9Sena tamuzi kuti bataluleme tabakooyootambula bwami bwa Leza? Mutalyeeni, kutali baabo buyo nibaba basibwaamu, bakomba mizimo, basimamambe, baalumi bacita zitaambiki abaaluminyina, 10babbi, basindya, bakolwi, basimatusi, nibaba bafumpi tabakanjili mubwami bwa Leza pe. 11Oobo mbubakabede bamwi akati kanu. Pele nywebo mwakasanzigwa, mwakasalazigwa, alimwi mwakalulamikwa muzina lya Mwami Jesu Kilisito amu Muuya wa Leza wesu.

Mibili yanu mwiibelesye kuti iletele Leza bulemu

12“Zintu zyoonse zilizumizidwe kulindime,” pele takuli kuti zintu zyoonse zilagwasya. “Zintu zyoonse zilizumizidwe kulindime,” pele nsikabi muzike wacintu nociba comwe pe. 13“Cilyo ncada, alyalo da ndyacilyo,” nikuba boobo Leza uyoonyonyoona zyoonse zyobilo. Mubili tuuli wabwaamu, ngwa Mwami, awalo Mwami ngomwini mubili ooyo. 14Eelyo Leza wakabusya Mwami uyootubusya aswebo munguzu zyakwe.

15Sena tamuzi kuti mibili yanu nzizo zya Kilisito? Sena nditole zizo zya Kilisito, ndizicite zizo zyamwaamu? Peepe! 16Sena tamuzi kuti ooyo uulipa kumwaamu waba mubili omwe anguwe? Nkaambo mbubonya mbuli mbokulembedwe kuti, “Aabo bobilo balaba mubili omwe.” 17Pele ooyo uulipa ku Mwami ulaba omwe mumuuya anguwe.

18Amuleke bwaamu. Cibi cimwi acimwi ncacita muntu tacibisyi mubili, pele sibwaamu ulabisizya mubili wakwe mwini. 19Sena tamuzi kuti mibili yanu niŋanda ya Muuya Uusalala uuli mulindinywe, ngomutambwide kuli Leza? Ncencico eeco buumi mbomujisi tabuli bwanu nobeni pe. 20Mwakaulwa amuulo uudula. Aboobo amulemye Leza mumibili yanu.

Currently Selected:

1 Bakolinti 6: Tonga96

Highlight

Copy