1 Bakolinti 5

Makani aabwaamu mumbungano

1Lino makani alimvwidwe kuti kuli bwaamu akati kanu.

Bwaamu oobo mbuboobo butacitwi abakunze pe. Ndakamvwa kuti muntu umwi unjila muŋanda yawisi. 2Pele mucilisumpula! Tee mweelede kuba aansoni akumugwisya akati kanu ooyo uucita zyamafunze zili boobo! 3Kwaamba zyandime nikuba kuti nsili aandinywe, pele moyo wangu uli aandinywe. Eelyo muzina lya Mwami Jesu ndamubeteka wakacita boobo. 4Mwaakubungana mbuli kuti mpendi andinywe alimwi munguzu zya Mwami Jesu, 5mukaabe muntu ooyo kuli Saatani kuti mubili wakwe unyonyoonwe, pele muuya wakwe ukafutulwe mubuzuba bwa Mwami Jesu.

6Kulisumpula kwanu nkwabuyo. Sena tamuzi kuti, “Tumena tuniini tulafufumusya mulwi woonse?” 7Amugwisye mimena yakaindi yazibi kuti mube mulwi mupya, ndizi kale kuti mbomubede. Nkaambo Kilisito, uuli mwanaa mbelele wa Pobwe lya Kwiindilila wakapaizigwa kale. 8Aboobo atusekelele, kutali aamimena yakaindi yabubi akubija moyo, pele acinkwa citakwe mimena, cabubotu akusalala moyo.

9Ndakamulembela mulugwalo lwangu kuti mutayanzani abasibwaamu. 10Takuli kwaamba kuti mutamvwani abantu boonse munyika bali mbaasibwaamu, basindya abafumpi nibaba basikukomba mizimo. Nikwali boobo nimwalizwide kale munyika. 11Pele ndakamulembela kuti naa kuli muntu naba omwe waamba kuti musyomi, pele kali sibwaamu, sindya, sikukomba mizimo, simatusi, cakolwa, naa mubbi, muntu uuli boobo tamweelede nikuba kulya anguwe pe. 12Kubeteka bakunze mwati mulimo wangu? Sena nywebo tamweelede kubeteka basyominyoko babisya? 13Leza nguubeteka bakunze aabo. “Amumugwisye ooyo muntu mubi akati kanu.”

Currently Selected:

1 Bakolinti 5: Tonga96

Highlight

Copy