1 Bakolinti 4

Batumwa ba Kilisito

1Mboobu muntu mbweelede kutuyeeya, kuti tuli babelesi ba Kilisito, alimwi tuli babanzi bamakani aa Leza aasisidwe. 2Lino ciyandika kapati kubabanzi bali boobu ncakuti kabasyomeka. 3Kwaamba lwangu ndewini nnyina makani nikuba kuti ndabetekwa andinywe niiba nkuta imwi yabantu. Ncobeni nsilibeteki ndemwini pe. 4Nnyina kandikopa mumoyo, pele eeci tacaambi kuti ndilondokede pe. Mwami nguundizi. 5Aboobo mutabeteki muntu nabani, Mwami katana boola. Uuli nguyooyubununa maseseke aali mumudima, nkabela uyooyubununa makanze aamumyoyo yabantu. Eelyo muntu umwi aumwi uyootembaulwa a Leza mbuli mbweelede.

6Lino makani oonse aaya ngindaamba nobakwesu, ajatilizya ndime a Apolosi. Eezi zimwiisye caamba majwi aaya aati, “Amubambe zyaamba Malembe.” Nkaako mutalisumpwidi umwi akuubausya umwi. 7Nguni wakamucita kuti mwiindane abamwi? Ani ncinzi ncomujisi ncimwatakapegwa? Naa mwakapegwa buya, nkaambo nzi ncomulisumpula anga tiimwakapegwa buyo?

8Eena mulijisi kale nzyomuyanda? Mwavuba kale nobeenzuma! Mwaba kale bami katutako tobamwi! Ino nikwali kunga mwaba bami, nitweendelezya andinywe! 9Nkaambo ndabona kuti Leza wakatubikka munsi mwini-mwini swebo tobatumwa, mbuli bantu bapegwa mulandu walufu. Twaba ceebezyo kuzilenge zyoonse, kutali kubantu buyo pele akubangelo. 10Swebo tuli bafuba-fuba akaambo ka Kilisito, pele nywebo muli basongo muli Kilisito. Swebo tuli batete, pele nywebo muli basinguzu. Nywebo mulalemekwa, swebo tulasampaulwa. 11Ciindi cino tulafwa nzala, anyota, tuli bacete. Tuladinkaulwa akutuntulika. 12Tuloonda milimo amaanza eesu tobeni. Ciindi notusinganyizigwa tulalomba kuti Leza aleleke. Ciindi notupenzegwa tuumuna buyo, 13ciindi ncotutamikizigwa tulasoleka kuyanzana. Kusikila lino tulasampaulwa mbuli mafwisi-fwisi aanyika alimwi bantu batuyeeya kuti tuli tombe. 14Nsilembeli kuti muusye nsoni pe, pele mmulaya buyo mbuli bana bangu bayandika. 15Nkaambo cilakonzeka kuti mube abamayi banji-banji mubuumi bwanu bwa Bukilisito, pele kutali bamauso banji pe. Kayi ndakaba uso muli Kilisito Jesu kwiindila mukumukambaukila Makani Mabotu. 16Ndamukomba amwiiye ndime. 17Nkaako ndamutumina Timoti, mwanaangu uusyomeka mu Mwami, kuti amwiibalusye nzila zyangu muli Kilisito nzendiiisya koonse-koonse mumbungano zyoonse.

18Bamwi balalisumpula, mbuli kuti nsikoozoosika limbi ooko. 19Pele ndilaboola kulindinywe cakufwambaana kuti Mwami kayanda, eelyo ndendilyo nezooziba nzyobakonzya kucita aabo balitukumuna, kutali buyo nzyobaamba. 20Mubwami bwa Leza cipati takuli kwaamba buyo pe, pele micito. 21Ncinzi ncomuyanda? Sena nzooboole kulindinywe amusako, naa amoyo walubomba mutete?

Currently Selected:

1 Bakolinti 4: Tonga96

Highlight

Copy