Mateo 7

Mambo a kuzhachisha bakwenu

(Luka 6:37-38,41-42)

1“Kechi muzhachishe bakwenu ne, kuchiina amba, ne anweba mwakazhatwa, 2#Mako 4:24Mambo monka mo muzhachisha bakwenu, ne anweba bakemuzhachisha monka, ne kyo mupiminamo bakwenu, ne anweba mukapiminwa monka. 3Mambo ka kyo utajila ka kibalabala kaji mu jiso ja mukwenu, bino kechi ulanguluka mwamba uji mu jiso jobe obewa mwine ne? 4Nangwa wakonsha kumwambila byepi mulongo wobe amba, ‘Lekai ne mufumye ka kibalabala kaji mu jiso jenu,’ bino obewa mwine kasa uji na mwamba mu jiso jobe? 5Obewa kamfutumfutu, patanshi fumya mwamba uji mu jiso jobe obewa mwine; bino umone bulongo pa kufumya ka kibalabala kaji mu jiso ja mulongo wobe.

6“Kechi mupane kyazhila ku bakabwa ne, nangwa kutaya bamangalite benu ku bankumba ne, kuchiina amba bakebanyantaula ne kwimwalukila ne kwimutabaula.”

Mambo a kulomba, kukeba, ne kukonkonsha

(Luka 11:9-13)

7“Lombai, kabiji mukekitambula, kebai, kabiji mukekimona, konkonshai, kabiji bakemushinkwilako. 8Mambo yense ulomba utambula; ukeba naye wikimona, ukonkonsha naye, bakamushinkwilako. 9Ng'anyi mukwenu uba, umvwe mwananji wamulomba shinkwa, wamupa jibwe? 10Nangwa umvwe wamulomba jisabi, wamupa mulolo? 11Byonkabyo umvwe anweba babi, mwayuka kupana byawama ku baana benu, nanchi aye Shenu wa mwiulu kechi akemukile mu kupana byawama kwi abo bamulomba nenyi?”

12 # Lu 6:31 “Byonkabyo, bintu byonse byo musaka anweba amba, bantu bemubile, ne anweba kasa mwibobila byonkabyo, mambo muno mo mwayila mabuku a mizhilo ne a bangauzhi.”

Kibelo kyakepa

(Luka 13:24)

13“Twelai pa kibelo kyakepa; mambo kibelo kyabaya ne jishinda jabaya japeela kwendamo bitwala ku lonaiko, ne batwelamo bo bavula. 14Pakuba kibelo kyakepa ne jishinda jakatazha biya ku bumi, kabiji bebimona bo bacheche.”

Kichi ne bipangwa byakyo

(Luka 6:43-44)

15“Jimukai ku bangauzhi ba bubela, beya ko muji mu biseba bya mikooko, kabiji munda mwabo bo bamisuka bakaji. 16Mukebayukila ku bipangwa byabo. Bantu bapa mang'anzang'anza ku miba nyi, nangwa makuyu ku tupwasasa nyi? 17Byonkabyo kichi kyonse kyawama kipanga bipangwa byawama; kabiji kyabipa kipanga bipangwa byabipa. 18Kichi kyawama kechi kyayuka kupanga bipangwa byabipa ne, nangwa kichi kyabipa kupanga bipangwa byawama ne. 19#Mat 3:10; Lu 3:9Kichi kyonse kibula kupanga bipangwa byawama bekitema, ne kwi kyela mu mujilo. 20#Mat 12:33Byonkabyo mukebayukila ku bipangwa byabo.”

Kechi nemuyukilepo ne

(Luka 13:25-27)

21“Kechi bonse bang'ambila amba, Nkambo! Nkambo! Bakatwela mu bufumu bwa mwiulu ne; poso awa uba kyaswa muchima wa Taata wa mwiulu. 22Mu joja juba bavula bakang'ambila amba, Nkambo! Nkambo! Kechi twa awilenga na mupashi mu jizhina jenu nenyi? Ne mu jizhina jenu kechi twapangijilengamo bademona nenyi? Kabiji kechi twaubijilengamo mingilo ya bulume yavula mu jizhina jenu nenyi? 23#Sala 6:8Ponkapo nkebambila namba, kechi nemuyukilepo ne, mfumai anweba banguba bibi!”

Bitendekesho bibiji

(Luka 6:47-49)

24“Byonkabyo aye umvwa bino byambo byami, ne kwibyuba, bakamupashang'anya nobe muntu wa maana, watungile nzubo yanji pa jibwe. 25Ne mvula wanokele, ne mikwe yapomokele konka, ne kipuupu kikatampe kyapupilenga ponka pa nzubo. Kabiji kechi yakundukile ne, mambo beitungile pa jibwe.”

26“Kabiji aye umvwa bino byambo byami, ne kwibyuba ne, bakamupashang'anya nobe muntu wabula maana, watungile nzubo yanji pa musenga. 27Ne mvula wanokele, ne mikwe yapomokele konka, ne kipuupu kikatampe kyapupilenga ponka pa nzubo. Kabiji yakundukile, ne kukunduka kwayo kwaji kungi kwakatazha!”

28 # Mako 1:22; Lu 4:32 Yesu byo apwishishe kwamba bino, mabumba akuminye bingi kufunjisha kwanji. 29Mambo wafunjishenga na luusa, kechi pamo nobe banembeshi ne.

Currently Selected:

Mateo 7: KNTP

Highlight

Copy