Mateo 12

Mambo a juba ja Sabado

(Mako 2:23-28; Luka 6:1-5)

1 # Mpitu 23:25 Mu oa moba Yesu wapichile mu majimi mu juba ja Sabado. Kabiji baana banji babwanga bajinga na nzala ne abo batatwile kuchimuna mitwe ya kajo ne kuja. 2Pakuba Bafaliseo pa kwikimona, ba mwambijile amba, “Talai, baana benu babwanga babena kuuba kyazhila mu juba ja Sabado.”

3 # 1 Sam 21:1-6 Kabiji aye wibambijile amba, “Kechi mwatangilepo byaubile Davida, byo aumvwine nzala, ne abo boajinga naabo nenyi? 4#Levi 24:9Byo atwelele mu nzubo ya Lesa ne kuja bashinkwa ba ku meso a Lesa, bazhila kujako nangwa aye, nangwa bo ajinga naabo, poso bonka bang'anga? 5#Bala 28:9,10Nangwa kechi mwatangilepo nenyi, mu buku wa mizhilo amba, bang'anga baji mu nzubo ya Lesa bazhilulula ja Sabado, kabiji babinga? 6Nanchi nemwambila namba, pano ponka po aji umo wakila nzubo ya Lesa. 7#Mat 9:13; Hos 6:6Kabiji umvwe mwajikuyuka mwayila kino amba, nsaka lusa kechi kitapisho ne, umvwe kechi mwaji kwibazhachisha bantu babula mambo ne. 8Ke pakuba Mwana Muntu ye Nkambo wa juba ja Sabado.”

Kubukwa kwa muntu wa kuboko kwapapa

(Mako 3:1-6; Luka 6:6-11)

9Kabiji wafumineko, ne kutwela watwelele mu shinagoga yabo, 10kabiji mwajinga muntu wa kuboko kwapapa. Ne abo bamwipwizhe amba, “Kyawama kubuka muntu mu juba ja Sabado nyi?” Amba bamone mwa kumushiina.

11 # Lu 14:5 Kumvwa aye wibakumbwile amba, “Lelo kuji ng'anyi mukwenu ukekala na mukooko umo, umvwe waponena mu kiimbo mu juba ja Sabado, ukabula kumukwata ne kumutuntulamo? 12Muntu kechi wakila mukooko mu buneme nyi? Nanchi kyo kyawama kuuba byawama muja Sabado.” 13Ponkapo wamwambijile awa muntu amba, “Tanyikai kuboko kwenu.”

Ne aye wikutanyikile; ne kuboko kwakosele ke kutuntulu, pamo na kukwabo.

Kalume wasalululwa wa Lesa

14Kabiji Bafaliseo, pa kulupukamo, bamwikajiile kije amba, bamone mwa kumonawina. 15Kabiji Yesu, byo ekiyukile, wafumineko, ne bavula bamulondejilenga; ne aye wibabukile bonse, 16ne kwibakambizha amba, kechi babuule bantu amba ye Mwana Lesa ne. 17Kufikizha kya ambile ngauzhi Isaya, amba,

18 # Isa 42:1-4 “Talai, wamwingilo wami ye nasalulula,

mutemwe wami, moamwena lusekelo muchima wami.

Nkabika Mupashi wami pe aye,

ne aye ukebabuula Bangentila bunchiba mambo bwaoloka.

19Kechi ukapachikanga ne, nangwa kubijikisha ne,

kabiji jiwi janji kechi bakejumvwa mu mikwakwa ne.

20Jitete jafyotoka kechi ukejichimuna ne,

nangwa muzhinge ufutumuka kechi ukamuzhima ne.

Poso akatume bunchiba mambo bwanji bwaoloka. Mu

kushinda byonse,

21ne Bangentila bakaketekela mu jizhina janji.”

Yesu ne Belezebuba

(Mako 3:20-30; Luka 11:14-23)

22Ponkapo baleetele umo kwi aye, muntu wanonkelwe ku mudemona, wajinga mpofu ne kamaama. Ne aye wamubukile kyakuuba kamaama ka ambe ne kwamba, ne kumona kamone. 23Kepo mabumba onse akuminye bingi, ne kwipuzha amba, “Lelo uno kechi ye mwana Davida nenyi?”

24 # Mat 9:34; 10:25 Pakuba Bafaliseo, pa kwikyumvwa, ba ambile amba, “Uno kechi wibapangamotu bademona ne, poso na bulume bwa Belezebuba, mfumu wa bademona.”

25Kabiji aye, byo ayukile michima yabo mo yayila, wibambijile amba, “Bonse bufumu bwialukila bwine bonaika; kabiji nangwa muzhi nangwa nzubo bialukila bine kechi bikekala ne. 26Kabiji umvwe Satana apangemo Satana, wialukila mwine; pano bufumu bwanji bukekala byepi? 27Ne amiwa umvwe mpangamo bademona na bulume bwa Belezebuba, nanchi baana benu bebapangamo na bulume bwa kwa ng'anyi? Onkao mambo kyo kyo basakwikajila ke ba mitonyi benu. 28Amiwa byo mpangamo bademona na Mupashi wa Lesa, nanchi pano bufumu bwa Lesa bwaiya pe anweba.

29“Nangwa muntu akakonshe byepi kutwela mu nzubo ya kilobo ne kupukula bintu byanji, poso patanshi wamukasa kilobo, bino akonshe kupukula bya mu nzubo yanji.”

30 # Mako 9:40 “Awa wabula wa kwami, ye mulwanyi wami, kabiji awa wabula kubungizha pamo ne amiwa, ye upalang'anya. 31Byonkabyo nemwambila namba, mambo onse ne mwenga yense bikebalekelwa bantu; pakuba awa umunena mwenga Mupashi kechi akamulekelwa ne. 32#Lu 12:10Kabiji awa umunena bibi Mwana Muntu, ukalekelwao, pakuba awa umunena bibi Mupashi Wazhila, kechi ukalekelwao ne, nangwa muyino myaka, nangwa mu myaka ikeya.

Kichi ne bipangwa byakyo

33 # Mat 7:20; Lu 6:44 “Wamisha kichi, ne bipangwa byakyo bikawama; nangwa tamisha kichi, ne bipangwa byakyo bikatama; mambo kichi kiyukanyikwa na bipangwa byakyo. 34#Mat 3:7; 23:33; Lu 3:7; Mat 15:18; Lu 6:45Anweba kisaka kya milolo, mukonsha byepi kwamba byawama byo muji babi! Pakuba monka mo byayujila mu muchima ne kanwa kambila monka. 35Muntu wawama mu bunonshi bwanji bwawama ulupula byawama; kabiji muntu mubi mu bunonshi bwanji bwatama, ulupula byatama.”

36“Kabiji nemwambila namba, byambo byonse byatu byo ba amba bantu, bakebitotolola mu juba ja kije. 37Mambo baka kubingisha ku byambo byobe, kabiji ku byonka byambo byobe baka kufwisha nao.”

Byo basakile kiyukilo

(Mako 8:11-12; Luka 11:29-32)

38 # Mat 16:1; Mako 8:11; Lu 11:16 Ponkapo bamo banembeshi ne Bafaliseo ba mwambijile amba, “Mufunjishi, tusaka kumona kiyukilo kwi anweba.”

39 # Mat 16:4; Mako 8:12 Kumvwa Yesu amba, “Kisemi kibi ne kya bukende kikeba kiyukilo. Bino kechi kikapewa kiyukilo ne, poso kyonkakya kiyukilo kya Yona, ngauzhi. 40#Yona 1:17Mambo byonka byajinga Yona moba asatu, mute ne bufuku, munda mwa jisabi jikatampe; byo akooba ne Mwana Muntu ukekala moba asatu, mute ne bufuku, munda mwa mushiji. 41#Yona 3:5Banabalume bena Ninevwa bakemana mukije na kino kisemi, ne kwikizhachisha, mambo abo balapijile pa kusapwila kwa Yona, kabiji talai, wamukila Yona uji ponka pano. 42#1 Mfu 10:1-10; 2 Moba 9:1-12Kabiji awa mfumu wamukazhi wa ku kabeta ka ku bulenge ukemana mukije na ba mukino kisemi, ne kwikizhachisha, mambo aye wafumine kwapela ntanda kwiya na kumvwa maana akwa Solomone kabiji talai, aye wamukila Solomone uji ponka pano!

Mupashi wabiipa byo abwela

(Luka 11:24-26)

43“Mupashi wabiipa, byo afuma mu muntu, upitang'ana kwabula mema na kusaka pa kukokolokela, byo abula kwipataana, 44wa amba amba, nanchi nsakubwela monka mu nzubo yami yo nafuminemo kabiji byo aiya, watana kafwamo, mwalambatu myaa, bapyangamo ne kunengezhamo. 45Ponkapo uya nakuletelapo bapashi bakwabo batanu na babiji bamukila mu kubipa, kabiji batwela ne kwikala monka. Ne bwikalo bwapelaako bwa yewa muntu bwakila butanshi mu kubipa. Byo byo kikekala ne kino kisemi kibi.”

Yesu ne balongo banji

(Mako 3:31-35; Luka 8:19-21)

46Kabiji byo a kyambilenga na mabumba, ponkapo inanji ne balongo banji baimene pangye na kumukeba amba, bambe nanji. 47Kabiji umo wamwambijile amba, “Umvwai! Bainenu ne balongo benu baimana pangye amba, besambe nenu.”

48Kumvwa aye wamukumbwile amba, “Lelo bamama bo bang'anyi? Ne balongo bami bo bang'anyi?” 49Kabiji pa kutongola ku baana banji babwanga, wibambijile amba, “Talai! Bamama ne balongo bami! 50Mambo aye uba kyaswa muchima wa Taata wa mwiulu, awa ye mulongo wami, ye nyenga yami, kabiji ye mama.”

Currently Selected:

Mateo 12: KNTP

Highlight

Copy