Mateo 11

1Kabiji Yesu byo apwishishe kwibakambizha baana banji babwanga jikumi na babiji, wafumineko wayilenga na kufunjisha ne kusapwila muyoya mizhi.

Baluwe bafumine kwi Yoano

(Luka 7:18-35)

2Aye Yoano pakumvwa mu kaleya mo ajinga mingilo ya Kilishitu, watumineko baana banji babwanga. 3Bamwipwizhe Yesu amba, “Yenu i ye wasakile kwiya nyi? Inyi tukitengelenga ungi?”

4Kumvwa Yesu wibakumbwile amba, “Yainga, kamubulai Yoano byo mwaumvwa ne byo mwamona; 5#Isa 35:5,6; Isa 61:1bampofu babena kumona, ne balemana ke bende; bambumba babukwa, ne bakishinka matwi ke bomvwe; bafu basangulwa, ne balanda basapwilwa Mambo Awama. 6Kabiji watokwa awa wabula kumona kya kwituntulako mwi amiwa!”

7Bano byo bafumineko, Yesu watatwile kwiambila mabumba na mambo a Yoano amba, “Nanchi mwayile mungye na kumona ka? Jitete jo babena kusunkenya kulubesha nyi? 8Lelo nanchi mwayile na kumona ka? Muntu wavwala bivwalo byawamisha nyi? Talai! Bavwala bivwalo byawamisha bekala mu bipango bya bamfumu. 9Amwai, nanchi mwayile na kumona ka? Na kumona ngauzhi nyi? Ee, kine nemubula namba, aye wakila ngauzhi. 10#Mala 3:1Uno Yoano i ye ye kyanembelwa amba, ‘Tala! Natangizha muluwe wami palutwe yobe, ye ukanengezhezha jimo jishinda palutwe yobe.’ 11Kine nemwambila namba, mu basemwa ku banabakazhi kafwako wakila Yoano Mubatishi ne. Nangwa byonkabyo awa mucheche mu bufumu bwa mwiulu ye wamukila. 12#Lu 16:16Kabiji kufuma ku moba a Yoano Mubatishi ne kufika ku jino juba, bufumu bwa mwiulu bebubila mukoyo, ne bantu bamukoyo bebutambula na lupata. 13Ke pakuba buku wa mizhilo ne bangauzhi ba Lesa bonse baawilenga na Mupashi kufika ne kwi Yoano; 14#Mala 4:5; Mat 17:10-13; Mako 9:11-13kabiji kana anweba muji na michima ya kwikitambula, uno ye Elaija, walayilwe kwiya. 15Awa uji na matwi a kumvwa, omvwe!”

16Kabiji Yesu wa ambile amba, “Nanchi, ing'anyi kintu kyo nkapashang'anya na ka kino kisemi? Kyapasha pamo nobe banyike baikala pa bisankanyi, bebeta bakwabo amba, 17atweba twimwimbila ng'oma, bino anweba ne kuzha ne! Atweba twajila mabingo, pakuba anweba ne kujila ne! 18Mambo Yoano kechi wanangile kuja nangwa kutoma ne, kabiji ba ambile amba, uji na mudemona! 19Mwana Muntu aye waiya kasa aja ne kutoma, kabiji bamuneena amba, ‘Talai ye kiji ne kitomi, mulunda wa basonkeshi ne bandengamambo!’ Bino maana beabingisha ku mingilo yao.”

Mizhi ya milengulwila

(Luka 10:13-15)

20Ponkapo watatwile kwiinena bibi mizhi mo akizhizhe kuuba mingilo yanji ya bulume, mambo kechi balapijile ne amba, 21#Isa 23:1-18; Ezi 26:1—28:26; Yoe 3:4-8; Amo 1:9,10; Zeka 9:2-4“Malwa obe, Kolazeni! Malwa obe, Betesaida! Mambo umvwe mingilo ya bulume yaingijilwe mwenu, inge yamwekele mu Tila ne mu Shidona, umvwe balapijile kala ne kuvwala bisapi bya majilo ne kwipukula buto! 22Amiwa nemwambila namba, mu juba ja kije bya malwa, bya bena Tila ne Shidona bikakepako, kechi bikesakana na byenu ne! 23#Isa 14:13-15; Nte 19:24-28Ne obewa Kapenama! Ukasuntulwa kufika mwiulu nyi? Bakakwikizha panshi! Mambo aya mingilo ya bulume yamwekele mwenu, inge yamwekele mu Sodoma, inge ukijipo ne buji leelo! 24#Mat 10:15; Lu 10:12Kabiji nemwambila namba, mu juba ja kije bya malwa bya kyalo kya Sodoma bikakepako, kechi bikesakana na byenu ne!”

25Pa kyonkakya kimye Yesu wa ambile amba, “Nemutota anweba Taata, Nkambo wa mwiulu ne wa pano panshi, mambo mwibifiile bino bintu ku bamaana ne ku bamilangwe, ne kwibisolola ku baana ba bacheche. 26Mo monka Taata, mo kimuwamina anweba bene.”

27 # Yoa 3:35; Yoa 1:18; 10:15 “Bataata bampele amiwa bintu byonse. Kabiji kafwako nangwa umo wamuyuka Mwana byo aji ne, kanatu bonka Bataata, nangwa wayuka Bataata byo baji ne, kana yenka Mwana, ne boba bantu bo aswa Mwana kwibasolwelaye.”

Iyai konji

(Luka 10:21-22)

28“Iyai konji, anweba bonse basulwila na mingilo ne kunemenwa, ne amiwa nkemukokolosha. 29#Yele 6:16Tambulai kikonkoji kyami ne kufunda kwi amiwa; mambo amiwa ne kimote ne wakooka muchima, ne anweba mukamona kukokoloka kwa michima yenu. 30Mambo kikonkoji kyami kyawama, ne kisendwa kyami kyapeela.”

Currently Selected:

Mateo 11: KNTP

Highlight

Copy