ROMA 1

Paulus pigo yo di inggre kin mbusyamei ei minu ndig Roma

1Srat dini mem yo di mbusyamei ei minu ndig Roma. Allah ningon ngakei je ba, hig je mem gima jinok Nide limwa nya.

No di pas srat dini ne da di Paulus rin bidinok awak mem Kristus Yesus lene di ya kui Noni. Allah dimig da leu api ta da mem gima ditri tut Nihyet Di Kei di kwei leu Noni.

2Ba, Allah preu ei mem nye tut Nihyet Di Kei mimbrek ngan tu tug hon Nide nabi nya. Noni bindei ba, ipas tut nipreu ei mem nyeti dima ei Allah Nihyetti. 3Nihyet Di Kei dima pui sut Allah Nipmot bipia Noni ne ide Tuhan Yesus Kristus ri. Tut Yesus ningut ne Nide pung kim Daud, 4noro tut ninnei di kwes-kwau kei ne jo nibreisi Noni Allah Nipmot ri. Allah ba nisindemti di mindur bindo tut gini tirigi Noni kon Yesus leu nimai eisi. 5Allah bindei ba, Yesus Kristus singat tut da bikon dinyeng nok no di ya kui Noni bidinok awak mem Noni cem leu binhyepo dibuwak mben dihyeisi dini hagom ndam Yesus leu api iba ingon com Noni bibit nihyet. 6Je di mben Roma cem jisrig mben dihyeisi dimati lewo Allah hig je mem gima jinok Yesus Kristus de limwa nya. 7Gima rino dipas kep srat dini mem je.

Nnaba Icig Allah kin Tuhan Yesus Kristus isingat tut je ba, igyai jingon jo nyahan.

Paulus pai sigyo bak Allah

8Nimbie him ne dipai sigyo bak Allah tug hon Yesus Kristus mem jahagom lewo tungwatu bidem minu imiap tut jiba jingon com Yesus Kristusti tu. 9Tirigi dingat nadi lene dingon prion ser je bi. Allah ngat bou niyai him bipia dipaisi dima ne nijit-jau ri. Noni ne Allah di diba dijoi biborti biyai kep Nide midyai nya tirigi ditri tut Nihyet Di Kei tut Nipmot ri. 10Tirigi dingat nadi lene dahara Allah gino Noni joi sut ne ma kau dimbou leu da nogindini mem gima dihwou cem kep je. 11Lewo dingon bisau sut gi dingat je bou diyai him leu binhyepo dibippiet mun di kei di kwei leu Allah Ninnei bije ba, mun dima mibiyai jingon nddong kei. 12Dingon kanti ne ma nyeni yahagom ibiwin kep yam ngonti drek dip ide niba ningon com Yesus Kristusti.

13 # Kis. 19:21 Disut bat jen, ma jiyok ngon kep bipia dipi bidihwou ngat je mbirimang tu noro mun nyeng hi bigen ser da. Midihwou ngat je leu binhyepo diyai midyai ei jikieti bibindei ningat ntun him noyam kin midyai di diyai ei ngkiai nya ikieti dima di ningat ntun him ei minu hi ter tu. 14Lewo dibon ningwam bak tungwatu nya yahagom. Bak yo di isingat nya kin yo di isingat bi nya cem. Bak yo di ingon ki nya kin yo di ingon tindur nya cem yahagom. 15Gima rino dingon bisau sut gima ditri tut Nihyet Di Kei bak je di jibong ei minu ndig Roma cem.

Nihyet Di Kei sindem bibor

16 # Mrk. 8:38 Diba dingon com Nihyet Di Kei nindig bibor lewo Allah ndo Nide nisindemti tug hon Nihyet Di Kei di bindei yo di iba ingon com Noni igyai niteu leu sisarti kin niyaijo nijepti. Gini mem mben Yahudi nipou leu api mem ngkiai nya cem. 17#Hab. 2:4 Lewo Nihyet Di Kei mbot kep tut nisinati tut Allah niyai tungwatu nya ingon kwes kin Noniti. Nisinati dima tug hon ide niba ningon com Noniti ei nimbie him kikau ug bipek ningwigsi kep. Bit leu nok Allah Nihyet pai “Tungwa tou rino yai ningon kwes kin Allah tug hon niba ningon com Noniti miyai niyaijo nijep!”#1:17: Nipas kep Tungwa tou rino? miyai niyaijo nijep! cem kei lene nipas kep Tungwa tou rino yai ningon di kwes kin Allah miyai niyaijo nijep tug hon niba ningon com Allahti! cem kei.

Tungwatu nya yahagom ingon mui ei Allah niyai him

18Allah di ningon mpo tut sisar mbot kep tut notou Noni mikes hukum kwei leu gwamti ei yo di ibon sisar kin mun di mbuk nya yahagom dip lewo ide mun di mbuk nya tte tut tungwatu leu binhyepo ingon dorti tut Allah ningginau tungwatu nyati di nijit-jau dima bi. 19Mun di nijit-jau di biyai tungwatu nya ingon dorti tut Allah jo nibreisi ei ingon mien lewo Noni ndo hagom brei bak tungwatu nya tu. 20Habiei ei nimbie him tirigi Allah pai tes dihyeisi dini ne tungwatu nya ingon dorti tut Allah de nisindemti di ngwig hon nohonti bi ba, ingon dorti tut bipia Noni ne Allah di nijit ri. Ba, bit bon tungwatu nya ingat mun dini yok bou igyai him kan bi noro hagom jo nibreisi mem yok tug hon Allah nipai testi. Gima rino bit bon ibuhup hanyen bipai mun mem ibisu tindei kan bi. 21#Ef. 4:17-18 Mbro nok gino ikan tut Allah lo, ikon ninyeng binok ide Allah bipai sigyo bak Noni bi. Noro ingon kanti nya ndei hammi mun di bon ninyeng bi ba, ingon di tindur mpung tut nidinditi. 22Ipai sut yonti bipia ingon ki noro bi lewo ingon mbum yo. 23#Ul. 4:16-18 Ikuk yok bak Allah di niyaijo kikau bi. Noro ikuk yok bak kwar di ibon bou inda him nok tungwatu kin mun di dimba kin mun di mbut nimig kin mun di srei ei dihyei ninjek dip cem bou inda him ba, gima hagom mipror yon.

24Gima rino Allah sindui sut yok di ingut kanti nya srou yok. Ingon pri kep mun di bibon immai joti nya di bindei ba, icut tut yam. 25Ibindei ba, ikuk yok bak mun di nitrowai di ya luei Allah di nijit-jau nohoti. Ikuk yok bak mun di Allah pai tes he ba, yuubon yonti nok awak mem noro ikuk yok bak No di pai tes mun nyeng hagom ba, yuubon yonti nok awak mem Noni bi. Suar tungwatu nya inggei sut No di pai tes dima bijo ninno bijo kikau! Igbit ri.

26Gima rino Noni sindui sut yok ei ba, ingon pri kep mun di bibon immai joti nya. Sop nya igyem njita tut pinai nya bit leu nok tungwatu nya igyai kepti bi noro sop yonti icut tut yam. 27Pinai nya cem igyem njita tut sop nya bit leu nok tungwatu nya igyai kepti bi noro ingon pri kep yam ba, pinai yonti cem icut tut yam apino itug ndei hukum drek dip ide sisar di kinei bibor dima.

28Allah sindui sut yok ba, ingon kanti di mpiei bibor bindei ba, igyai kepti nya tunggwei sut Allah ningon kanti mem yok lewo ikou sut gima ipwoi nimbot kepti di nijit-jau tut Noni ei ingonti. 29Ingon mpung tut mun di kinei ninyeng hagom. Idrui bou ngwak cem ipigau hanjop cem ingon kinei sut yam cem ihwen yam cem ibui yam cem iris yam cem yeheu yam cem ittei mumpui ei yamti cem, 30ipai yam nghapti cem ingon mpo tut Allah cem ighyet sem tut yam cem inggei-nggwang cem ingon jei cem igyok ighyet mem gima ibon sisar tug hon nisinati hagom cem ibit icig bat-ipmem bat nya ighyet bi cem, 31ingon mien tindur cem ba, ingon gom tut ningon nggriu sut yamti kin ningondut yamti bi. 32Mbro nok gino yo dima ikan tut bipia Allah nihyet pai ser yok bipia yo di ibon sisar dima yok mitug ndei nimai lo, igyai kikep mun di kinei dima hagom he bi noro ice tut yo di igyai bram igyaisi cem.

Currently Selected:

ROMA 1: HAD

Highlight

Copy