KISAH 28

Paulus nya imbut-mbut nyen ei Mios Malta

1Niabiati nahagom nuug dihip biningwes ngun ei mam bei tu lene timiei mios dima ipai binye bipia mios dima ninyeng Mios Malta. 2Yo dima ingondut nye nindig bibor. Igya um nye ba, isingat tut nye cem. Indig hum bindei nye lewo mpia but ba, nidigok. 3Paulus ug mbus biei nggai bindig kep hum lene wou piet gom srei kros kwei leu biei di hum yem dima baham Paulus ninda bindun him. 4Tirigi timiei mios dima yok ingat wou di ndun Paulus ninda him lene ipai biyam “No dima ne nihwen mun cig ri. Mbro nok gino ningwes ngun leu muk mpoti lo, Birop Hanyen Cig hatap noni lene sindui sut niyaisi jo bu bi.” 5#Mrk. 16:18 Noro Paulus mpig ninda tut wou ei humti leu lene ninda dwoi bi. 6Yahagom itou kep noni nggilun bikan bigya ninda dwoi ug rin ba, nimai mitti hak ug ei dihyeisi. Noro itum ingon ninno bingat lo, mun nyeng hi cut igkep noni bi. Gima rino iluei ingonti bipai biyam “No dini ne nung di ikuk nye bak hi ri.”

7Publius nibou mios dima pek nide hanjop nsi dideu mpia ttou nsi di indig hum eisi pima. No dini ya um nye bisingat tut nye leu api cigit nye kui nide ig mem mmun-njap ningai. 8Mpe dima lene Publius nicig ningkek dut ba, oi sut ninggrom cem. Gima rino Paulus ug ngat noni bingat nadi kep. Paulus kes ninda ei noni dip apino noni kei hanyen. 9Tirigi timiei mios dima imiap tut no dima ninghapti lene yo di inggwen nindigsi ei mios dima yahagom induk yam kwei ei Paulus niyati leu api noni bindei ba, ikei hanyen. 10Gima rino injei mun di kei mang bibor bak nyeni. Son dideu nituti mem nibri kibar minyei hanyen lene yo dima imbus mun di nisuar nya bikon hagom ug ei kibar nsi mem nye tut nimbutti.

Paulus nya ijo leu Mios Malta biyuug ei minu ndig Roma

11Nibong bit yok mem bed ningai bingwig leu lene nibri kibar minyei di tukan nya yeheu kwar Kastor kin Poluks ei nuhwap. Kibar dima piar nyahan ei muk nuhuisi ei mios dima bibou bed di biang hou ntus leu ug e. 12Kibar dima bitot minyei ngwa dip tut nye ug ei minu ndig Sirakusa bipiar nyahan mem njap ningai. 13Kibar jo leu minu ndig Sirakusa bikriau mam kikau ug ei minu ndig Regium. Njap di hyep bu lene hou kui nyahan leu nite bei mpia nibiho bibindei ba, kibar bitot minyei ngwa dip mem njap can ug ei minu ndig Putioli. 14Nikinyon kibar ba, nuum yo di ingon jo kep Yesus ei minu ndig dima. Yoni icigit nye kui ide ig leu api nibong bit yok mem ari gom. Lene nikes yok leu lene nikak puig ug ei minu ndig Roma. 15Ninghapti tibim kikau ug ei yo di ingon jo kep Yesus ei minu ndig Roma itingou nsi. Gima rino ikwei ya um nye ei Pasar Apius kin Ig Losmen Niningai. Tirigi Paulus ngat yok lene noni pai sigyo hanyen bak Allah lewo ikweisi dima biwin kep ningonti.

Paulus bong ei minu ndig Roma

16Tirigi nikwei krau minu ndig Roma lene nibou pemerinta nya isindui sut ba, Paulus bong ei ig di noni go ninsi tu ba, tentara gom bong ser noni.

17Njap ningai ngwig leu lene Paulus sok nihyet mem nibou mben Yahudi nya ei minu dima bikwei mbrap bit noni. Tirigi idem yam ei su lene Paulus pai biyok “Disut bat jen, mbro nok gino diyai mun tunggwei sut mben Yahudi ba, dipigau ide pung di intun him nya igyai kepti nya di ingginau nye tut bi lo, mben Yahudi ikat da ei minu ndig Yerusalem leu api itri da bak mben Roma nya. 18Lene yo dima ihig pus da leu api ikos tut ingon kanti bida bipia ikes da bidimbut hak ug lewo jo nibreisi mem yok bipia dibon mun di mbuk di bindei ba, ditug ndei nimai drek dip hi bi. 19#Kis. 25:11 Noro mben Yahudi isrep tut da kikau. Gima rino mbro nok gino ditin ei mun dima dipai kep mben Yahudi tut ei Kaisar Roma noho bei hi bi lo, suar dahara Kaisar nonti mbus dingonti. 20Gima rino disok dihyet bije leu binhyepo jikwei mbrap bit da. Lewo ningat ne yo dima iba lante dini biteu da drek dip No Di Teu Tungwatu Nya Biyai Niyaijo Nijep Biyok di nye di mben Israel yahagom itum ingon mem ninno tu.”

21Lene mben Yahudi dima yok ibuhup “Niyai srat hi leu nibou nya ei Yudea tut na bigyo. Nisut hi kwei pui sut nani binye bigyo ba, hi kin kep anghapti cem binye bigyo. 22Noro nijoi sut bipia asimbot kep tut angon jo kepti nya binye lewo nahagom nikan tut bipia tungwatu isrep tut nimpung dino anggre kin dima.”

23Gima rino Paulus kin yoni ipreu ei mem yam tut njap gom dima imbus yam ei. Tirigi tto bou dima dem lene imang bibor induk yam kwei ei nide ig bei. Ba, noni nyohou tri tut nihyet biyok bimbot kep tut Allah Ninyeng Tak Kepti biyok mem mpia nipriti kikau ug bipek mpia nicutti kep. Noni ba ayat di kus leu Puig Yahudi nicukti nya kin Nabi nya ide srat nya cem bipingok yok lene biyai ba, yoni ingon jo kep Yesus. 24Leu api ibou poi ingon jo kep Paulus nihyet noro ibou poi isrep tut. 25Isrep tut yam ba, ibintek leu mpia dima tirigi Paulus binut nihyet mbigom kin bu bipai biyok “Mun di Allah Ninnei pai bak jidigup bat-jidigai bat nya tug hon Nabi Yesaya nuhui him dima ne nijit ri. 26#Yes. 6:9-10 Allah pai ‘Aug pai bak mben dini bipia mbro nok gino jingig jitingou mem nihyet ninno lo, jimiap bi. Mbro nok gino jibimian huk ninno lo, jingat cem bi. 27Lewo mben dini ingkek ndok ser bidat kep itingou ser ba, imut igyai cem leu su. Mun dini cut igkep yok ser nhyema iba igyai bingat mungkun ba, iba itingou bimiap mungkun ba, iba ingon di bisrip huk bikwei hanyen ndam Da leu binhyepo dibindei ba, ikei hanyen cem au.’ ” 28Leu api Paulus pai nihyet gi ningwigsi bitak kep biyok “Ma jiyok ngon kep bipia nogindini nihyet tut Allah di teu tungwatu nya leu sisar dima tibim ug ei ngkiai nya itingou nsi tu. Yoni mibit nihyet dima!” [29Paulus pai nok leu api mben Yahudi intek gimahap lo, iba ighyet bidahat yam nindig bibor.]

30Paulus bong ig bei di noni ba mitiei bigo dima mem ari bingwam nitindur can. Noni cigit yo di ikwei cem kep noni yahagom kui nide ig ba, 31brim ningkek kep yo dima tirigi noni tri tut nihyet tut Allah Ninyeng Tak Kepti ba, ngginau yok tut Tuhan Yesus Kristus cem. Tirigi noni yai kep midyai dima lene kwes mem noni ba, hi cuon ser noni tut bi.

Currently Selected:

KISAH 28: HAD

Highlight

Copy