MARKUS 6

Timiei minu ndig Nazaret nya ikou sut Yesus

(Mat. 13:53-58; Luk. 4:16-30)

1Yesus kin yo di igya kui Noni ijo leu mpia dima bingkwei hanyen ug ei Yesus Nide ig. 2Tirigi Njap Nigwam Kep Ninghuisi dem lene Yesus coi ug ei mben Yahudi ide ig mbusyameisi ba, sindi ngginau tungwatu ningot ndig di idem yam ei su. Lene yoni inga leu tut Noni nindig bibor bihig yam “No dini yai ningon di ki dima leu hantou i? Tou rino pingok di ningon ki nok gima i? Noni ba nisindemti di notou bibon mindur dini yok i? 3Noni ne tukan biei dino Maria nipmot rin bi e? Nikinjoi bat nya rino Yakobus kin Yoses kin Yudas kin Simon bi e? Nikwohop bat nya yahagom ibong bit nyeni bi e?” Lene ikou sut Noni.

4 # Yoh. 4:44 Leu api Noni pai biyok “Nindigsi yahagom ikon no di nabi ninyeng noro nide bat nya kin nide ig bei nsi nya ikon ninyeng kan bi.”

5Bit bon Yesus bibon mindur ei mpia ttou nsi dima kan bi. Noni kes ninda ei yo di inggwen nya ibou poi dip ba, ikei hanyen. 6Noni nga leu tut yok lewo iba ingon com Noni bi.

Yesus sok nihyet ei yo di igya kui Noni ibou simnaibrimigcan dip

(Mat. 10:5-15; Luk. 9:1-6)

Leu api Noni mbut bidem minu di gahai dima kou bingginau tungwatu nya. 7Noni nduk yo di igya kui Noni ibou simnaibrimigcan ba, idem yam lene sok nihyet ei ibou can ibou can dip lene bisindem tut yok leu binhyepo ijji ninnei rom nya leu tungwatu nya ingonti. 8#Luk. 10:4-11 Yesus pai biyok “Ma jiba nehei he bimbut ba, jittei tom nongkom he. Noro jipwoi njita kin minai ndu kin mitiei au. 9Ma jijuk srop ser jimig jou lene ma jijuk sinsun nggre dip nggre jou au. 10Tirigi juug krau minu ttou nsi hi lene ma jitou kep no di cigit je kui ig bijibit bong. Ma jibong ser ig gom ngat dima hak ba, jibimbut kep. 11#Kis. 13:51 Gino juug ei minu ttou nsi hi lo, tungwatu nya igya um je bintu kep jihyet bi lene ma jingkwei nyahan leu minu ttou nsi dima ba, jikit jimig jou tut ide dihyei ndung di dimbos hak nok mun di bindo biyok.”

12Gima rino yo di igya kui Yesus intek gimahap biyuug tri tut nihyet leu binhyepo tungwatu nya ittin ser ide sisar ba, ikiek ndam Allah. 13#Yak. 5:14 Ijji ninnei rom nya imang bibor leu tungwatu nya ingonti binden ampou tut mini ei yo di inggwen nya dip bibindei ba, ikei hanyen.

Yohanes di tur tungwatu nya ei minyeiti nimaisi

(Mat. 14:1-12; Luk. 9:7-9)

14 # Mat. 16:14; Mrk. 8:28; Luk. 9:19 Mpe dima ne Yesus ninghapti tibim ug ei Nibou Ndig Herodes#6:14: Nipas kep Nibou Ndig Herodes: Ninyeng titut yam ne Nibou Ndig Herodes Antipas ba, ninyeng tak kep hanjop Galilea. nitingou nsi lewo Yesus ninghapti tibim bidem hanjop dima nisurti-nipekti tu. Tungwatu nya bihi ipai “Yohanes di tur tungwatu nya ei minyeiti kiju hanyen leu nimai eisi tu! Gima rino noni yai nisindemti mem bibon mindur dima yok.”

15Lene bihi ipai “Yesus ne Nabi Elia ri.”

Lene bihi ipai “Noni ne nabi di noyam kin nabi gi nipou nya hi ri.”

16Tirigi ninghapti dima tibim ug ei Herodes nitingou nsi lene noni pai sut Yesus “Noni ne Yohanes di tur tungwatu nya ei minyeiti po dicuk tentara nya ba, yuug birop nibou leu pima rin lo, kiju hanyen leu nimai eisi tu!”

17 # Luk. 3:19-20 Herodes pai nok lewo nipou pini jug lene noni cuk nide tentara nya ba, yuug kat Yohanes bingot noni bingkiem ug ei ig bui nsi drek dip Herodias di nikinjoi Filipus nitnem di wak nok nitnem bu. 18Gima hagom nok lewo Yohanes sok kep Herodes ninyen bipai “Ma abuwak akinjoi nitnem binok atnem au lewo gima ne sisar ri!”

19Gima rino Herodias cem ningon sibui sut Yohanes lene pi bikos noni noro bit bon yai kan bi lewo Herodes tindap ser, 20lewo noni nyohou Yohanes ei ig bui nsi bidigit tut noni. Herodes kan bipia Yohanes ningon sren cem ningon kwes kin Allah cem. Noni joi sut ngig nitingou mem Yohanes nihyet lo, ningon ku nonti nindig bibor drek dip.

21Jei bi lene bon nituti mem Herodias tirigi Herodes bon pesta kep nide njap lene yo di igya kui noni kin nibou tentara nya kin nide limwa di inyeng jei nya ei hanjop Galilea, yahagom ikwei bidem yam ei pestati dima bit noni. 22Mpe dima lene Herodias nipmisop coi kwei bibien-bien nyen bingon mingon apino niyaisi dima brim Herodes kin nisut bat nya yahagom ingon bibor ba, ijoi sut noni. Gima rino Herodes pai bak misop dima “Mun nyeng dino ahara da tut lene midiyai bina bit leu angon kanti.” 23Ningat ne Herodes ba neheng bipreu ei binoni bipai “Mun nyeng di ahara da tut lene midiyai bina hak ug. Gino ajoi sut lene dikwas ditde ninyeng tak kepti nite hi tut nani e?”

24Leu api misop dima hei leu nghim nsi buug hig ser nipmem “Dibuhup nibou ndig nihyet notou i? Dahara mem mindei i?”

Nipmem buhup “Ma ahara noni tut Yohanes di tur tungwatu nya ei minyeiti nitibou hak ug.”

25Misop dima bisau bingkwei hanyen ndam Herodes bipai binoni “Dijoi sut arop Yohanes nibou leu lene attei nitibou ei srierti kwei bida nogindini!”

26Herodes ningon ngkwei leu nipreu eisi dima. Noro gi mbun noni luei ningonti tut kan bi lewo nipreu bak misop dimati tibim ei nisut bat nya yahagom itingou nsi tu. 27Gima rino noni cuk nide tentara gom buug ttei Yohanes nitibou kwei. Tentara dima ug ei ig bui nsi lene yai mun bit leu nok Herodes nicuk noti, 28biyok Yohanes nitibou ei srierti kwei bak misop dima leu api noni yai hanyen bak nipmem. 29Tirigi yo di igya kui Yohanes imiap tut nimaisi lene ikwei kon ningut ba, yuug sut bitig.

Yesus kwas njita tut tungwatu nya ibou sribu muhwi

(Mat. 14:13-21; Luk. 9:10-17; Yoh. 6:1-14)

30Yo di igya kui Yesus ingkwei hanyen ba, ipui sut mun di yoni ibibon kin ningginausi di itri tut bak tungwatu nya hagom biNoni. 31Ba, tungwatu nya ningot ndig induk yam bingkwei-ngkwei nyen kep Yesus kin yo di igya kui Noni ser ba, bon nikwesti mem gima igyem njita bi. Gima rino Noni pai biyok “Jikwei ba, yuug ei mpia ttou nsi gom di ha ngunti binyengkom leu binhyepo jibong kep jinghuisi.” 32Gima rino ibri ut biyuug ei ha ngunti biyongkom.

33Noro yo di ningot ndig dima yok ingat Yesus nya imbutti lene ikan bipia imbut ug ei mpia ttou nsi dima. Gima rino yo di ningot ndig di ikwei leu minu ndig di gahai dima kou idor kak mam bei ba, yuug krau bibie leu Yesus nya. 34#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mat. 9:36 Tirigi Yesus kinyon ei igpong nintig dip lene ngat tungwatu ningot ndig di idem yam ei dima leu api Noni ngondut yok lewo inok domba nya di ibon ide gembala hi bi. Gima rino Noni sindi ngginau yok tut mun nyeng mang bibor. 35Mmunti lene yo di igya kui Yesus ikwei pai biNoni “Tirigini ne ha ngunti rin ba, mpia mmunti tu. 36Ma akes yo dini bintek gimahap ba, inggok njita di igyem ei minu mien di gahai dini kou.”

37Noro Yesus buhup “Jikwas njita tut yok hak ug.”

Api yoni ihig ser Noni “Aye! Ajoi sut nyeni nuug ba mitiei nitig di buhun#6:37: Nipas kep mitiei nitig di buhun: Mpe dima ne mitiei nitig di buhun gom ne nimuhup di mitau bak tungwagom di yai kep midyai mem njap nitindur gom ri. sratus can binibipek roti mem nibitri yok e?”

38Lene Yesus cuk yok “Jug ngig jiyai kep jide roti di jipwoi kwei bipia nindak pig i?”

Yoni yuug yok igyai kep leu api ikwei buhup “Roti nindak muhwi kin wau can he.”

39Lene Yesus cuk tungwatu pima yok yahagom bikwas yam bibon nimpung ba, nimpung hi igwam keyam lene nimpung hi igwam keyam bitug abris bigwam dip. 40Gima rino ikwas yam ba, nimpung bihi ibou sratus gom igwam gom lene nimpung bihi ibou ningot muhwi igwam gom lene yahagom igwam nok. 41Lene Noni krau roti nindak muhwi kin wau can bitou kep ginyo kug lene pai sigyo kep bak Allah. Noni ki roti kukiau bak yo di igya kui Noni leu api ibitri tungwatu nya. Nok gima cem kwas wau can tut yahagom bigyem. 42Yahagom igyem njita bindei yok, 43lene yo di igya kui Yesus imbus roti kin wau niken ei bansi simnaibrimigcanti ba, hagom ut. 44Gino ikwop yo di igyem njita dima pinai nya he lene imangti ibou sribu muhwi.

Yesus mbut nimig ei minyei ngwa dip

(Mat. 14:22-33; Yoh. 6:16-21)

45Gima leu lene Yesus cuk yo di igya kui Noni ba, ibri ut bibie lene iba ut bitot minyei ngwa dip ug ei igpong nite dinyo ndam Betsaida sri bibou Noni kes tungwatu ningot ndig dima bingkwei ug ei ide ig leu ug e. 46Niabiati kes yok leu lene Noni mbut bikui ug ei mbigdip gom bingat nadi. 47Mmun tu lo, Yesus gwam biNongkom ei mam bei lene yo di ibri ut yuug ei igpong nahacanti tu. 48Noni ngat lo, yo di igya kui Noni itig minyei noro nggruk bibor lewo hou di nimig ten bibor kui yoti. Son dideu hayausi rino Yesus ug ngat yok bimbut nimig ei minyei ngwa dip sir yok.#6:48: Nipas kep sir yok cem kei lene nipas kep lene ba No bikum yok cem kei. 49Hammi tirigi ingat Yesus di mbut nimig ei minyei ngwa dip rino inghuisi mpig sut ba, yahara “Njungwes ri!” 50Lewo yahagom ingat Noni ba, ingwes mba.

Noro Noni mbrua kep yok bipai “Dwai! Dani ne Yesus rin ba, jittin au!” 51Lene Noni bri ut bigwam bit yok leu api hou ntus hak. Yahagom inga leu tut Noni nindig bibor, 52lewo ingon gi dorti tut mindur roti nindak muhwi di bon pima bi ba, ingon tindur yo.

Yesus bindei ba, yo di inggwen ei Genesaret ikei hanyen

(Mat. 14:34-36)

53Yesus nya yuug krau igpong nite dinyo ei hanjop Genesaret bikri ide ut ug ei mam bei. 54Tirigi ikinyon ug ei mam bei lene tungwatu nya ingat lo, gi kwei dima ne Yesus ri. 55Gima rino ibrim imig bimbut bidem minu dima hagom lene iba lat bittei yo di inggwen nya kwei ndam Yesus bikwop mpia ttou nsi di Noni ug eisi. 56Lene bikwop mpia ttou nsi di Noni tau eisi nok ide hanjop kin minu ndig kin minu mien ne tungwatu nya ittei lat tut yo di inggwen bikes yok ei biyati lene yahara Noni leu binhyepo sindui sut ba, yo di inggwen ingget Nide sinsun. Bikwop yo di ingget Nide sinsun kin ninggrun yahagom ikei hanyen.

Currently Selected:

MARKUS 6: HAD

Highlight

Copy