MARKUS 5

Yesus jji ninnei rom nya leu tungwagom ningonti

(Mat. 8:28-34; Luk. 8:26-39)

1Lene Yesus nya yuug krau Igpong Galilea nite dinyo ei hanjop Gerasa. 2Tirigi Yesus kinyon leu ut nsi lene tungwagom di ninnei rom ya ningonti hei leu hak mihyeti di nok jui dip kwei buum Noni. 3No dini bong-bong nyen ei hak mihyeti di nok jui dip ba, bit bon tungwatu nya iba kuk kin lante biteu noni kan bi. 4Mbro nok gino iba lante biteu nimig ninda ninyen tu lo, noni brim lante bitun leu lene dram ngkimom nitu di ibikim nimig cem ba, bitun kukiau. Noni sindem bibor dor njiriek tungwatu nya yahagom ba, bit bon hi kat noni kan bi. 5No dini ya-ya nyen ei hak mihyeti bikui nungug him mem mmun-njap bahara ninno leu api ba tig di nggwen bidigo nonti.

6Tirigi noni ngat igbit Yesus ei minu ting lene dor kwei leu api ba nibiau bicom mpia ei Yesus nimig him. 7Lene ba nihyet nindig bibor bahara “Na di Yesus di Allah Di Ninyeng Jei Nipmot rin e? Akwei nggon ndei da i? Dahara ser Na tug hon Allah ninyeng bipia ma ahwen bit da au!” (8Noni hara nok lewo Yesus sindi jji ninnei rom leu ningonti bipai “Na di ninnei rom e, ahei leu ningonti hak ug!”)

9Lene Yesus hig ser noni “Anyeng tou i?”

No dima buhup “Dinyeng Nimpung Gom lewo nimang bibor!” 10Noni hara ser Yesus ninno “Acuk nye di ninnei rom nya binuug leu hanjop Gerasa dini au.”

11Mpe dima lene na nya ningot ndig di item dihyei ei timbukti ei cet him dima. 12Ninnei rom nya yahara Yesus “Asindui sut ba, nicoi ug ei na dima yok ingonti.” 13Lene Yesus sindui sut yok leu api yehei leu no dima ningonti bicoi kikau ug ei na nya ingonti. Na dima yok nimangti ug ei ningut sribu can ba, hagom idor sindem bibor ug ei pimbien bou bikinyon ei igpongti leu api minyei kot yahagom bisar bingwig ug.

14Yo di ihyen kep na dima yok idor ba, itri tut mindur dima bak tungwatu nya ei ide minu ndig kin minu mien di gahai dima kou. Lene timiei nya ittei yam bikwei ngig igyai kep mun di pek kep mem no dima. 15Ba, ikwei ttau kep Yesus lene ingat igbit no di ninnei rom nimpung gom ya ningonti dima lo, noni juk sinsun ba, ningon tungwatu hanyen cem tu. Apino yoni inghuisi mpig sut nindig bibor. 16Yo di ingat mindur dima bou igyai him ipui sut mun di pek kep mem no dima ba, ipui sut mun di cut igkep na nya cem biyok.

17Gima rino tungwatu dima yok irok Yesus bijji Noni bingkwei hanyen leu hanjop nsi dima.

18Tirigi Yesus sindi bri ut bingkwei hanyen leu yok lene no di ninnei rom nya yehei leu ningonti hara Noni “Asindui sut bidibit Na.”

19Noro Yesus ce tut bi bipai “E bi. Ma angkwei hanyen ba, apui sut notou Allah bibon mindur mem nani kin Nide ningon nggriu sut nati bak ade bat nya!”

20Gima rino noni ngkwei hanyen ug ei hanjop Minu Ndig Ttou Nsi Simnai bitri tut mindur di Yesus bibon binoni. Yo di imiap nihyet di tri tut dima yahagom inggap leu tut nindig bibor.

Misop di ninnei pas kin sop di ngget Yesus de sinsun

(Mat. 9:18-26; Luk. 8:40-56)

21Tirigi Yesus bri ut bitot minyei ngwa dip hanyen ug ei igpong nite dima ug lene tungwatu nya ningot ndig induk yam kwei bigya um Noni ei igpong nintig dip. 22Yairus di nibou mbusyamei Yahudi gom ttau kwei bingat Yesus lene ba nibiau bicom mpia ei nimig him. 23Lene hara Noni “Andigpoi e, dipmisop mien nggwen nindig bibor ba, duhug-duhug nyen. Akwei kes anda ei noni dip leu binhyepo kei biniyaijo hanyen bu!”

24Tirigi Yesus ningat rima ndam Yairus de ig lene tungwatu ningot ndig inggreu ser nimbutti.

25Mpe dima lene sop gom di ningkek kan mun bikwop mmun-njap kikau mem ari bingwam simnaibrimigcan cem jop bram. 26Mbro nok gino noni ug ngat yo di inda kan nya imang bibor ba, bindei hei nide mitiei hagom bingwig eisi tu lo, kei hanyen bigyo noro nide ninggwenti dima buhun bibor bu. 27Noni miap Yesus ninghapti tut mindur di bibon tu. Gima rino ba no dek tungwatu ndig dino inggreu ser Yesus ninghim dip. 28Lewo noni kan “Gino singget Nide sinsun lene misikei hanyen.”

29Tirigi noni ngget Yesus de sinsun lene haninyai mun di ningkek kan dima kes hon bihigom biningkek kan lo, kei hanyen tu. 30Hammi tirigi Yesus kan lo, nisindemti ndrim hi hei leu ninghuisi rino kiek No kep yo di iba yok dek yam nyen bihig ser yok “Tou ringget Ditde sinsun i?”

31Yo di igya kui Noni ibuhup “Andigpoi e, angat yo di ningot ndig di iba yok bidek yam nyen dini yok lo, ahig ser nye tut no di ngget Ade sinsun e?”

32Noro Yesus put ttai No binggok no di ngget Nide sinsun. 33Tirigi sop dima kan tut mun di pek kep mem noni tu lene ba ningon di digit bikwei kuk no ei Yesus nimig him bipai sut hagom brei biNoni. 34Gima rino Yesus pai binoni “He dikwohop ndia ug o, akei hanyen tug hon ade niba ningon com Dati. Dikes na ba, aba angon di jo nyahan bingkwei hanyen hak ug lewo akei hanyen tu!”

35Tirigi Yesus mbrap bit noni lene ibou poi ikwei leu Yairus de ig bipai binoni “Apmisop ninnei pas tu. Gima rino abindin Guru bu au.”

36Noro Yesus ba ningha bak ighyet#5:36: Nipas kep ba ningha bak ighyet cem kei lene nipas kep miap ighyet bi cem kei. bipai bak Yairus “Dwai. Angon digit tut au noro ma angon jo kep Da!” 37Tirigi Noni ningat rima ndam ig bei lene kuk nindigsi yahagom bigwam ba, ibit Noni bi. Noro ce tut Petrus kin Yakobus Yohanes di nikindig-nikinjoi nya bibit Noni. 38Tirigi ikwei krau Yairus de biyati lene Yesus ngat lo, tungwatu nya ighyet kui yam ba, bihi ipim kep nimai lene bihi ighyet ter kep. 39Leu api Noni coi ug ei ig bei bihig ser yok “Nggon rino jihyet kui yam bijipim kep cem i? Lewo misop dini mai jit bi noro bong mai he!”

40Yo dima insrik ser nihyet. Noni jji yahagom biyuug ei nisai lene buwak misop dima nicig nipmem nya kin yo di igya kui Noni ibou ningai bicoi ug ei nghim nsi dino misop nibongti. 41Noni krau misop ninda bipai binoni “Talita kum.” Nikiek nihyet dimati pai “Dipmisop ndia ug o, dipai bina bipia akiju!”

42Misop dima kiju kui haninyai biya lene bimbut-mbut nyen. (Nide njap ug ei ari bingwam simnaibrimigcan tu.) Yo di ingat mindur dima bou igyai him yahagom inggap leu tut bijo ninno. 43Noro Yesus pai ser yok leu binhyepo imbot kep tut mindur dima bak hiter au. Leu api cuk yok “Jiyai njita bak misop dima biyem.”

Currently Selected:

MARKUS 5: HAD

Highlight

Copy