MARKUS 1

Yohanes di tur tungwatu nya ei minyeiti tri nihyet

(Mat. 3:1-12; Luk. 3:1-18; Yoh. 1:19-28)

1Gini ne Nihyet Di Kei tut Yesus Kristus di Allah Nipmot ri. 2#Mal. 3:1 Nihyet Di Kei nitriti bit leu nok Nabi Yesaya pas ei nipou su.

“Allah pai ‘Midicuk tungwagom di tri tut dihyet bibie mem Na leu binhyepo noni mitin puig mem Nani yo. 3#Yes. 40:3 Tungwagom nihyet tibim kwei leu mpia nintiti bipai bipia ma jitin puig di sren kei mem Tuhan nimbutti lene ma jiji kep ninjuisi sur yam kei.’ ”

4Gima rino Yohanes tau kwei ei mpia nintiti. Noni tur tungwatu nya ei minyeiti bisok kep yok “Suar jittin ser jide sisar ba, jikiek ndam Allah leu api jiyai nitur je ei minyeiti leu binhyepo Allah mikos ser jide sisar.” 5Tungwatu nya leu hanjop Yudea kin minu ndig Yerusalem imang bibor induk yam kwei kep Yohanes bipai jit ide sisar leu api noni tur yok ei Minyei Yordanti.

6 # 2Raj. 1:8 Yohanes juk sinsun di iba unta nta bibien lene tti mindhe ningkek nok bang. Noni yem hai ceng kin ahwei lon nok njita. 7Yohanes tri tut biyok “No di ya abia kep da ma kwei ninyeng jei bibor dor njiriek da. Dani ne dem mem gima dikuk da bidikwek Nide srop leu nimig jou bi. 8Ditur je ei minyeiti noro Noni tur je ei Ninnei Gi Kwesti bu.”

Yohanes tur Yesus ei minyeiti

(Mat. 3:13-17; Luk. 3:21-22; Yoh. 1:31-34)

9Mpe dima ne Yesus jo leu minu ndig Nazaret ei hanjop Galilea kwei leu api Yohanes tur Noni ei Minyei Yordanti. 10Tirigi Yesus kiju kui leu minyeisi rino Noni ngat lo, mpia-bbed him kau lene Ninnei Gi Kwes nok hakimoi di duop juk bigwam ei Noni dip ba, 11#Kej. 22:2; Mzm. 2:7; Yes. 42:1; Mat. 3:17, 12:18; Mrk. 9:7; Luk. 3:22 nihyet gom tibim kwei leu mpia-bbed him bipai “Nani ne Dipmot rin ba, dingon ngakei Na bidingon kei sut Na cem.”

Bilis bingon Yesus

(Mat. 4:1-11; Luk. 4:1-13)

12Haninyai Ninnei Gi Kwes bie tut Yesus ug ei iggum ndigsi. 13Noni bong ei mpia dima kikau mem mmun-njap ningot bitai ba, Bilis bingon kikep Noni. Mindhe-ndhe di niten-pos nya ingat rin ei sirima cem noro malaikati nya inyohou Noni.

Yesus hig pinai nya ibou bitai di ipos wau kan kwei bibit Noni

(Mat. 4:12-22; Luk. 4:14-15, 5:1-11)

14Niabiati Yohanes sima tu lene Yesus ug ei hanjop Galilea bitri tut Allah Nihyet Di Kei bak tungwatu nya ei sirima. 15#Mat. 3:2 Bipai “Tto bou dem tu. Allah Ninyeng Tak Kepti dideu su. Ma jittin ser jide sisar bijikiek ndam Allah. Ma jiba jingon com Nihyet Di Kei di kwei leu Noni!”

16Tirigi Yesus mbut nimig ug ei Igpong Galilea nintig dip lene Noni ngat Simon kin Andreas di nikindig-nikinjoi nya di ipos wau kan iba jala bipos wau ei igpongti. 17Yesus hig yok “Jikwei bit Da leu api dingginau je leu binhyepo jipos tungwatu nya kan.” 18Hammi tirigi Noni hig yok nok rino yahacem ikes ide jala bihigom ei leu lene ibit Noni.

19Yesus mbut mbigom kin bu bingat Zebedeus nipmot bat cin di Yakobus kin Yohanes di nikindig-nikinjoi nya. Yoni ibri ut bit icig bilit kep ide jala. 20Hammi tirigi Yesus hig yok rino ikes icig Zebedeus kin nide awak nya bihigom ei ut nsi leu lene ibit Noni.

Yesus jji ninnei rom leu tungwagom

(Luk. 4:31-37)

21Yesus nya yuug kikau ug ei minu ndig Kapernaum. Njap Nigwam Kep Ninghuisi gi dip bu dem lene Noni coi ug ei mben Yahudi ide ig mbusyameisi ba, sindi ngginau tungwatu nya. 22#Mat. 7:28-29 Yo di idem yam dima inga leu tut mun di Noni ngginau yok tut lewo ba niji di ngkiem bingginau yok sindem. Nihyet noyam kin ide guru Puig Yahudi nicukti nya ighyet bi.

23Mpe dima lene tungwagom di ninnei rom ya ningonti coi kwei ei ig mbusyameisi bahara, 24“Na di Yesus di atimieisi leu minu ndig Nazaret e, anggon ndei nye i? Akwei hwen nyeni e? Dikan tut anyeng ba, Nani ne No di kwes-kwau dino Allah cuk kwei ri!”

25Noro Yesus mbrua ser ninnei rom bipai “Akes ahyet ba, ahei leu ningonti hak ug!”

26Ninnei rom dahat kukwei noni ninyen leu api hara mbigom kin bu lene hei leu ningonti bihigom. 27Tungwatu dima yok yahagom inga leu tut nindig bibor leu api ihig yam “Mbenjen! Mindei rini? Ningginausi di mindur e? No dini sindem mem gima jji ninnei rom nya leu api ibit nihyet!”

28Gima rino Yesus ninghapti tibim bidem hanjop Galilea nisurti-nipekti.

Yesus bindei ba, yo di inggwen imang bibor ikei hanyen

(Mat. 8:14-17; Luk. 4:38-41)

29Yesus nya yehei leu ig mbusyameisi biyuug ei Simon Andreas nya ide ig. Yakobus Yohanes nya cem ibit yok. 30Mpe dima lene Simon nignyot ningkek dut bibong nibongti leu api ipai sut bak Yesus. 31Yesus ug ngat noni bikrau ninda bibrim leu api noni kiju bigwam pijum. Nok rino ningkek di dut pren hak leu noni leu api noni kiju bingei njita tut Yesus nya.

32Mmun tu#1:32: Nipas kep Mmun tu: Hammi tirigi mpia kimbas rino Njap Ningwam Kep Ninghuisi tun tu leu api Allah Nihyet sindui sut mben Yahudi ba, ikinyon ei ide midyaiti hanyen. rino tungwatu nya ibuwak yo di inggwen kin yo di ninnei rom ya ingonti nya yahagom kwei bingwig ttai Yesus. 33Ba, timiei minu dima yahagom induk yam kwei bigyem mpia ei biyati. 34Lene Yesus bindei ba, yo di inggwen imang bibor ikei hanyen ba, Noni jji ninnei rom imang bibor leu ingonti. Lo, Noni ggai ser ninnei rom nya leu binhyepo imbrap au. Lewo ikan tut Noni ninyeng tu.

Yesus tri tut nihyet ei hanjop Galilea

(Luk. 4:42-44)

35Njap di hyep bu lene Yesus kiju mem hayausi leu api hei leu ig bei buug ndam mpia nintiti leu binhyepo ngat nadi biNongkom. 36Lene Simon nya yehei leu ig bei binggok ser Noni. 37Tirigi yoni ingat Noni tu lene ipai bak “Tungwatu nya yahagom inggok ser Na.”

38Lene Yesus buhup “Ma nyeni yuug ei minu ndig nindigsi di gahai dini kou leu binhyepo ditri tut dihyet ei sirima cem lewo dikos tut dingon kanti ei ba, dikwei ei sirini mem midyai dima.”

39 # Mat. 4:23, 9:35 Lene Noni mbut nimig bidem Galilea nisurti-nipekti bitri tut Nihyet Di Kei ei mben Yahudi ide ig mbusyameisi ba, jji ninnei rom nya leu tungwatu nya ingonti.

Yesus bindei ba, no di bras yem kei hanyen

(Mat. 8:1-4; Luk. 5:12-16)

40Mpe dima ne tungwagom di bras yem#1:40: Nipas kep bras yem: Angig ayai kep Mat. 8:2. kwei ba nibiau bicom mpia ei Yesus nimig him bahara Noni “Andigpoi e, gino ajoi sut ne dikan tut bipia asindem mem gima abindei ba, dikei hanyen.”

41Yesus ngondut noni bisu ninda bingget leu api pai “I, dijoi sut angon kanti dima. Dibindei ba, akei hanyen.” 42Hammi tirigi pai bak nok rino bras llet hak leu noni. 43Lene Yesus cuk noni bingkwei hanyen bisok kep, 44#Im. 14:1-32 “Amiap e, aug ba, ambot kep tut bras dima bak nindigsi nya au. Noro aug ndo nanti bak no di imam leu binhyepo noni bimian angkek dip. Leu api ayai mun bit leu nok Puig Yahudi nicukti pai binye nok bindo bak tungwatu nya yahagom bipia akei hanyen tu.”

45Noro no dima ug lene ba niji di nggan bisimbot kep mun di pek kep mem noni ei tirima-tirima ser ba, bit bon Yesus coi ug ei minu ttou nsi dima yok brei bu bi. Noro bong ei ngoi dumti leu api tungwatu nya ikwei leu minu dima nisurti-nipekti ndam Noni.

Currently Selected:

MARKUS 1: HAD

Highlight

Copy