MATIUS 28

Yesus nikiju hanyenti

(Mrk. 16:1-10; Luk. 24:1-12; Yoh. 20:1-10)

1Njap nigwam kep ninghuisi ngwig leu su lene njap di hyep di nok mben Yahudi ide las gom lene Maria Magdalena kin Maria hiter iba njap bigyoti biyuug yok igyai kep jui dip. 2Idrui sut gi dihyei mun brim kros nindig bibor ba, Tuhan de malaikat gom juk kwei leu gwamti leu api rim tig mma leu jui dip bigwam dip. 3Malaikat dima niimaisi njeng kei dem kep kigyei di ninjeng srei lene nide sinsun tiei-tiau kei dem kep hayok mien. 4Tentara di igya ser jui dip inghuisi mpig sut nindig bibor leu api imai tti ug ei dihyeisi.

5Malaikat dima pai bak sop nya “Ma jinghuisi mpig sut au! Dikan tut bipia jinggok ser Yesus di ipek ei biei salibti. 6Ningat rin ei mpia ttou nsi dini bi. Noni kiju hanyen leu nimaisi bit leu nok nipaisi tu. Jikwei ngat mpia di ikes ningut eisi rini. 7Ma jibrim jimig nogindini bijingkwei hanyen lene ma jipai bak yo di igya kui Yesus bipia Noni kiju hanyen leu nimai eisi tu ba, ug ei hanjop Galilea bibie mem yok. Mijingat Noni ei mpia dima. Ma jikan kep dihyet di disok ei je dip tu.”

8Sop cin dima ibrim imig ba, iba ingon di digit kin ingon di llei bibor cem bijo leu jui dip leu api idor sindem ug bitri tut bak yo di igya kui Yesus.

9Yesus ya um yok kros bipigo yok “Jicem.” Lene ikuk yok dideu Noho bei bikrau nimig lene inggei sut Noni. 10Yesus pai biyok “Ma jinghuisi mpig sut au. Noro ma juug pai bak dikinjoi bat nya bipia yuug ei Galilea leu api miyuum Da ei mpia dima.”

Imam nya ingot kep tentara nya

11Tirigi sop nya ingkwei hanyen lene tentara nya ibou poi di igya ser jui dip ingkwei hanyen ug ei Yerusalem leu api ipui kep mun di timon yok hagom bak imam nindig nya. 12Imam nindig nya induk yam bit nibou mben Yahudi nya leu api ihig yam ba, igyok ingon gom. Leu api iba mitiei nindig bibor bingot kep tentara dima yok, 13bisigi kep yok ngkiem ser bipai “Suar jitri tut bipia yo di igya kui Yesus ikwei mem mmun mau tirigi jibong mai leu lene iket nimai leu jui nsi sin jeti. 14Gino jinghapti tibim ug ei nibou Roma nitingou nsi lene nyeni niya hacan mem je leu binhyepo jitug ndei hukum bi.”

15Tentara nya igyai mitiei dima leu yok leu api igyai hagom bit leu nok imam nya icuk yoti. Gima rino mben Yahudi ipui biyam tut yo di igya kui Yesus di ikwei ket nimai leu jui nsi pima kikau kwei bipek ammani kep.

Yesus ndo Nonti bak yo di ibit Noni

(Mrk. 16:14-18; Luk. 24:36-49; Yoh. 20:19-23; Kis. 1:6-8)

16 # Mat. 26:32; Mrk. 14:28 Yo di igya kui Yesus ibou simnaibrimiggom yuug ei hanjop Galilea leu api ikui ug ei nungug dip di Yesus preu kep yok tut. 17Tirigi ingat Noni lene ikuk yok ei nimig him binggei sut noro ibou poi ingon kiowi tut. 18Yesus son dideu yok bipai biyok “Dinyeng tak kep nisindemti hagom ei gwamti kin dihyeisi dini. 19#Kis. 1:8 Gima rino ma je juug ba, jibindei tungwatu dihyeisi dini hagom bibit Da leu api jitur yok ei minyeiti tug hon ninyeng Nicig kin Nipmot kin Ninnei Gi Kwes. 20Ma jingginau yok leu binhyepo ibit mun di dicuk je tut nya hagom. Ma jiyok ngon kep bipia midingat rin bit je kikau ug bipek njap ningwig honti.”

Currently Selected:

MATIUS 28: HAD

Highlight

Copy