NITRITI 33
33
Yakub kin Esau yuum yam
1Lene Yakub ngat Esau di ya tut nide limwa nya ibou sratus bitai tirigi itau ndam noni. Gima rino noni kwas nimunggwom bat nya bikes bihi bak Lea bihi bak Rahel lene bihi bak nitnem ndrim sop di awak cin. 2Leu api noni cuk sop di awak cin tut imunggwom bat nya igya bibie leu api cuk Lea tut nimunggwom bat nya bigya hacan leu api Rahel kin Yusuf igya abia kep yok. 3Lene Yakub nonti ug dor bibie leu yok leu api kuk no biba ningwak bikik dihyei mbimuhwindacan tirigi noni mbut ndam Esau nitausi. 4Noro Esau dor kwei buum Yakub leu api nggriou noni bimei ningyoi lene yahacem ipim bigyai nggwei kibor. 5Lene Esau kon nibou bingat sop nya kin munggwom nya lene hig ser Yakub “Tou nya rino ibit na dima i?”
Api Yakub buhup “Andigpoi e, yo dini yahagom ne dimunggwom bat nya ri. Allah yai yahagom bida lewo ningon nggriu sut da.” 6Lene sop di awak cin igya tut imunggwom bat nya ba, ikwei kuk yok ei Esau nimig him. 7Lene Lea cem ya tut nimunggwom bat nya ba, ikwei kuk yok ei Esau nimig him bu. Leu api Yusuf kin Rahel igya abia kep nindigsi nya ba, ikwei kuk yok bak.
8Lene Esau hig ser Yakub “Angon kanti notou sut nimpung po duum yok ei puig sinon aponi pima i?”
Lene Yakub buhup “Diba nimpung dima yok bibiyai angon kwes kin da hanyen.”
9Noro Esau buhup “Dikinjoi na e, mun di dinyeng tut nya dem mem da tu. Mun di anyeng tut nya jo bina hak ug.”
10Noro Yakub srep “E bi! Gino ajoi sut da lene ama mun di diyai binani hak ug. Lewo tirigi dingat aimaisi bou diyai him lene gima dem kep nok dingat Allah niimaisi bou diyai him lewo ajoi sut da. 11Nna ba ama mun di dikwas tut na dima hak ug lewo Allah ningon nggriu sut da binjei mun nyeng mang bibor bak dani tu.” Yakub bibidip huk nyen nok leu api Esau ce tut biyai leu noni.
12Mbigom bu lene Esau pai binoni “Sitin ei bisimbut rin. Midibie tut je.”
13Noro Yakub buhup “Andigpoi e, nok bi. Akan tut bipia dimunggwom bat nya inghuisi sindem bigyo. Mindhe-ndhe nimien nya sindi idut do ngei ba, bit bon imbut sindem kan bi. Gino dijem yok sindem mem njap nitindur gom lene hagom mimai kak puig sinon. 14Nna ba abie lene midinyohou abia kep na. Minimbut bidem nisindemti tut mindhe-ndhe nya kin dimunggwom bat nya cem bibou nihwou ngat na di Andigpoi ei minu Edom ug e.”
15Lene Esau pai “Api midikuk ditde limwa nya ibou poi mem na leu binhyepo inyohou cen jeni.”
Noro Yakub buhup “Nok ug e. Angon mbut-mbut nyen tut da au. Gino dibindei ba, ajoi sut da lene dem.”#33:15: Nipas kep Gino dibindei ba, ajoi sut da lene dem cem kei lene nipas kep Gino ace tut lene dem cem kei. 16Gima rino Esau nya ingkwei hanyen ug ei minu Edom mem njap gom ndia. 17Noro Yakub ug ei Sukot bingot ig mem nonti lene hok ig jibei nya mem nide mindhe-ndhe nya cem. Gima rino ijem mpia dima ninyeng Sukot.
18Gima rino Yakub nya ijo leu Mesopotamia bimbut kikau. Yoni iba ingwes ngun bikwei krau minu ndig Sikhem ei minu Kanaan hanyen bu. Lene yohok ide prak meng yati ei susti di jo dideu minu ndig dima. 19#Yos. 24:32; Yoh. 4:5 Lene noni ba mitiei perak ningat sratus gom bipek dihyei hanjop nsi dima leu yo di intun Hemor him leu binhyepo yohok prak meng yati eisi. Hemor dima ne Sikhem nicig ri. 20Lene noni dingug tig nok nimbar hum dok ei sirima bipiga ei mem El ba, Noni ne mben Israel ide Allah ri.
Currently Selected:
NITRITI 33: HAD
Highlight
Share
Copy
Want to have your highlights saved across all your devices? Sign up or sign in
