NITRITI 32
32
Yakub tin ei mem gima ug um Esau
1Lene Yakub ug ei puig sinon leu api malaikati nya ikwei um noni. 2Tirigi noni ngat yok tu lene simbot dat “Allah hok Nide prak meng ei gumihyep dini.” Gima rino noni jem gumihyep dima ninyeng “Mahanaim.”
3Lene Yakub sok nihyet ei nide limwa nya dip bibie leu noni biyuug ngat nikindig Esau ei minu Edom, 4bipai biyok “Suar jipai bak Esau bipia nide awak di Yakub bong bit Laban ninno tu ba, sindi kwei hanyen lo, binyen. 5Ba, da di Yakub dinyeng tut sapi nya kin keledai nya kin kambir nya kin domba nya kin awak nya hagom imang bibor bidisok dihyet nok gima hwou ndam noni di nok ditde andigpoi leu binhyepo noni joi sut da.”
6Tirigi yuug ngat Esau leu ba, ingkwei hanyen tu lene ipai bak Yakub “Nuug ngat akindig Esau tu ba, noni sindi hei sut nide limwa nya ibou sratus bitai bikwei um na.” 7Lene Yakub ttin tut nindig bibor biningon mbut-mbut nyen. Gima rino noni kwas nide bat nya kin nide limwa nya kin nide mindhe-ndhe nya hagom ei nimpung canti. 8Lewo noni kan “Gino Esau kwei tau kep nimpung gi nigom biya kep bihwen yok lene mibon nituti mem nimpung gi nican inang bingwes ngun.”
9Lene noni ngat nadi bipai “Dignyon Abraham kin dicig Ishak ide Allah e, amiap dihyet! Na di tuhan acuk da bipia dingkwei hanyen ug ei ditimieisi bidibong bit dide bat nya hanyen bu leu api ma anyohou dimig mun di hagom nok gi kei bibor mem da. 10Dani ne dem mem gima angondut da ba, angon gom tut da rin bi. Dinok awak mem Nani he. Tirigi po disigon Yordan pima lene dittei ditde tom he. Noro njap di ammani lene dikwei hanyen tut ditde limwa nya nimpung can. 11Ma ateu da bidingwes ngun leu dikindig Esau ninda nsi lewo dittin tut noni. Leu ma noni mikwei ya kep bihwen nahagom bitut sop nya kin munggwom nya cem ug rin e? 12#Kej. 22:17 Ma ayok ngon kep gi po apreu ei mem da pima bipia mporo ma anyohou dimig hagom nok gi kei mem dani lene ditde nintun him yamti di bram yam nya midigek kep mpia ba, imangti dem iggum di jo muk nipimat di bit bon tungwatu nya ikwop nimangti kan bi.”
13Lene noni bong ei mpia dima mem mmun gom leu api njap dihyep bu rino tin ei kwas ndigban nide tut nikindig Esau. 14Noni dimig kambir niwek ningut sratus can kin nikre ningut ningot can kin domba nya niwek ningut sratus can kin nikre ningut ningot can, 15kin unta niwek di bep nipmot di idut unta nido ngei ningut ningot ningai kin sapi niwek ningut ningot bitai kin nikre ningut simnai kin keledai niwek ningut ningot can kin nikre ningut simnai ei. 16Lene noni kwas mindhe-ndhe dima yok ei nimpung nya bikes yok bak nide limwa nya leu api ijem. Lene noni cuk yok “Jibie doho ba, jigom jem nimpung gom biya bibie lene jigom jem nimpung gom biya hacan bibikwop nok lene ma jibon ningwakti ei nimpung nya ikieti.” 17Lene Yakub cuk nide mindor di mibie bipai “Gino dikindig Esau um na bihig simber na bipai ‘Aceu ritou i? Aug ei hantou i? Tou rininyeng tak kep mindhe-ndhe dini yok i?’ 18Gino noni hig simber na nok lene ma abuhup nihyet nok gini ‘Gini yok hagom Yakub de ba, noni nok awak mem nani bikwas hagom mikuisi tut na hak ug. Lene nonti no ya abia kep nye ma kwei.’ ” 19Lene Yakub cuk nide awak gi nican kin gi niningai kin nindigsi nya yahagom di ijem nide mindhe-ndhe nya bipai “Tirigi juug um Esau lene suar jipai igbit dicuk jeti pima. 20Suar jipai bak Esau bipia nide awak di Yakub no abia kep je kwei.” Yakub pai nok lewo kan “Siba mun di sikwas dima yok bibakei sikindigti leu binhyepo sibindei ba, ningon nggriu sut sa. Tirigi suum noni lene noni mikos ser mun po sibon tunggwei sut noni pima hak ug e?” 21Gima rino noni cuk yok bibie tut mun di noni kwas tut nikindig leu api noni bong mem mmun gom ei nide prak meng nsi.
Yakub kin tungwagom idahat kukwei yam ei Pniel
22Lene Yakub kiju mem himmun biwin nitnem bat cin kin nitnem sop awak cin kin nipmot bat nya ibou simnaibrimiggom ba, isigon Minyei Yabok biyuug dihip ei nite hi. 23Yahagom yuug dihip ei nite hi tu lene noni ngkwei hanyen bipinak nide mun di nyeng tut nya hagom bram yok ug ei nite hi. 24#Hos. 12:3-4 Noro Yakub gwam binongkom ei minyei nite hi.
Lene tungwagom tau kwei bikat noni ba, idahat kukwei yam kikau binjap kep. 25Tirigi idahat kukwei yam nok rino no dima kan bipia sindem bi lene noni tug Yakub nintig tuti bipis. 26Lene pai bak Yakub “Akes da ba, duug rin lewo jei bi ne mpia pri ri.”
Noro Yakub srep “Ma anjei mun di kei hi bak dani nipou ug e leu api midikes na ba, aug.”
27Lene noni hig ser Yakub “Anyeng tou i?”
Lene Yakub buhup “Dinyeng Yakub.”
28 #
Kej. 35:10
Lene no dima pai “Anyeng rino Yakub bu bi. Adahat kukwei Allah kin tungwatu nya cem ba, abindei timek yok tu. Gima rino suar ijem anyeng Israel bu.”
29 #
Hak. 13:17-18
Lene Yakub hig ser noni “Anyeng tou i?”
Leu api no dima buhup “Ahig ser dinyeng tut nggon i?” Leu api noni njei mun di kei bak Yakub.
30Lene Yakub simbot dat “Mei! Dingat Allah niimaisi bou diyai him tu lo, diyaisi jo yo!” Gima rino noni jem gumihyep dima ninyeng “Pniel”. 31Tirigi mpia pri tu lene Yakub mbut leu sirima lo, priker lewo nintig tuti dut. 32Gima rino mben Israel ipigig sut mindhe-ndhe ninghui di rap nintig tuti bigyem bi kikau kwei bipek ammani kep. Lewo no dima tug Yakub nintig tuti.
Currently Selected:
NITRITI 32: HAD
Highlight
Share
Copy

Want to have your highlights saved across all your devices? Sign up or sign in