NITRITI 21

Sara gwam tut Ishak

1Lene tuhan njei mun di kei bak Sara bit leu nok noni preu sut ei mem noni nipou su. 2#Ibr. 11:11 Dem igbit tto bou di Allah preu ei nipou su lene Sara tta buhun bigwam tut munggwom pinai bak Abraham tirigi noni wer andig-ndau su. 3Lene Abraham jem nipmot ninyeng Ishak. 4#Kej. 17:12; Kis. 7:8 Tirigi Ishak de njap ug ei njap muhwindaningai lene Abraham bon midut sunat ei ningutti bit leu nok Allah nicuk noti. 5Gima rino Abraham yai nipmot Ishak tirigi nide njap ug ei ari bingwam sratus gom. 6Lene Sara pai “Allah bindei bidiba dingon llei bibor bipa tut. Bikwop tungwa tou rino miap dinghapti tut dingon llei biborti lene noni miba ningon di llei bibor bipa bit dani bu.” 7Lene noni binut bu bipai “Nipou pini jug tou ripai bak Abraham bipia Sara miyai do bak nimunggwom i? Noro diyai munggwom pinai binoni tirigi noni wer andig-ndau su.”

8Tirigi Abraham nipmot wer ndig nut bidut do bu bi lene nicig bon pesta nindig bibor kep noni.

Abraham jji Hagar kin Ismael

9Mpe di gom lene Ismael di Abraham kin Hagar po mben Mesir pima ipmot kek bit#21:9: Nipas kep kek bit cem kei lene nipas kep hwen bit cem kei. Ishak di Sara nipmot. 10#Gal. 4:29-30 Tirigi Sara ngat yok lene nso tut bak Abraham bipai “Suar acom sop di awak dimo nipmot yoni leu binhyepo nipmot miba nokep ade ndigban ndrim hi bi. Lewo suar dipmot Ishak ba nokep hagom.” 11Lene Abraham ningon buhun tut Sara nicuk noti lewo Ismael cem nipmot ri. 12#Rm. 9:7; Ibr. 11:18 Noro Allah pai binoni “Dwai. Ma angon bos-bos nyen tut apmot kin awak di Hagar au. Ma ayai hagom bit leu nok Sara nicuk nati lewo ade nintun him yamti di bram yam nya po dipreu ei mem na pima yahagom mintun Ishak him. 13Midibindei ba, yo di intun awak dima nipmot him idigek kep mpia ba, inok mben nindig bibor. Lewo Ismael cem apmot ri.”

14Njapti kui lene Abraham yai njita kin aigmui mindhe ngkek tut minyei di joti cem mem igyem kak puig sinon bak Hagar leu api kon Ismael ei Hagar ninghim lene cuk sop dima buug hak. Lene Hagar mbut-mbut wai ei iggum ndigsi gom ei Bersyeba. 15Tirigi ide minyei ngwig leu yok tu lene Hagar kuk nipmot ei war behei. 16Lene pri bikuk no bigwam ei ting nok meter sratus gom leu api kan “Ayo! Siyai kou gima singat mot side dima mai o! Pai nok lene niyai nggwei kibor.”

17Lene Allah miap Hagar nipmot Ismael di pim leu api malaikati Allah de nihyet tibim kwei leu mpia-bbed him bipai Hagar e, Hagar e, apim tut nggon i? Ma attin bu au lewo Allah miap apmot nihyet tu. 18Akiju ba, akon apmot hanyen ba, apai-hi-paisi leu mporo midibindei ba, nide nintun him yamti di bram yam nya nok mben nindig bibor. 19Lene Allah piga Hagar niyai bibindei ba, noni ngat minyei bousi gom. Gima rino ba aigmui pima bitau minyei hi bak nipmot bidut.

20Lene Allah nyohou Ismael ba, noni bindig nut lene bong-bong wai ei iggum ndigsi ei Paran. Mimbrek-mimbrek lene noni nok no di ngim igkei. 21Lene nipmem ug buwak sop Mesir hi ba, ndo bak nok nitnem.

Abraham kin Abimelekh ipreu ei bit yam

22 # Kej. 26:26 Mpe dima lene Abimelekh kin Pikhol di nibou tentara ikwei ngat Abraham bipai binoni “Ningat ne Allah nyohou na bisindem tut na mem gima ayai ade midyai nya hagom. 23Gima rino ma aheng bidani ei hanni ei Allah Noho bei bipia mporo aris bidani kin ditde nintun him yamti di bram yam nya bi sren. Lewo dipwoi angon ninno tu. Gima rino ma apwoi dingon ba, anyohou ditde minu di dinyeng tak kep dini cem lewo apek hanjop nsi ei angkiaisi dini ninno tu.”

24Lene Abraham ce bipai “Diba neheng bipreu kep na bit leu angon kanti.”

25Lene noni nso Abimelekh tut minyei bousi gom di Abimelekh de awak nya iba imbuk bisrin ser tu. 26Lene Abimelekh buhup “Dikan tut yo di isrin ser minyei bousi dima bi. Lewo ambot kep tut bida bi sren ba, sindi nogindini api apai sut bida dini.” 27Lene Abraham kwas domba nya kin sapi nya nimangti poi sut Abimelekh leu api yahacem ikwam minggwen. 28Lene Abraham dimig nide domba nehen pap niwek ningut muhwindacan bu bigya ter. 29Leu api Abimelekh hig ser noni “Ayai mun nok gima tut nggon i?”

30Leu api Abraham buhup “Ma ayai domba mien poi dini leu da nok mun di bindo tut bipia dani rino ditig minyei bousi dini ba, dinyeng tak kep tu.” 31Gima rino tungwatu ijem minyei bousi dima ninyeng Bersyeba#21:31: Nipas kep Bersyeba: Tirigi indat kep ninyeng dini lene nibimbiti pai Minyei Bousi Neheng kin Minyei Bousi Nimuhwindagom cem. lewo yo cin pima ipreu mun bit yam ei sirima.

32Tirigi ipreu mun bit yam ei Bersyeba tu lene Abimelekh kin Pikhol ingkwei hanyen ug ei mben Filistin ide minu. 33Lene Abraham ta biei tamariska nikioi gom ei Bersyeba. Hon kep njap dima kui lene noni kuk no bak tuhan dino Allah Di Niyaijo Kikau ei sirima. 34Gima ngwig lene noni bong ningkiaisi ei mben Filistin ide minu mem nijam di jei.

Currently Selected:

NITRITI 21: HAD

Highlight

Copy