NITRITI 20

Abimelekh dimig Sara binok nitnem mien

1Lene Abraham jo leu Mamre buug ei minu Kanaan nite bei mpia nibiho leu api bong ei Kades kin Syur ikieti. Jei bi lene noni ug bong ei Gerar bu. 2#Kej. 12:13, 26:7 Ei sirima lene Abraham pai sut nitnem Sara bipia noni ne nikwohop ri. Gima rino Abimelekh di nibou ndig Gerar cuk nide awak nya leu binhyepo yuug buwak Sara kwei binoni. 3Njap poi ser lene Allah ndo Nonti bak Abimelekh. Tirigi Abimelekh bong bimumpriem mem mmun lene Allah sok kep noni ngkiem ser “Mbigom amai drek dip gi abuwak sop dima lewo noni bon nijjep tu.”

4Noro Abimelekh ngget Sara bigyo. Gima rino hara ser “Tuhan e, dingon ngun! Nggon rino acok tut da kin ditde limwa nya yahagom i? 5Abraham nonti ris bida bipai sut Sara bipia noni ne nikwohop rin ba, Sara cem ris bida bipai sut Abraham bipia noni ne nikijam ri. Mun di diyai dima ne diba dingon di kwes biyai ba, diyai mun tunggwei bi.”

6Lene Allah buhup tug hon Abimelekh de mumpriem dima bipai “Igbit ri. Dikan tut tu. Aba angon di kwes biyai mun dima. Gima rino disrin ser na leu binhyepo abon sisar tut Da bi ba, disindui sut gino angget noni bi. 7Noro suar atug noni hanyen bak nijjep nogindini. Lewo nijjep ne nabi rin ba, noni mingat nadi tindei je leu binhyepo jitug ndei nimai bi. Amiap e, gino atug noni hanyen bak nijjep bi lene nani kin ade limwa nya cem jahagom mijitug ndei nimai hak.”

8Lene njap di hyep bu Abimelekh nduk nide limwa nya yahagom kwei mem ha yausi bitri tut mun di bitimon noni pima hagom leu api yahagom idigit tut nindig bibor. 9Nok rino noni hig Abraham kwei bihig ser noni “Anggon ndei nye i? Diyai mun tunggwei notou dino abindei ba, mun di buhun dini cut igkep da kin ditde minu di dinyeng tak kep dini i? Harin dima tungwatu ibon mun di nok abon bida dima a. 10Nggon rino abon nok gima i?”

11Lene Abraham buhup “Dikan bigya ade minu dini bon timiei hi di ttin tut Allah bi ba, mpaba tungwagom mitot da leu ditnem di ningon pri kep. 12Noni ne dikwohop ngat rin lewo nahacem nibon nicig gom ngat noro nyeni nipmem bat ter leu yam. Gima rino diwak noni nok ditnem. 13Tirigi po Allah cuk da kwei leu ditimieisi ba, dibong-bong nyen ei dingkiaisi dini lene dicuk Sara bipia ando angon di gom tut da tug hon gima atri tut bak tungwatu nya bipia akijam ridani.”

14Lene Abimelekh tug Sara hanyen bak Abraham leu api kwas domba nya kin sapi nya awak sop kin pinai nya hagom bak. 15Lene pai bak Abraham “Suar acap ser ditde minu dini hagom leu api apek hanjop nsi eisi bit leu angon kanti hak ug.” 16Lene pai bak Sara “Dikwas mitiei nibuhun nitig sribu gom tut akijam bou ajjep jeni jide limwa nya yahagom igyai him nok mun di bindo bipia ayai mun tunggwei hi bi.”

17Lene Abraham ngat nadi tindei yok apino Allah bindei ba, Abimelekh cem kei hanyen ba, bon nitnem kin nide awak sop nya cem yahagom inghop hanyen. 18Lewo tuhan bindei ba, bit bon sop nya yahagom di ibong ei Abimelekh de ig bei inghop kan bi drek dip Sara di Abraham nitnem.

Currently Selected:

NITRITI 20: HAD

Highlight

Copy