Luk 23
23
1Ȧruniya bɛ rə yokanɛ, rə kera kɔ ka Paylet. 2kaŋ təp kəgbanthir kɔ, aŋ pa, Sə bəp ɔwuni ɔwe ɔ yɛthəs ȧŋbona a su, ɔwa ɔ bɛnt aŋfəm tə kəsɔŋ ɛfȧk ka Sisar, kɔ pa kɔn kɔnɔnɛ ɔ yi ɔKrayst ɔbȧy. 3Ka Paylet ɔ yif kɔ, ɔ pa, Munɔ yi ɔbȧy ka aŋYuda-i? kɔ wosȧnɛ kɔ ɔ pa, Mə po thɔ pa ti. 4Paylet ɔ pa ka aŋfode abana yi ka aŋfəm, I fir hɛ athɛkɛ ka ɔlaŋgba ɔwe. 5Kɛrɛ aŋ bȧsər gbanthir kɔ aŋ pa, Ɔ thayos aŋfəm mɔ mɔ thəksa ro Yudia bɛ, kətəp ro Kalili haŋ ka ɔdɛr ɔwe. 6Ma Paylet ɔ təl ȧte-e, ɔ yif bepi ɔlaŋgba ɔ yi uKalili. 7Ɔwa ma ɔ tȧrȧ kəpa ɔ yi ka aŋfɔsɔ ŋa Hɛrɔdȧŋ, ɔ somra kɔ ka Hɛrɔd, pəkasifɛ ɔ yi ro Yerusalɛm ka ȧŋlɔkɔ ŋati.
8Ɔwa ma Hɛrɔd ɔ nənk Yisɔsȧŋ, pə bɔnɛ kɔ ɔthasər, kotȧy-e ɔwoni thɔŋ ɔ fela tə kənəŋk kɔ, pəkasifɛ ɔ po təl tȧy təgbȧthi ta atɔŋ. Ɔwa ɔ yema naŋ tə kənəŋk kɔ ɔ yɔ tȧy təkabanɛ. 9kɔ yifəth kɔ ɛpa ɛgbathi, kɛrɛ ɔ lasianɛ hɛ kɔ. 10Aŋfode abana yi aŋkarmɔkɔ aŋ təmȧ, aŋ gbanthir kɔ yi kagbəli ka ŋaŋ bɛ. 11Ka Hɛrɔd yi aŋtim ŋɔŋ aŋ sai kɔ, aŋ sel kɔ, ka aŋ wɔns kɔ ruma rəkabanɛ, kaŋ kala kɔ ka Paylet. 12Ɔwa ka ȧŋrey ŋati gbeŋ Paylet yi Hɛrɔdȧŋ aŋ manɛ, ȧtesoma-e məputhanɛ mə sa yi kətɔŋ ka ŋaŋ.
13Ka Paylet ɔ thoŋkla aŋfode abana, yi aŋgbəka, yi aŋfəm dɛr rɔkin, 14kɔ pa ro ŋaŋ, Nə po kȧrȧ mi ɔlaŋgba ɔwe mɔ wuni ɔwe yɛthəs aŋfəm; ɔwa kəla, ma i gbɛŋgbɛŋ kɔ rodi ka nu-e, i fir hɛ ro rɔŋɔŋ mȧtȧy məwunɔŋ ama nə gbanthir kɔ. 15Hali ras Hɛrɔdȧŋ, ȧtesoma-e ɔ kȧl somra su kɔ. Ɔwa kəla, ɔ yɔ hɛ tȧy ȧtȧ mə bek tə kəsɔthɔ rəfi. 16Tiyȧŋ i ti sap kɔ, ɔwa i ti ter kɔ. 17(kotȧy-e ɔ ba tə kətera ŋa ukin ka amet.) 18Kɛrɛ ŋa bɛ aŋ sɔŋkɔ yawin-əŋ, aŋ pa, Tɔŋa ɔlaŋgba ɔwe, ɔwa tera su Barabasȧŋ, 19(ɔwe a bot ka ȧŋseth ŋa tərəŋka ta kafak atotok ka kȧpet, dɛ yi ta kadif wuni kəsias). 20Ɔwa Paylet ɔ fɔfȧnɛ ŋa sɔ pəkasifɛ ɔ fela tə kəter Yisɔsȧŋ. 21Kɛrɛ aŋ bȧr sɔŋkɔ aŋ pa, Tȧŋ tȧŋ kɔ ka akənt kəpəŋkinɛ. 22kɔ pa ro rɔŋaŋ ȧŋlɔkɔ aŋa bekȧ məsas, kɔyɛŋ, ko mələs ɔlaŋgba ɔwe mɔ yɔ-e? I fir hɛ akolo abeki dif kɔ; tiyȧŋ i ti sap kɔ, ɔwa i ti ter kɔ. 23Kɛrɛ aŋ kat kənapi yi sim təbɔli rəkɔm aŋ yif kȧmȧ a tȧŋ kɔ ka akənt kəpəŋkinɛ. Ɔwa tapa taŋ tə wopnɛ. 24Ka Paylet ɔ yamari kȧmȧ aŋ yɔ mɔ mə aŋ yema. 25kɔ ter kɔnɔ ɔwe a bot ka ȧŋseth ŋa tərəŋka salata kafak atotok yi kadif wuni kəsias, ɔwe aŋ yema; kɛrɛ ɔ lȧnki Yisɔs ka mayema maŋ.
26Ɔwa maŋ wurɔ kɔ-e, aŋ wop wuni, Saymɔnȧŋ ka ro Sirini, ɔ bɔ wur ro gbaŋ, kaŋ deŋ kɔ akənt kəpəŋkinɛ kȧmȧ ɔ gbanɛ ki rodarəŋ ka Yisɔs.
27Ɔwa, runiya rəbana rə tȧŋ kɔ yi aŋfəm abom aŋa bok ta atɔŋ. 28Kɛrɛ Yisɔsȧŋ ɔ fəlɛ ro ŋaŋ, ɔ pa, Awuth abɛra ŋa Yerusalɛm, te nu bok ta ȧtȧ mi, bok nu ta ȧtȧ nu yi aŋwuth a nu. 29kotȧy-e mȧrey mə tə der ma a tə pa-e, Aŋkoŋfereŋ aŋ yi aruba, yi ator ȧtȧ te kom, yi ȧmȧsȧ ȧme te mȧsər awuth. 30Ȧŋlɔkɔ ŋati aŋ tə təp kəpa ka tȧteŋ təbana, Fumpər su; yi ka tȧteŋ təlɔl, Gbəpsər su. 31Ȧtesoma-e bepi aŋ yɔ mȧtȧy ame ka aŋənt akəli-e, to mə pə yi ka aŋənt awosi-e?
32Aŋ ba sɔ afəm aləs ŋarəŋ aŋa a kera tə kədif yi kɔnɔ. 33Ɔwa maŋ bek ka ɔdɛr ro a bont aŋgbɛŋkət-e, rə a tȧŋ kɔ ka akənt kəpəŋkinɛ, ɔwa aŋfəm aləs ŋarəŋ, ukin ka kȧdiyɔ, ɔlɔm ka kȧmɛrɔ. 34Ka Yisɔsȧŋ ɔ pa, ƆKas kȧmi, tera ŋa ȧtesoma-e aŋ tɛ hɛ ȧte mə aŋ yɔ. Kaŋ fak məthəŋ ta ȧsuma tɔŋ. 35Aŋfəm aŋ təmȧ aŋ tə kəli. Ɔwa aŋgbəka sɔ aŋ sel kɔ, aŋ pa, Ɔ kisis afəm alɔm; ta ɔ kisisnɛ bepi kɔnɔ yi ɔKrayst ka Kuru-e, ɔthith kɔŋ. 36Antim sɔ aŋ sel kɔ; maŋ der ro ŋɔŋ aŋ yema sɔŋ kɔ afinika, 37aŋ pa, Bepi mə yi ɔbȧy kaŋ Yuda-e, kisisnɛ. 38Ɔwa a gbak məgbal rokɔm kɔŋ kəpa, ƆWE Ɔ YI ƆBȦY KA AŊYUDA.
39Ɔwa ukin ka aŋləs ŋarəŋ aŋa a gbak ɔ nal kɔ, ɔ pa, Bepi mə yi ɔKraist-e, kisisnɛ dɛ yi saŋ sɔ. 40Kɛrɛ ɔlɔm ɔ ŋal kɔ, ɔ pa, Mə nesa hɛ Kuru-i, ma mə nənk kəpa mə yi ka mathɛkɛ mati gbeŋ-i? 41Ɔwa pə yi ɔlompi tə kəthalər su ȧtesoma-e saŋ sə sɔthɔ ȧŋrȧm ŋa mȧyɔs ma su, kɛrɛ ɔlaŋgba ɔwe ɔ yɔ hɛ tȧy o tȧy tələs. 42kɔ pa, Yisɔs, Nanɛ mi ma mə bek ka rȧbȧy ra mu. 43kɔ pa ro ŋɔŋ, Tɛntɛnɛ i kanɛ mu, thonɔŋ mə tə yi yi minɛŋ ka ɔdɛr ɔthɔfəl wa Kuru.
44Ɔwa pə yi mɔlɔ ma kagbat tamthərukin ka aŋgbeleŋ, ka asum abana aŋ thor ka ȧŋthɔf bɛ haŋ ka ȧŋlɔkɔ ŋa kagbat tȧmthərɛŋanlɛ ka aŋgbeleŋ. 45Aret rə biyȧ, ka ȧŋkunkla ŋa ȧŋseth ŋa Kuru aŋ gbaya ratɔŋ. 46Ka Yisɔsȧŋ ɔ sel ɛrɔŋ yi rim rəbɔli rəkɔm, ɔ pa, Kas ka mi-e, ka mȧta ma mu i lȧnki aŋesəm a mi. Ma ɔ po pa ȧte-e, ɔ ternɛ. 47Ɔwa ma ɔkaptin ɔ nənk ȧte po yɔnɛ-e, ɔ thɔkəs Kuru, ɔ pa, Tɛntɛnɛ ɔwe-e, wuni lompi wɔŋ. 48Ka ȧsuniya bɛ ȧtȧ thoŋklanɛ tə kənəŋk ȧte-e ma aŋ nənk mȧtȧy ama po yɔnɛ-ɛ, aŋ kȧlanɛ yi kətuŋ ɛkəpət yaŋ. 49Aŋyathki ŋɔŋ bɛ yi aŋfəm abom aŋa tȧŋ kɔ kəwur ro Kalili, aŋ təmȧ ɔbɔli poŋ, aŋ kəli mȧtȧy ame.
50Ɔwa kəla, ulaŋgba a bont Yosɛf-əŋ, ukin ka aŋgbonli, wuni finɔ wɔŋ, ɔwa ulompi, 51(kɔnɔŋ ɔ kasa hɛ ka ȧŋpa yi mayɔ maŋȧŋ), wuni ka ro Arimathia, kəpet ka ro Yuda, ɔwe mə kar rȧbȧy ra Kuru. 52Ɔthem ɔwe ɔ kɔnɛ ka Payletȧŋ, ɔ thola kabel ka Yisɔs. 53kɔ thora kɔ, ɔ rapər kɔ rə kotha kəfera, ɔ bot kɔ rə apali aŋa a lol rə ȧsar ro a te tha la bot wuni. 54Ka pə yi ȧŋrey ŋa kabɛnɛnɛ, ɔwa aŋsabath aŋ fat. 55Aŋfəm abom aŋa paya kɔ kəwur ro Kalili-e, aŋ tȧŋ rodarəŋ, aŋ kəli ȧŋpali, yi to a bot kabel kɔŋ. 56kaŋ kȧlanɛ, aŋ bɛnɛnɛ ɛyɛt ɛfɔlfɔl yi mȧro məsopa.
Ɔwa ka aŋsabath-e aŋ fothanɛ mɔ mə aŋyamari aŋ pa.
Currently Selected:
Luk 23: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
