Luk 22

1Ɔwa amet ma kəbo kəpaŋi ɛgbith mə fat, ama a bont kapainɛ. 2Ka aŋfode abana yi aŋkarmɔkɔ aŋ thɛns roŋ kȧmȧ aŋ dif kɔ, kɛrɛ aŋ nesa aŋfəm. 3Ka Sethani ɔ wɔŋ ka Yudas ɔwe a bont Iskariyɔt, ukin ka aŋtɔfɔt ŋarəŋ. 4kɔ kɔnɛ, ɔ nəŋkanɛ yi aŋfode abana yi aŋkaptin kȧmȧ ɔ lȧnki kɔ ro ŋaŋ. 5Ka pə bɔnɛ ŋa, ɔwa aŋ lahiri tə kəsɔŋ kɔ akala. 6kɔ malanɛ, ɔwa ɔ thɛns roŋ tə kəlaŋkli kɔ ro rɔŋaŋ ma ȧruniya rə te bəpər. 7Ka ȧŋrey ŋa kəbo kəpaŋi ɛgbith aŋ bek, ma a fai kalɔmɛ kəfɛth ka kapainɛ. 8Ɔwa Yisɔsȧŋ ɔ som Pitaŋ yi Yɔnȧŋ, kɔ pa, Kɔnɛ nu nə bɛnɛnɛ ta ȧtȧ su amet ma kapainɛ, kȧmȧ sə di. 9kaŋ pa ro rɔŋɔŋ, Reke mə yema kȧmȧ sə bɛnɛnɛ ti-e? 10kɔ pa, Ma nə wɔŋ ka kapet-e nə tə gbanɛ ulaŋgba ɔwe sara akaro ka mȧnt. Tȧŋ kɔ ka ȧŋseth ro mɔ wɔŋ. 11Ɔwa pa ka ɔwe ba ȧŋseth, Ɔkarmɔkɔ ɔ pa ro mu, Ŋia ȧŋkonko ro mə i di amet ma kapainɛ yi aŋkarande a mi-i? 12Ɔwa ɔ tə tɔri nu ȧkonko abana rokɔm aŋa ba yɛt bɛ; rə mə nə bɛnɛnɛ. 13Ɔwa aŋ kɔnɛ, aŋ bəp ti mɔ mɔ kanɛ ŋa, ka aŋ bɛnɛnɛ amet ma kapainɛ. 14Ɔwa ma ȧŋlɔkɔ aŋ po bek-e, ɔ yirȧ yi aŋsom ŋɔŋ tɔfɔt ŋarəŋ tə kədi. 15kɔ pa ro ŋaŋ, Tə tɛntɛnɛ i po ba afela abana tə kədi amet ma kapainɛ ame yi naŋ yeŋka i nakasi, 16kotȧy-e i kanɛ nu i ba hɛ tə kədi ŋi sɔ haŋ a po lasər ŋi ka rȧbȧy ra Kuru. 17kɔ nɔy ampɔthi, ɔwa ma ɔ po muti məmə-e, ɔ pa, Gbasi ame, nə yerəs ma kətɔŋ ka nu, 18ȧtesoma-e i kanɛ nu, i ba hɛ sɔ kəmun ka mȧkomi ma ralek haŋ rȧbȧy ra Kuru rə bek. 19kɔ gbasi kabo, ɔwa ma ɔ po muti məmə-e, ɔ sim ki, ɔ sɔŋ ŋa, kɔ pa, Ake kə yi aŋdɛr a mi aŋa a sɔŋ ta ȧtȧ nu. Yɔ ȧte rə kənanɛ mi. 20Maŋ po di-e ɔ gbasi ampɔthi, ɔ pa, Ampɔthi aŋe aŋ yi aŋlemranɛ afu ka mȧtir ma mi, ama a loŋ ta ȧtȧ nu. 21Kɛrɛ kəla, kȧta ka kɔnɔ ɔwe mə sɔnd mi kə yi ro mi ka aŋthebəl. 22Tɛntɛnɛ ɔWan ka wuni ɔ kɔnɛ mɔ mə a po gbək ti, kɛrɛ mɔnɛ ka ɔwuni kati ɔwe mə sɔnd kɔ! 23kaŋ təp kəyifəthanɛ kətɔŋ ka ŋaŋ, Kanɛ ba kəre yɔ ȧtȧy ȧte-e?

24Ɔwa agbal sɔ aŋ yi kətɔŋ ka ŋaŋ ta ɔwe mə yi ɔbana thɔŋ bɛ. 25kɔ pa ro rɔŋaŋ, aŋbȧy ŋa tȧbona təlɔm aŋ tə gbəka ŋa, ɔwa ŋaŋ aŋa mə gbəka ŋa a bont ŋa afəm ayɔ ɔfinɔ. 26Kɛrɛ te nu yi yaŋ. Kɔnɔ ɔwe mə yi ubana kətɔŋ ka nu-e, ta ɔ yi mɔ ufɛth; ɔwa kɔnɔ ɔwe yi rȧbomp, ta ɔ yi mɔ ɔwe mə yɔna. 27kotȧy-e, kanɛ tha yi ubana-e, kɔnɔ ɔwe mə yirȧ tə kədi-e, thalɔm kɔnɔ ɔwe mə yɔna kɔ-e? Pə yi hɛ kɔnɔ ɔwe yirȧ tə kədi-e? Kɛrɛ minɛ i yi kətɔŋ ka nu mɔ ɔwe mə yɔna. 28Kɛrɛ naŋ nə yi ŋaŋ aŋ tiyȧ yi minɛ ka ɛgbɔnsanɛ ɛ mi, 29ɔwa i ti sɔŋ nu rȧbȧy mɔ mə ɔKas kȧmi ɔ sɔŋ mi, 30kȧmȧ nə gbəli di, ɔwa nə mun ka aŋthebəl a mi ka rȧbȧy ra mi. Ɔwa nə tə yirȧ rə tawaŋ ta rəbȧy, nə tə thonkas ɛbɔnsɔŋ tɔfɔt yɛrəŋ ya Isrɛl. 31Saymɔn, Saymɔn, Sethani ɔ yema ba mu kȧmȧ ɔ fɛk mu mɔ pəla, 32kɛrɛ i po ramnɛ ta ȧtȧ mu kȧmȧ kȧlanɛ ka mu kə te ranta. Ɔwa ma mə po lafthɛ-e, bȧksər aŋwɔnt a mu. 33kɔ pa ro rɔŋɔŋ, Pa, i po bɛnɛnɛ tə kəpaya mu ka ȧŋseth ŋa tərəŋka yi ka rəfi. 34kɔ pa, Pita, i kanɛ mu, katəpi ɔ tam hɛ thonɔŋ haŋ mə po pɛnsa məsas kəpa mə tɛ hɛ mi.

35kɔ pa ro ŋaŋ, Ma i som nu nə te ba abuthu, thalɔm agbaŋfa, thalɔm ɛkɔftha-e, nə paŋ rəka-i? Ka aŋ lasi, Hali. 36kɔ pa ro ŋaŋ, Kɛrɛ ka-ake, kɔnɔ ɔwe ba abuthu, ta ɔ kera ŋi, yi agbaŋfa sɔ; ɔwa kɔnɔ ɔwe te ba agbathɔ, ta ɔ thila aruma rɔŋ, kȧmȧ ɔ wai ŋin. 37kotȧy-e i kanɛ nu kəpa, ȧte ȧtȧ a gbal-e, a ba kəlasər ti ro rɔmi kəpa, Ɔwa, a kuluŋ kɔ yi aŋfəm aləs; kotȧy-e ȧte a po pa ta ȧtȧ mi-e, tə ba kəgbenthis. 38kaŋ pa, Pa, kəla, ɛgbathɔ yɛrəŋ ɛ yi nɔ. Kɔ pa, Ɔwa ɔbeki.

39kɔ wur, ɔ kɔnɛ ka kateŋ ka Ɔlif mɔ mɔ sa yɔ, ka aŋkarande ŋɔŋ aŋ paya kɔ. 40Ɔwa ma ɔ bek ka ɔdɛr-e, ɔ pa ro rɔŋaŋ, Ramnɛ kȧmȧ nə te wɔŋ rə tȧy təgbɔns. 41kɔ bɔlȧnɛ ŋa mɔlɔ ma kəlɔm ȧsar, ɔ sɔ təwu, ɔ ramnɛ, 42ɔ pa, Pa, bepi mə selɔ-e, tɔŋa ampɔthi aŋe ro mi, kɛrɛ ta pə te yi mȧselɔ ma mi, kɛrɛ ama mu mə yɔnɛ. 43Ɔwa wurɔ kəwur ro riyana ɔ der ro rɔŋɔŋ, ɔ bȧkəs kɔ mədɛr. 44Ɔwa ma ɔ yi ka anakasi abana-e ɔ ramnɛ thuŋ, ɔwa mȧranɛ mɔŋ mə path mɔ ɛbȧlək ya mȧtir mə fumpɔ ro thɔf. 45Ma ɔ yokanɛ ka karamnɛ kɔŋ-e, ɔ kɔ ka aŋkarande ŋɔŋ, kɔ bəp ŋa aŋ dirȧ ta ɔnɔsinɛ. 46kɔ pa ro ŋaŋ, kɔyɛŋ nə dirȧ-e? Yokanɛ nu nə ramnɛ kȧmȧ nə te wɔŋ rə tȧy ta məgbɔns.

47Mɔ mɔ fɔf ras-e, kəla, runiya rə der, ɔwa, ɔwe a bont Yudasȧŋ, ukin ka aŋtɔfɔt ŋarəŋ ɔ təmȧ ŋa kədi, kɔ fatər Yisɔsȧŋ tə kəmuməl kɔ. 48Kɛrɛ Yisɔsȧŋ ɔ pa ro ŋɔŋ, Yudas, mə sɔnd ɔWan ka wuni yi kəmuməl-i? 49Ma aŋkarande ŋɔŋ aŋ nənk ȧte mə yɔnɛ-e, aŋ pa ro ŋɔŋ, Pa, sə tapa aŋgbathɔ-i? 50Ka ukin ka ŋaŋ ɔ tap ȧŋbɔy ŋa ɔfode ubana, kɔ gbək aŋləns ŋɔŋ ȧdiyɔ. 51Ka Yisɔsȧŋ ɔ pa, Ɔbeki thɔŋ. Kɔ gboŋ aŋləns ŋɔŋ, ɔ yenkəs kɔ. 52Ka Yisɔsȧŋ ɔ pa ka aŋkərbomp ta aŋfode yi aŋkaptin ka ȧŋseth ŋa Kuru, yi aŋbȧki aŋa der ro ŋɔŋ, Nə der mɔ nə re tȧŋ ukei, yi ɛgbathɔ yi təgbeŋgbeŋ-i? 53Ma i yi ro rɔnu ȧrey o rei ka ȧŋseth ŋa Kuru-e, nə thanthi hɛ mȧta ma nu tə kəwop mi. Kɛrɛ ȧŋlɔkɔ a nu ŋi aŋe yi aŋfɔsɔ ŋa ȧŋsum.

54kaŋ wop kɔ, aŋ kera kɔ ka ȧŋseth ŋa ɔfode ubana, kɛrɛ Pitaŋ ɔ tȧŋ kɔ ɔbɔli poŋ. 55Ɔwa maŋ po tɔlər nȧnt rokaŋ ratɔŋ-e, ŋa bɛ aŋ yirȧ ri, ɔwa Pita ɔ yirȧ kətɔŋ ka ŋaŋ. 56Ka ȧbɔy ubɛra ulɔm ɔ nənk kɔ mɔ mɔ yirȧ ka anant rayɛr, ɔ kəli kɔ təŋ, kɔ pa, Ɔlaŋgba ɔwe sɔ ɔ la yi yi kɔnɔ. 57Pitaŋ ɔ pɛnsa ɔ pa, Wath bɛra i tɛ hɛ kɔ. 58Ɔwa pə won hɛ ulɔm ɔ kȧl nənk kɔ, ɔ pa, Munɔ sɔ mə yi ukin ka ŋaŋ. Pitaŋ ɔ pa, Wan, min thahɔ. 59Kədarəŋ kati pə təp gbo won ɔthan-e, ulɔm ɔ bȧksər ti, ɔ pa, Ka təteŋ ɔlaŋgba ɔwe sɔ ɔ la yi yi kɔnɔ, kotȧy-e uKalili wɔŋ. 60Ɔwa Pitaŋ ɔ pa, Mbɔ, i tɛ hɛ ȧte mə pa. Ka ɔlɛmp wati mɔ mɔ fɔf-e, katəpi ɔ tam. 61Ka ɔMarki ɔ fəlɛ, ɔ kəli Pitaŋ. Ɔwa Pita ɔ kala ȧmerȧ ka ȧrim ra ɔMarki ma ɔ pa ro rɔŋɔŋ, Yeŋka katəpi ɔ tam thonɔŋ mə tə pɛnsa mi məsas. 62kɔ wur, ɔ bok ɔbaŋ.

63Ka aŋlaŋgba aŋa wop Yisɔsȧŋ aŋ sel kɔ, ɔwa aŋ gbantha kɔ. 64Ɔwa maŋ po gbəpər ɛfɔr yɔŋ-e, aŋ gbantha kɔ ro der, aŋ pa, Tɔri su ba, kanɛ gbantha mu-e? 65Ɔwa tȧy təgbȧthi təlɔm tə aŋ fɔf ta atɔŋ tə kəsambos kɔ.

66Ɔwa ma pə sɔk-e, aŋgbanɛ ŋa aŋbȧki ŋa aŋfəm aŋ thoŋklanɛ rɔkin, aŋfode abana-o yi aŋkarmɔkɔ, ka aŋ kera kɔ ka aŋnəŋkanɛ ŋaŋ, aŋ pa, 67Bepi munɔ mə yi ɔKraist-e, kanɛ su. Kɛrɛ kɔnɔ ɔ pa ro ŋaŋ, Bepi i kanɛ nu-e nə lanɛ hɛ. 68Ɔwa bepi i yif nu-e, nə selɔ hɛ tə kəgbakia mi. 69Kɛrɛ kətəp ka ȧŋlɔkɔ aŋe ɔWan ka wuni ɔ tə yirȧ ka kȧta kədiɔ ka aŋfɔsɔ ŋa Kuru. 70Ka ŋa bɛ aŋ pa, Mə yi hɔ ɔWan ka Kuru-i? kɔ pa ro rɔŋaŋ, Pə yi mɔ mə nə pa-e, minɛŋ. 71kaŋ pa, Ko məseri məlɔm sɔ mə sə yema-e? Ȧtesoma-e saŋ sə po təl ka kȧsəŋ kɔŋ gbeŋ.

Currently Selected:

Luk 22: TMNNT

Highlight

Copy