LUKI 21

Na Ponyahɛi I Feni Ngewɔ Wɛ

(Mak 12.41-44)

1Yesu i yaama jiɛilɔ fahii ma, i kpatɛblaa gboto lɔ ta navoei wu kaŋaai na hu i yɛ Ngewɔ Wɛlei bu. 2I ponyaha vɛlingɔ yila bɛɛ lɔilɔ i sɛnti fele gula hu. 3Kɛ i ndenga yɛ, “Gbɛɛ ngi hugɛ a wue, navoei na ponyaha vɛlingɔi i feni i leweni numui gbi ti ndɛi ma. 4Gbamaile na kpatɛbleisia tii yɛ gbeweni fa tamia ti kpuani ti gbatei ma ti fe; kɛɛ ta, kia bɛɛ ngi vɛlingɔ i na kpɛlɛɛ lɔ veni i yɛ ngi yeya mɛva.”

Yesu Lɔ Ngewɔ Wɛlei Nyanila Hugɛma

(Mat 24.1-2; Mak 13.1-2)

5Yesu gaalopoisia lɛɛnga ti yɛlɔ a yɛpɛ kɔloongɔ Ngewɔ Wɛlei ma, ta ngi nyandelaa batu kɛɛ kɔtu nyandenyandei nasia ti toni la kɛɛ hani nasia nungaa ti yɛ fe Ngewɔ va. 6I ndeilɔ yɛ, “Hani jisia wu tɔma, watii a hitilɔ kɔtu yakpe bɛɛ ɛɛ lo laani mbei ngi mbaa mahu; ta ti kpɛlɛɛ wololɔ ti ti gula.”

Juwuyei Kɛɛ Ngakpɛ Nyamui

(Mat 24.3-14; Mak 13.3-13)

7Ti ngi mɔlilɔ tɛɛ, “Kaamɔ, migbe lɔ ji a wie tawao gbɔɔ a yɛ a tɔmaseli kɛva kɛ ngi wielei i hitinga ma?”

8Kɛ Yesu i ndenga yɛ, “A wu mahugbe ta wu yaka; ajifa numu gboto ta walɔ nya biyei i ti ma, ta nde tɛɛ ‘Tamia a nge! Watii i lukpenga kpla!’ Waa hitɛ ti wooma. 9Tawao wu kɔisia malɔwɔ mɛningaa kɛɛ ji nungaa ta ganga a ti gɔmɛtisia, waa luwa; ajifa hindei jisia ta wielɔ pɛiŋ, kɛɛ tii kɛni kɛ kɛlɛmɛi lɔ na kpla.”

10I liilɔ gulɔma a ngi yɛpɛi yɛ, “Kɛnyɛisia ta gɔlɔ a ti nyɔunyɔ, mahawuisia ta gɔ luahu; 11ndɔlei a gbɛlilɔ hulewengɔ hinda gboto, tawao ndɔlei a walɔ kɛɛ pilipili-heegbɛisia hinda gboto; tawao hinda maluwangɔngaa kɛɛ tɔmaseli wawangaa ta yɛlɔ na ta gbua ngelei ma. 12Kɛɛ pɛiŋ hindei jisia kpɛlɛɛ ti ya wie, ta loko lalɔ wu ma, ti wu yakpɛ a nyamu, ti wu ve hɛɛ wɛleisia yeekulɔblɛisia wɛ kɛɛ kpindiwɛleisia, tawao ta walɔ a wue maha wawangaa gulɔ kɛɛ tokuloisia nya biyei va. 13Ji a yɛ a watii lɔ wa gu a Ngowili Yekpei lela. 14#Luk 12.11-12 Faale i lo kulɔma wu hugbatɛ nɛmahu aako wu lii aa hɛlɛ wa yee wua yekpe magao Kotii hu. 15Ajifa nga nɛmahulewe yɛpɛngaa wulɔ wu la wu juwuisia tɛɛ gu a lola kulɔ ɔɔ ti hou a mawali. 16Wu lebleisia kɛɛ wu ndewehingeisia kɛɛ wu lenyamusia kɛɛ wu ndiamɔisia ta wu velɔ, tawao ta wu lɛɛnga waalɔ; 17Numui gbi ta lololɔ a wue nya va. 18Kɛɛ wu wundiei yeengila bɛɛ ɛɛ jukulu. 19A lo kpaŋ, ajifa ndiiloi na wa pie ta lɔ a pie wu kunafɔ lɛɛvui majɔɔ.

Yesu Lɔ Jelusalɛm Wololei Hugɛma

(Mat 24.15-21; Mak 13.14-19)

20“Kɛɛ wu tɔngaa kɔi i Jelusalɛm galanga, a kɔɔ na kɛ ngi wololei i lalanga kpla. 21Na wiengaa, nungei nasia ti Judia ti wila ti lɛ ngiyeisia hu, nasia ti Jelusalɛm goohu ti gbua na, tawao nasia ti tateisia hu taa wa yeetei ji hu; 22#Hos 9.7 ajifa watii na mia Ngewɔ a kpalɛ la Isrɛlbleisia ma ti jumbuisia va aako na Ngewɔ Gɔlɛi i ndeni i wie. 23A yɛ nyamuni kpa a watii na koonyahangɛisia va kɛɛ koimɛisia! Ajifa ndiimɔnɛ wa a yɛlɔ dunyei hu tawao Ngewɔ liilewengɔ a yɛla nungei jisia ma; 24ta ti lɛɛnga waalɔ a kɔbowei, ti yeepekeisia hou a kɔhoungaa, ti ti vayafaya kɛnyɛisia kpɛlɛɛ hu; kɛnyɛblaa wekangaa tii Ngewɔ gɔɔ ta Jelusalɛm niwaniwalɔ ti gɔwɔbu haaŋ i to yeekɛnyɛisia ti watii gbɔyɔ-gbelei ma.

Nuuvu Hindoloi Walei

(Mat 24.29-31; Mak 13.24-27)

25 # Ais 13.10 “Tɔmaselingaa ta gɛlɔ foloi ma kɛɛ ngalui kɛɛ tumbekeisia, tawao kɛnyɛisia ti dunyei hu ti lii a nyanilɔ, ti wuhu bangɔ gboyei goondowoi va kɛɛ njagateisia, 26nungaa ta wulɔ ma a nduwɛi a ji ta yɛ na mawulo ma i wama dunyei gbi mahu, ajifa kpayei nasia ti ngelei ma ta gbualɔ ti jia-weleisia ma. 27#Dan 7.13 Na wiengaa, kɛ ti Nuuvu Hindoloi lɔnga a wa ngelei ma a kpaya wa kɛɛ temaya. 28Hindei jisia ti tɔtongaa a wiela, a hiye wu lo, wu wu wuisia wumbu wu ngeleya gbe, ajifa wu Bawolei mia i lukpema kpla.”

Kaai Na Figi Wulii I Kɛni

(Mat 24.32-35; Mak 13.28-31)

29Kɛ i sale yila heinga ti ma yɛ, “A gili lɛɛ a figi wulii kɛɛ ngulu wekeisia gbi; 30wu tɔngaa lekee ta ndawa gbua, wa kɔɔlɔ kɛ hamɛi ma i gutunga. 31Hii lɔɔ i na, wu hindei jisia lɔnga ta wie, wa kɔɔlɔ kɛ Ngewɔ Mahayɛi ma i gutunga.

32“I yɛ wu nɛmahu kɛ hindei jisia ta wie pɛiŋ nungei nasia ti vulungɔ kiahuna ti ya gbɔyɔ a haala. 33Aijɛnɛ tia dunyei ta gbɔyɔlɔ kɛɛ nya layiesia ti hu ɛɛ nyani kunafɔ.

Yesu Yɛ Nungaa Ti Valangɔ I Yɛla

34“Kɛɛ a wu mahugbe waa wua yekpe ve mɛhɛɛ-mɛ-gomɛnga wɛ kɛɛ ndɔ gbolila hulewengɔ kɛɛ ndɛvui ji yeendiihɛlɛ mahindeisia aako watii na aa wa wu lii gbi ii ma kia numu a gɔwɔ a mani. 35Gbamaile foloi na a gbualɔ numui gbi ma ti heini dunyei yeehinda gbi. 36Faale wu valangɔ i yɛla kpelema gbi, wa hɛɛ Ngewɔ ma aako wu kaahu majɔɔ hindei jisia gbi huvova kɛɛ lova Nuuvu Hindoloi gulɔ ji a wa.”

37Hokii na hu Yesu i yɛ luva nungaa gaama Ngewɔ Wɛlei bu, kɛɛ kpɔkɔ i wɛlɛngaa wɔɔ, i yɛ li Ɔlivi Yiyei hu lɔ a yii na. 38Ngele i wongaa wɔɔ, numui gbi ti yɛ humbulɔ Ngewɔ Wɛlei bu wolova ngi ma.

Currently Selected:

LUKI 21: MENNT

Highlight

Copy