JONA 4
4
Jona Liilewɛi kɛ Ngewɔ Manumɛi
1Kɛɛ ji i Jona lii nyaniilɔ wa, kɛ ngi liilewenga. 2I hɛilɔ Ndemɔi gama kɛ i ndenga yɛɛ, “O Ndemɔi! Ji ii le ngi yɛ ndeni, kpelemei na ngi yɛ nya lɔɔlei hu? Na vamia ngi welani, ngi lini Tasisi ye haalayɛi ma; gbamaile ngi kɔɔlɔ kɛ bi yɛni a ngauwanda kɛ manuma Yewɔ lɔ, bi lii ɛɛ lewe fulo, tawao bi hinda yekpengɔ wa, tawao bi magbatɛngɔi manuma ngɛɛ va. 3Fale naa, O Ndemɔi, ndae le nya lɛvui wumbu, ajifa nyandengɔ nya va kɔ ngi haa, kia nga yɛ ndɛvuhu.” 4Kɛ Ndemɔi i ngi ndenga yɛ, “Kpenkpengɔi bi va kɔ bi lii i lewe?” 5Na wooma Jona i gbuailɔ ye ta wai hu, kɛ i heinga a ye ta wai gɔyaka wee kɛ i bafa wɛlɛnga na tayekpe va. I heilɔ ye ndɛndɛli bu, kɔ i tɔ gbɔ a wie a ye ta wai na.
6Ndemɔi Ngewɔ i pielɔ ndɛndɛve wuluwo i gbua kɛ i vombonga Jona mahu, kɔ i ndɛndɛli ve ngi wɛ, kɔ i ngi gbua ngi lii mɔnɛi hu; fale Jona gohunɛilɔ waa yɛla ye ndɛndɛve wuluwo na va. 7Kɛɛ ji ngelei i woni, Ngewɔ pielɔ kpolii i wu ndɛndɛve wuluwo na hu, kɛ i lulanga. 8Ji foloi i yɛ hiyeni, Ngewɔ i pielɔ fɛfɛ gbandi i hiye a kɔyaka wee; kɛ foloi i Jona wumba gbandinga, kɛ i wunga ma; kɛ i mɔlinga kɔɔ i haa. I ndeilɔ yɛ, “Aa fisalɔ nya va ngi haa i lewe nya vulungɔi ma.”
9Kɛɛ Ngewɔ i ndeilɔ Jona ma yɛ, “Mahoungɔi bi lii i lewe ndɛndɛve wuluwo va?” Kɛ i ndengaa yɛ, “Aa, mahoungɔ vuli nya lii i lewe, ngi haa.” 10Na wooma Ndemɔi ndeilɔ yɛ, “Bi ndɛndɛve wuluwo mamamanu lɔnga, na bii mɔnɛni ma, tawao bia ii le baa pie aa vale; i gbuani a kpindii yakpe lɔ, tawao i lulanga a kpindii yakpe. 11Kɛ nya, maiihouni ngi manu Ninivɛ ma, ta wai na, miando nungaa ti lewengɔ taosin hɔndɔ yila kalɛ nuu gbɔyɔngɔ ma, nasia tii ti yejei luahu gɔɔ a ti gɔwɔi, kɛ gbɔma tohani gbotongaa?”
Currently Selected:
JONA 4: RMB
Highlight
Share
Copy
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.
