JONA 3
3
Jona Golonga Ndemɔi wɛ
1Ndemɔi layɛi wailɔ Jona gama, heima ye felei, yɛ, 2“Hiye, bi li Ninivɛ, ta wai na, tawao bi ngowili na le ti ma, nga nde bi ma.” 3Fale Jona hiyeilɔ kɛ i linga Ninivɛ, kia Ndemɔi i ndeni la. Kiahuna naa Ninivɛ yɛni a ta wai lɔ yɛla, folo sawa jia kinɛŋ mblava ndia. 4Jona tatoilɔ a lila ye ta wai hu, folo yila jia. Kɛ i wɔlɔnga ngeleya yɛ, “Njii nuu fele gbɔyɔngɔ wooma, Ninivɛ a jukuulɔ.” 5Kɛ Ninivɛ nungeisia ti langa a Ngewɔ; ti suhou he lai lɔ, kɛ numu gbi lekee, ye sɛmbɛ kɛ ye kulowo, ti ngɔlɔ gula yililɔ.
6Ji ye vei i fooni Ninivɛ mahei ma, i hiyeilɔ ngi maha heimɛi, i ngi maha lomɛi gbua, kɛ i ngɔlɔ gula yilinga, kɛ i heinga nduvui hu. 7Na wooma i pielɔ ti nda a he Ninivɛ hu: “Kia mahei kɛ ngi gblanga gbakoisia ti ndeni la: Numu vulu ɔɔ hua ɔɔ nikangaa ɔɔ mbalangaa gbi taa hani gbi gɔɔ. Taa mɛhɛɛ mɛ, tawao taa nja gbɔle. 8Numu vulunga kɛ huanga ta ngɔlɔ gulanga yililɔ, tawao ti wɔlɔ ngeleya Ngewɔ gama. Tawao ti kpɛlɛɛ ti wote ti hinda nyamuisia ma tawao ti loko gbua kpundɛ gulalɛisia hu. 9Ye lɔ kɔɔngɔ? Kɛnga Ngewɔ a ngi nɛmahui wotelɔ; a wotelɔ ngi liilewe wai ma, kɔ wɔi maa jukuu.”
10Ji Ngewɔ i tɔni na ti pienga, kia ti wotenga ti hinda nyamuisia ma, Ngewɔ i ngi nɛmahui woteilɔ kpundɛi na ma i yɛ ndeni yɛ a wala ti mahu; tawao ii pieni.
Currently Selected:
JONA 3: RMB
Highlight
Share
Copy
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.
