JONA 2
2
Jona Hɛi
1Na wooma Jona hɛilɔ Ndemɔi ngi Yewɔi ma nyɛin gohu, 2yɛ,
“Ngi Ndemɔi lolilɔ nya liimɔnɛi hu,
kɛ i lumanga nya woi bu;
ngi yele gulailɔ haa gohu,
kɛ bi nya woi mɛninga.
3Bi nya wililɔ njɛi ye susumɛi
gboyɛisia lia,
kɛ njavɛi i nya galanga;
bi vomboisia kɛ bi yagateisia gbi ti
leweilɔ nya mahu.
4Na wooma ngi ndeilɔ ngɛɛ, ‘Nya gbuangɔe
bi yama;
nga yee bi gayema wɛlɛi
gbee gbɔma?’
5Njei i nya magbɔleilɔ suɛ;
palii i nya galanga;
kpitiisia ti bembengɔ yɛla nya wumba
6ngiyei hapisia bu.
Ngi yeilɔ ndɔlɛi ma
nasia ti lamɛisia ti gbɔwuni nya ma kunafɔ va;
na hu gbi bi nya lɛvui gbuailɔ Ndɔwɛi hu,
O Ndemɔi, nya Yewɔi.
7Kia ngi yɛ haa ma,
Ngi ngililɔ a Ndemɔi;
kɛ nya hɛwoi fonga bi ma,
bi gayema wɛlɛi bu.
8Nasia ta ndɛ yewɔisia vɛli
ti wovenga ti lɔnya goloyɛi ma.
9Kɛɛ nya a nya jiɛgbualɛi
nga saagbuailɔ bi gama;
na ngi lahedi wumbunga fa nga felo.
Mbawoyei a hiye Ndemɔi gama lɔ!”
10Na wooma Ndemɔi yɛpɛilɔ nyɛi gama, kɛ i balinga a Jona kakpoi ya.
Currently Selected:
JONA 2: RMB
Highlight
Share
Copy
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.
