Mak 8
8
Jizɔs Fid Pas Fo Tawzin Pipul
(Matyu 15:32-39)
1Wan ɔda tɛm, plɛnti pipul bin go gɛda rawnd Jizɔs. Dɛn nɔ bin gɛt natin fɔ it. Jizɔs kɔl in lanin bɔy dɛn ɛn tɛl dɛn se, 2“A sɔri fɔ dɛn pipul ya bikɔs dɛn dɔn de wit wi tri de ɛn dɛn nɔ gɛt natin fɔ it; 3if a tɛl dɛn fɔ go na dɛn os wit aŋri bɛlɛ, sɔntɛm dɛn go fent na rod, bikɔs plɛnti kɔmɔt fawe.”
4Di lanin bɔy dɛn aks Jizɔs se, “Wetin wi go gi dɛn fɔ it, wi nɔ gɛt bred na dɛzat lɛkɛ dis.”
5Jizɔs aks dɛn se, “Ɔmɔs bred una gɛt?”
Dɛn ansa se, “Wi gɛt sɛvin lof bred, sa!”
6Jizɔs tɛl ɔl di pipul dɛn fɔ sidɔm na grɔn, i tek di sɛvin bred, wɛn i dɔn tɛl Gɔd tɛnki, i kɔt kɔt dɛn ɛn gi di lanin bɔy dɛn fɔ sheb gi di pipul dɛn. Di lanin bɔy dɛn gi di pipul dɛn. 7Dɛn bin gɛt tu-tri lili fish sɛf. Jizɔs pre pan di fish ɛn mek di lanin bɔy dɛn sheb am gi di pipul dɛn. 8Ɔlman it te dɛn bɛlful, ɛn wɛn di lanin bɔy dɛn dɔn gɛda wetin lɛf, dɛn gɛt sɛvin ful blay. 9Na bɔt fo tawzin pipul bin lib de. 10We Jizɔs dɔn mek ɔlman go na dɛn os, in ɛn in lanin bɔy dɛn tek bot go Dalmanuta.
Di Faresi dɛn Want Mek Jizɔs Du Wɔndaful Wok
(Matyu 16:1-4)
11Sɔm pan di Faresi dɛn go mit Jizɔs ɛn bigin agyu wit am. Dɛn kam fɔ tray am so dɛn aks am fɔ du wɔndaful wok we go sho se in na di Mɛsaya. 12Jizɔs pini ɛn aks dɛn se, “Wetin mek una dɛn tide pipul ya want mek a sho una mɔ sayn? A de tɛl una fɔ tru se a nɔ go sho una ɛni sayn.”
13Jizɔs ɛn in lanin bɔy dɛn lɛf di pipul dɛn ɛn tek bot krɔs go oba na di ɔda say.
Una Tek Tɛm wit di Faresi dɛn Yist ɛn wit Ɛrɔd Yon
(Matyu 16:5-12)
14Dɛn bin fɔgɛt fɔ kɛr plɛnti bred, na wangren bred nɔmɔ dɛn bin gɛt na di bot. 15Wɛn dɛn de go, Jizɔs wɔn dɛn. I se, “Una tek tɛm wit di yist we di Faresi dɛn ɛn Ɛrɔd de yus.”
16Di lanin bɔy dɛn bigin tɔk to dɛn kɔmpin se, “Na bikɔs wi nɔ briŋ bred mek i tɔk so!”
17Jizɔs bin no wetin dɛn de tɔk, so i aks dɛn se, “Wetin du una de tɔk se una nɔ gɛt bred? Una nɔ ɔndastand yet? Una at nɔ opin? 18Una gɛt yay, una nɔ de si? Una gɛt yes, una nɔ de yɛri? Una nɔ mɛmba 19we a bin kɔt kɔt dɛn fayv bred fɔ gi fayv tawzin pipul? Ɔmɔs ful blay bred bin lɛf?”
Dɛn ansa se, “Na bin twɛlv blay, sa!”
20Jizɔs tɔk igen se, “Ɛn we a bin kɔt kɔt sɛvin bred fɔ gi fo tawzin pipul, ɔmɔs ful blay bred una bin gɛda?”
Dɛn ansa se, “Na bin sɛvin blay, sa!”
21Jizɔs aks dɛn se, “Pan ɔl dat, una nɔ ɔndastand yet?”
Jizɔs Mɛn Wan Blɛnyay Man na Bɛtsayda
22Wɛn dɛn rich Bɛtsayda, sɔm pipul kɛr wan blɛnyay man go to Jizɔs. 23Jizɔs ol di blɛnyay man in an, i waka wit di man kɔmɔt na di vilej. I pit pan di man in tu yay, dɔn i tɔch dɛn. I aks am se, “Yu si ɛnitin?”
24Di man luk, i se, “Yɛs, sa, a si sɔm pipul de waka, bɔt dɛn tan lɛkɛ tik we de waka.”
25Jizɔs tɔch di man in yay igen. Di man ebul si gud, i bigin si ɔltin klia wan. 26Jizɔs se, “Go na yu os, bɔt nɔ go bak na di vilej yet!”
Pita Tɔk Udat na Jizɔs
(Matyu 16:13-20; Lyuk 9:18-21)
27Jizɔs ɛn in lanin bɔy dɛn go na di vilej dɛn we de na Sizaria Fili pay. Wɛn dɛn de na rod de go, Jizɔs aks di lanin bɔy dɛn se, “Wetin pipul de tɔk bɔt mi, udat dɛn se a bi?”
28Sɔm pan di lanin bɔy dɛn se, “Sɔm pipul se yu na Jɔn we bin de baptayz pipul; sɔm se yu na Ilayja, ɛn sɔm ɔda wan dɛn se yu na wan pan dɛn prɔfɛt we bin de lɔntɛm.”
29Jizɔs aks dɛn se, “Bɔt udat una se a bi?”
Pita ansa se, “Yu na di Mɛsaya, dat na di wan we Gɔd dɔn pik!”
30I wɔn dɛn mek dɛn nɔ tɛl ɛnibɔdi se in na di wan we Gɔd dɔn pik.
Jizɔs Tɔk bɔt Aw I Go Sɔfa ɛn Day
(Matyu 16:21-28; Lyuk 9:22-27)
31I tɛl dɛn se, “Mɔtalman Pikin go sɔfa plɛnti. Di Ju bigman dɛn, di bigman dɛn we de mek sakrifays fɔ pipul sin, ɛn di Ju Lɔ ticha dɛn go se dɛn nɔ no am ɛn dɛn go kil am. I go de na di grev, bɔt i go rayz di de we mek tri.” 32Jizɔs tɔk am plen wan, Pita kɔl Jizɔs na kɔna ɛn se, “Masta, nɔ tɔk lɛkɛ dat!” 33Jizɔs luk di lanin bɔy dɛn, i tɔk to Pita, i se, “Pita, kɔmɔt biɛn mi, na Setan in wok yu de du so! Yu de tink lɛkɛ aw mɔtalman de tink, yu nɔ de tink lɛkɛ aw Gɔd de tink.”
34Jizɔs kɔl di pipul dɛn ɛn in lanin bɔy dɛn; i tɛl dɛn se, “If ɛnibɔdi want bi mi lanin bɔy, di pɔsin nɔ fɔ du wetin in want fɔ du nɔmɔ, i fɔ rɛdi fɔ sɔfa ɛn day fɔseka mi, ɛn du ɔl wetin a de du. 35Ɛnibɔdi we de tray fɔ sev in layf, go lɔs am; bɔt ɛnibɔdi we lɔs in layf fɔseka mi ɛn di Gud Nyuz, go gɛt di tru layf. 36Wetin pɔsin go gen if i gɛt di ol wɔl, ɛn day go ɛl ɛn lɔs di tru layf? Natin! 37Wetin pɔsin go gi fɔ gɛt in layf bak? Natin! 38If ɛnibɔdi de shem fɔ tɔk bɔt mi ɛn wetin a dɔn lan am, tɛm lɛkɛ dis we pipul nɔ biliv Gɔd ɛn dɛn wikɛd, Mɔtalman Pikin go shem fɔ da pɔsin de wɛn i kam lɛkɛ Kiŋ ɛn layt we kɔmɔt ɛvin de shayn pan am wit di enjɛl dɛn; di sem layt we de shayn pan in Papa Gɔd.”
Currently Selected:
Mak 8: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
