Mak 7

Wetin dɛn Bin de Lan Pipul frɔm Tɛm

(Matyu 15:1-9)

1Sɔm Faresi dɛn ɛn dɛn Ju Lɔ ticha we kɔmɔt Jerusɛlɛm go mit Jizɔs. 2Dɛn si Jizɔs in lanin bɔy dɛn de it wit dɛn an we nɔ klin, dat min se dɛn nɔ bin was dɛn lɛkɛ aw di Faresi dɛn se, fɔ mek dɛn klin na Gɔd yay.

( 3Di Faresi dɛn ɛn ɔl di ɔda Ju dɛn nɔ de it pas dɛn was dɛn an di spɛshal we we dɛn grampapa papa dɛn bin lan dɛn yon Ju pipul fɔ du; 4ɛn wɛn dɛn bay tin na makit, dɛn nɔba it am pas dɛn was am spɛshal we; dɛn bin de du plɛnti ɔda tin we dɛn grampapa papa dɛn bin lan dɛn yon Ju pipul fɔ du, lɛkɛ fɔ was kɔp, pɔt ɛn plet ɛn fɔ wep bed spɛshal we.)

5Di Faresi dɛn ɛn di Ju Lɔ ticha dɛn aks Jizɔs se, “Wetin du yu lanin bɔy dɛn nɔ de du lɛkɛ aw wi grampapa papa dɛn lan wi? Wetin du dɛn nɔ de was dɛn an di spɛshal we bifo dɛn it?”

6Jizɔs ansa se, “Na tru da lɔntɛm prɔfɛt we nem Ayzaya bin tɔk bɔt una wɛn i rayt se,

‘Gɔd se, dɛn pipul ya rɛspɛkt mi wit dɛn mɔt,

bɔt dɛn nɔ want du wetin a tɛl dɛn fɔ du, bikɔs dɛn at nɔ de fɔ mi.

7Di pre we dɛn de pre to mi nɔ min natin,

bikɔs dɛn de lan pipul dɛn lɔ we nɔto mi yon!’”

8Jizɔs se, “Una dɔn tap fɔ du wetin Gɔd tɛl mɔtalman fɔ du, ɛn una de du ɔl wetin mɔtalman tɛl una fɔ du.”

9I tɔk igen se, “Una tink se una gɛt sɛns we una nɔ tek wetin Gɔd tɛl una fɔ du mek natin ɛn una jɛs de du wetin una grampapa papa dɛn bin tɛl una yon Ju pipul dɛn fɔ du! 10Mozis bin se, ‘Una fɔ rɛspɛkt una mama ɛn papa; ɛn dɛn fɔ kil ɛnibɔdi we tɔk bad bɔt in mama ɔ in papa.’ 11Bɔt una se if pɔsin gɛt tin fɔ gi in papa ɔ in mama we go ɛp dɛn, bɔt di pɔsin se, ‘Dis na Kɔban’ (dat min, a dɔn prɔmis fɔ gi Gɔd dis tin ya), 12una se da pɔsin de nɔ gɛt fɔ gi in mama ɔ in papa di tin we bin go ɛp dɛn. 13Dat sho se una dɔn lɛf fɔ du wetin Gɔd se, ɛn una jɛs de du dɛn tin we una grampapa papa dɛn lan una yon Ju pipul fɔ du, ɛn una de lan una pikin dɛn dɛn sem tin de. Una de du plɛnti ɔda tin dɛn lɛkɛ dɛn wan ya.”

Dɛn Tin we de Mek Pɔsin Nɔ Klin na Gɔd Yay

(Matyu 15:10-20)

14Jizɔs kɔl di pipul dɛn bak ɛn se, “A want mek una ɔl lisin mi gud, so dat una go lan. 15Una fɔ no se, nɔto wetin pɔsin de it de mek i sin, bɔt na wetin i de du ɛn wetin i de tɔk de mek i sin ɛn mek i nɔ klin na Gɔd yay. [ 16Udat gɛt yes fɔ yɛri, mek i yɛri.]”

17We Jizɔs lɛf di pipul dɛn ɛn go insay di os, in lanin bɔy dɛn go mit am ɛn aks am wetin di parebul min. 18Jizɔs aks dɛn se, “Una nɔ ɔndastand wetin a tɔk? Nɔto wetin pɔsin de it de mek in at nɔ klin, 19bikɔs di tin we pɔsin de it nɔ de go nain at, nain bɛlɛ i de go, bifo i pul am kɔmɔt na di bɔdi.” (Wɛn Jizɔs tɔk dat, i sho se wi kin it ɛnitin we fɔ it.)

20I tɔk igen se, “Wetin pɔsin de tɔk de kɔmɔt insay in at, na dat de mek di pɔsin nɔ klin na Gɔd yay. 21Na di at de mek pɔsin mekɔp fɔ du bad, fɔ liv fri layf, fɔ tif, fɔ kil, 22fɔ kip ɔda pɔsin wɛf ɔ man, fɔ put yay pan ɔda pɔsin prɔpati, fɔ du ɛni kayn bad, fɔ mek pipul ful, fɔ pwɛl in kɔmpin nem, fɔ mek prawd, ɛn fɔ du fulish tin. 23Na ɔl dɛn bad tin ya de kɔmɔt insay pɔsin in at ɛn na dɛn de mek pɔsin sin.”

Di Uman we Biliv

(Matyu 15:21-28)

24Wɛn Jizɔs kɔmɔt de, i go na wan ples we de klos Taya. I nɔ bin want mek ɛnibɔdi no di os we i de, bɔt di pipul dɛn fɛnɔt usay i de. 25Wan uman bin lib de we dɛbul bin de insay in gyal pikin. Wɛn i yɛri bɔt Jizɔs, i go fɔdɔm bifo Jizɔs in fut wantɛm. 26Di uman bin de tɔk Grik, bɔt in trayb na bin Sayrofonishian. I beg Jizɔs fɔ drɛb di dɛbul kɔmɔt insay in pikin. 27Jizɔs se, “Na di pikin dɛn fɔs fɔ it, i nɔ rayt fɔ tek di pikin dɛn it gi dɔg.”

28Di uman ansa se, “Yɛs sa, bɔt di dɔg dɛnsɛf we kin sidɔm ɔnda tebul kin de pik di af af we de fɔdɔm na di pikin dɛn an.”

29Jizɔs se, “Fɔ wetin yu tɔk so, yu kin go na yu os saful, ɛn no se di dɛbul dɔn kɔmɔt insay yu pikin.”

30Wɛn di uman go nain os, i mit di pikin ledɔm na bed; di dɛbul bin dɔn kɔmɔt insay am.

Jizɔs Mɛn Dɛfyes Man we Nɔ Ebul Tɔk

31Jizɔs kɔmɔt na di eria we de klos Taya, ɛn pas insay Saydɔn; we i kɔmɔt de, i pas klos Lek Galili ɛn go na di eria we dɛn kɔl di Tɛn Tɔŋ dɛn. 32Sɔm pipul briŋ wan dɛfyes man we nɔ bin ebul tɔk gud to Jizɔs ɛn beg am fɔ mek i put in an pan di man in ed ɛn pre fɔ am. 33So Jizɔs kɛr di man go na kɔna, i put in fiŋa dɛn insay di man in yes, dɔn i pit ɛn tɔch di man in tɔŋ. 34I luk ɔp na ɛvin, i pini, dɔn i se, “Ɛffata,” dat min, “Yu yes go opin.”

35Di man in yes opin, in tɔŋ lus, i bigin tɔk klia wan. 36Jizɔs tɛl di pipul dɛn nɔ fɔ tɛl ɛnibɔdi wetin bi to di man. Di mɔ we Jizɔs de wɔn dɛn nɔ fɔ tɛl ɛnibɔdi, na di mɔ dɛn bin de tɛl pipul wetin Jizɔs du. 37Di pipul dɛn we yɛri bɔt wetin Jizɔs du, lɔs wit wɔnda. Dɛn se, “I sabi in wok gud gud! I de mek dɛfyes pipul yɛri, ɛn mumu pipul tɔk.”

Currently Selected:

Mak 7: KRIO13

Highlight

Copy