Mak 11
11
Jizɔs Go Insay Jerusɛlɛm
(Matyu 21:1-11; Lyuk 19:28-40; Jɔn 12:12-19)
1Wɛn dɛn bin dɔn de klos Jerusɛlɛm, ɛn dɛn dɔn rich Bɛtfej ɛn Bɛtani we de klos Mawnt Ɔliv, Jizɔs tɛl tu pan in lanin bɔy dɛn fɔ go na di vilej we de bifo dɛn. 2I se, “Una go na di vilej we de bifo una. As una de rich de so, una go mit dɛn tay wan dɔnki pikin we pɔsin nɔ rayd wande. Una lus am ɛn briŋ am kam to mi. 3If ɛnibɔdi aks una wetindu una de lus am, una fɔ se, ‘Di Masta want am, bɔt i go mek wi briŋ am kam bak as i dɔn wit am so.’”
4Di tu lanin bɔy dɛn go na di ples we Jizɔs sɛn dɛn ɛn dɛn mit di dɔnki pikin tay na trit klos wan os domɔt. Dɛn bigin lus am, as dɛn de lus am, 5di pipul dɛn we bin tinap de aks di lanin bɔy dɛn wetin mek dɛn de lus am.
6Di lanin bɔy dɛn tɔk wetin Jizɔs bin tɛl dɛn fɔ tɔk, so di pipul dɛn gri fɔ mek dɛn kɛr di dɔnki pikin go. 7Di lanin bɔy dɛn kɛr di dɔnki pikin go to Jizɔs; wɛn dɛn rich, dɛn prɛd dɛn klos pantap di dɔnki pikin in bak, Jizɔs sidɔm pantap am. 8Plɛnti ɔda pipul prɛd dɛnsɛf yon klos na grɔn ɛn sɔm ɔda wan dɛn brok di an dɛn pan sɔm tik ɛn ib dɛn na di rod we Jizɔs de pas. 9Di pipul dɛn we bin de bifo ɛn di wan dɛn we bin de biɛn bin de ala se, “Prez Gɔd! Gɔd blɛs di wan we i dɔn sɛn fɔ kam tinap fɔ am! 10Lɛ Gɔd blɛs di gɔvmɛnt we wi grampapa papa Devid bin gɛt ɛn we go kam bak. Una lɛ wi prez Gɔd!”
11Wɛn Jizɔs rich na Jerusɛlɛm, i go na Gɔd in Os ɛn luk ɔltin we lib de. Bɔt we nɛt bin dɔn de kam, in ɛn in lanin bɔy dɛn go na Bɛtani.
Jizɔs Swɛ Wan Fig Tik
(Matyu 21:18-19)
12Di ɔda de wɛn dɛn kɔmɔt Bɛtani, Jizɔs bin aŋri. 13I si wan fig tik we bin gɛt plɛnti lif, so Jizɔs go luk di tik fɔ si if i de bia. Wɛn i rich klos di tik, i si se na soso lif nɔmɔ kɔba am, bikɔs nɔto bin di tɛm dat fɔ mek i bia. 14Jizɔs swɛ di tik, i se, “Yu nɔ go bia natin igen.”
Di lanin bɔy dɛn yɛri wetin Jizɔs tɔk.
Jizɔs Go Insay Gɔd In Os
(Matyu 21:12-17; Lyuk 19:45-48; Jɔn 2:13-22)
15Wɛn Jizɔs rich Jerusɛlɛm, i go na Gɔd in Os ɛn drɛb dɛn pipul we bin de bay ɛn sɛl insay de. I tɔn oba dɛn tebul we pipul bin de chenj kɔpɔ pan, ɛn dɛn bɛnch we pipul kin sidɔm pan fɔ sɛl pijin. 16I nɔ gri fɔ mek ɛnibɔdi kɛr ɛnitin fɔ sɛl go insay Gɔd in Os. 17I se, “Dɛn rayt na Gɔd in Buk se, Gɔd se, ‘Pipul fɔ kɔl mi Os di ples we fɔ pre’. Bɔt una dɔn tɔn am to ples we tifman de ayd!”
18Wɛn di bigman dɛn we de mek sakrifays fɔ pipul sin ɛn di Ju Lɔ ticha dɛn yɛri wetin Jizɔs tɔk, dɛn bigin fɛn we fɔ kil am. Dɛn bin de fred am, bikɔs ɔl di pipul dɛn bin de wɔnda wɛn dɛn yɛri wetin i de tich ɛn dɛn bin gladi.
19Jizɔs ɛn in lanin bɔy dɛn kɔmɔt na di tɔŋ da sem ivintɛm de.
Wetin fɔ Lan bɔt di Fig Tik
(Matyu 21:20-22)
20Na mɔnin wɛn dɛn de tɔn bak, dɛn si se di fig tik dɔn day frɔm bɔtɔm te go ɔp. 21Pita mɛmba wetin bin bi, so i tɔn to Jizɔs ɛn se, “Ticha, luk, da fig tik we yu bin swɛ dɔn day!”
22Jizɔs se, “Una fɔ biliv Gɔd gud. 23A de tɛl una se, if ɛnibɔdi tɛl dis mawnten fɔ kɔmɔt na ya ɛn go na di si, ɛn di pɔsin nɔ dawt se wetin i tɔk go bi, bɔt i biliv se wetin i tɔk go bi, na so i go bi. 24Na dat mek a de tɛl una se, ɛnitin we una aks Gɔd fɔ, una fɔ biliv se una go gɛt am ɛn una go gɛt am. 25Ɛnitɛm we una de pre to Gɔd, una fɔ padin ɛnibɔdi we du una bad, so dat una Papa Gɔd we de na ɛvin go padin una fɔ di bad tin dɛn we una du. [ 26If una nɔ padin una kɔmpin, una Papa Gɔd we de na ɛvin nɔ go padin una fɔ di bad tin dɛn we una du.]”
Udat Tɛl Yu fɔ Du dɛn Tin ya?
(Matyu 21:23-27; Lyuk 20:1-8)
27Wɛn dɛn go bak na Jerusɛlɛm, Jizɔs bin de waka insay Gɔd in Os, nain di bigman dɛn we de mek sakrifays fɔ pipul sin, di Ju Lɔ ticha dɛn, ɛn di ɔda Ju bigman dɛn go mit am. 28Dɛn aks am se, “Us rayt yu gɛt fɔ du dɛn tin ya? Udat gi yu di rayt fɔ du dɛn?”
29Jizɔs ansa se, “Mek a aks una wan kwɛshɔn, if una gi mi di rayt ansa, a go tɛl una udat gi mi di rayt fɔ du dɛn tin ya. 30Na Gɔd ɔ na mɔtalman sɛn Jɔn fɔ kam baptayz pipul?”
31Dɛn bigin tɔk to dɛn kɔmpin se, “If wi ansa se na Gɔd sɛn Jɔn fɔ kam baptayz pipul, i go aks wi se, ‘Wetin du una nɔ bin biliv am?’ 32Bɔt wi fɔ se ‘Na mɔtalman.’” Dɛn fred fɔ tɔk dat bikɔs ɔl di pipul dɛn bin biliv se Jɔn na tru prɔfɛt. 33So dɛn se, “Wi nɔ no!”
Jizɔs se, “Misɛf nɔ go tɛl una udat gi mi di rayt fɔ du dɛn tin ya.”
Currently Selected:
Mak 11: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
