Mak 10
10
Jizɔs Lan Pipul bɔt Mared we Pwɛl
(Matyu 19:1-12; Lyuk 16:18)
1Jizɔs kɔmɔt Kepanyɔm go Judia, dɛn i krɔs Riva Jɔdan. Plɛnti pipul go gɛda rawnd am, ɛn i lan dɛn bɔt Gɔd lɛkɛ aw i kin de du.
2Di Faresi dɛn aks am kwɛshɔn fɔ tray am; dɛn se, “I rayt fɔ mek man tɛl in wɛf se i nɔ want am fɔ bi in wɛf igen?”
3Jizɔs aks dɛn se, “Wetin Mozis bin tɛl una fɔ du?”
4Dɛn se, “Mozis bin alaw man fɔ rayt pepa gi in wɛf fɔ sho se i want pat wit am.”
5Jizɔs se, “Na we una at traŋa mek Mozis rayt da lɔ de fɔ una. 6Bɔt frɔm we Gɔd mek di wɔl, nain ‘I mek tu kayn pipul, man ɛn uman;’ lɛkɛ aw dɛn rayt nain Buk. 7‘Na dat mek man go lɛf in mama ɛn papa go mared in wɛf, 8ɛn dɛn tu go de lɛkɛ wan pɔsin’. So dɛn nɔto tu pipul igen, dɛn tu dɔn bi lɛkɛ wan pɔsin. 9So mek pɔsin nɔ pat man ɛn uman we Gɔd dɔn jɔyn lɛkɛ wan pɔsin.”
10Wɛn dɛn rich na os, di lanin bɔy dɛn aks Jizɔs bɔt di tin we i tɔk. 11Jizɔs se, “If ɛni man pat wit in wɛf, dɔn i grap go mared ɔda uman, da man de dɔn sin. 12Ɛn if ɛni uman pat wit in man, dɔn i grap go mared to ɔda man, da uman de dɔn sin.”
Jizɔs Blɛs dɛn Lili Pikin
(Matyu 19:13-15; Lyuk 18:15-17)
13Sɔm pipul bin kɛr dɛn pikin go to Jizɔs fɔ mek i put an pan dɛn ed ɛn blɛs dɛn, bɔt in lanin bɔy dɛn tɛl di pipul dɛn nɔ fɔ ambɔg Jizɔs. 14Bɔt wɛn Jizɔs si wetin di lanin bɔy dɛn de du, i vɛks pan dɛn, i se, “Una mek di pikin dɛn kam to mi, una nɔ tap dɛn; na pipul lɛkɛ dɛn pikin ya, go kam ɔnda Gɔd in rul. 15A de tɛl una fɔ tru se, ɛnibɔdi we nɔ gri fɔ mek Gɔd rul am lɛkɛ lili pikin, da pɔsin de nɔ go kam ɔnda Gɔd in rul.” 16Jizɔs tot di pikin dɛn, put in an pan dɛn ed ɛn blɛs dɛn.
Wan Jɛntriman
(Matyu 19:16-30; Lyuk 18:18-30)
17As Jizɔs de go, wan man rɔn go mit am ɛn nil dɔŋ bifo am ɛn se, “Ticha, yu we gud, wetin a fɔ du fɔ mek a gɛt layf we go de sote go?”
18Jizɔs se, “Wetin du yu se a gud? Nɔbɔdi nɔ de we gud, na Gɔd in wangren gud. 19Yu no dɛn lɔ we se: ‘Yu nɔ fɔ kil yu kɔmpin mɔtalman; mared man nɔ fɔ lɛf in wɛf ɛn kip ɔda uman ɛn mared uman nɔ fɔ lɛf in man go kip ɔda man; yu nɔ fɔ tif; yu nɔ fɔ lay pan yu kɔmpin; yu nɔ fɔ rog; yu fɔ rɛspɛkt yu papa ɛn mama.’”
20Di man ansa se, “A dɔn kip ɔl dɛn lɔ ya frɔm we mi na bin pikin.”
21Jizɔs luk di man ɛn lɛk am, so i se, “Wan tin lɛf we yu nɔ du yet, go sɛl ɔl wetin yu gɛt ɛn sheb di kɔpɔ gi dɛn pipul we nɔ gɛt natin, da tɛm de yu go jɛntri na ɛvin; dɛn, kam bi mi lanin bɔy.” 22Wɛn di man yɛri wetin Jizɔs tɔk, in at pwɛl bikɔs na bin jɛntri man. I sɔri wɛn i lɛf Jizɔs de go.
23Jizɔs tɔn luk in lanin bɔy dɛn ɛn se, “I traŋa fɔ mek pɔsin we jɛntri kam ɔnda Gɔd in rul.”
24Di wɔd we Jizɔs tɔk mek di lanin bɔy dɛn wɔnda, bɔt Jizɔs tɔk igen se, “Mi pikin dɛn, i traŋa fɔ pɔsin fɔ kam ɔnda Gɔd in rul. 25I traŋa fɔ mek da big bif we nem kamɛl pas insay nidul yay, bɔt i traŋa pas dat fɔ mek jɛntri pɔsin kam ɔnda Gɔd in rul.”
26Di lanin bɔy dɛn wɔnda igen; dɛn aks dɛn kɔmpin se, “If na so i bi, wɛl, udat go sev?”
27Jizɔs luk dɛn ɛn se, “Gɔd ebul du wetin mɔtalman nɔ ebul du; Gɔd ebul du ɔltin.”
28Pita tɔk se, “Wɛl, wi dɔn lɛf ɔltin ɛn kam fala yu!”
29Jizɔs se, “A de tɛl una fɔ tru se, ɛnibɔdi we dɔn lɛf os, ɔ brɔda, ɔ sista, ɔ mama, ɔ papa, ɔ pikin dɛn, ɔ fam fɔseka mi ɛn di Gud Nyuz, 30Gɔd go gi am ɔndrɛd tɛm pas wetin i bin gɛt: os, brɔda, sista, mama ɛn papa, pikin ɛn fam; ɛn pipul go mek i sɔfa bad wan na dis wɔl, bɔt Gɔd go gi am layf we go de sote go na di wɔl we gɛt fɔ kam. 31Plɛnti pipul we de bifo dɛn kɔmpin naw go de biɛn, ɛn plɛnti pipul we de biɛn naw, go go bifo.”
Di Tɔd Tɛm we Jizɔs Tɔk bɔt In Day
(Matyu 20:17-19; Lyuk 18:31-34)
32Wɛn dɛn bin de go na Jerusɛlɛm, Jizɔs bin de waka bifo dɛn. Di lanin bɔy dɛn bin de wɔnda, ɛn di pipul dɛn we bin de fala Jizɔs bin de fred. Jizɔs kɔl in lanin bɔy dɛn wansay ɛn tɛl dɛn wetin pipul go du am. 33Jizɔs se, “Una lisin mi, wi de go na Jerusɛlɛm, pipul go ol Mɔtalman Pikin ɛn an am oba gi di bigman dɛn we de mek sakrifays fɔ pipul sin ɛn di Ju Lɔ ticha dɛn. Dɔn dɛn go an am oba gi dɛn pipul we nɔto Ju fɔ mek dɛn kil am. 34Di pipul dɛn go masaka am, dɛn go pit pan am ɛn kil am, bɔt i go rayz frɔm di grev di de we mek tri.”
Jems ɛn Jɔn Aks Jizɔs Sɔntin
(Matyu 20:20-28)
35Jems ɛn Jɔn, we na Zɛbidi in pikin dɛn, go mit Jizɔs ɛn se, “Ticha, wi want mek yu go du sɔntin fɔ wi.”
36Jizɔs aks dɛn se, “Wetin una want mek a du fɔ una?”
37Dɛn se, “Wɛn yu sidɔm na yu chia de rul, wi go want fɔ sidɔm klos yu, wan na yu raytan, di ɔda wan na yu lɛfan.”
38Jizɔs se, “Una nɔ no wetin una de tɔk; una go ebul drink na di kɔp we a go drink, ɛn baptayz lɛkɛ aw a go baptayz?”
39Dɛn se, “Wi go ebul, sa!”
Jizɔs se, “Una go drink na di kɔp we a go drink ɛn una go baptayz lɛkɛ aw a go baptayz, 40bɔt a nɔ gɛt di pawa fɔ mek una sidɔm na mi lɛfan ɛn mi raytan. Gɔd dɔn kip dɛn ples de fɔ dɛn pipul we i dɔn mak fɔ lib de.”
41Wɛn di ɔda lanin bɔy dɛn yɛri dat, dɛn vɛks pan Jems ɛn Jɔn fɔseka wetin dɛn aks Jizɔs fɔ du fɔ dɛn. 42Jizɔs kɔl dɛn ɔl ɛn tɛl dɛn se, “Una no se dɛn pipul we de rul dɛn wan we nɔ biliv Gɔd gɛt pawa oba dɛn, ɛn dɛn de tɛl dɛn wetin dɛn fɔ du ɔltɛm. 43Bɔt nɔto so i go bi fɔ una. If ɛni wan pan una want bi bigman, i fɔ wok fɔ una ɔl lɛkɛ se in na una bɔy. 44Ɛni wan pan una we want fɔ de bifo, da pɔsin de fɔ wok fɔ una ɔl lɛkɛ se in na una slev. 45Mɔtalman Pikin insɛf nɔ kam fɔ mek pipul bi in savant, i kam fɔ bi dɛn savant, ɛn fɔ gi in layf fɔ sev plɛnti plɛnti pipul.”
Jizɔs Mɛn Batimyɔs we Blɛn
(Matyu 20:29-34; Lyuk 18:35-43)
46Jizɔs ɛn in lanin bɔy dɛn rich Jɛriko. As dɛn de kɔmɔt de, plɛnti pipul fala dɛn. Wan blɛnyay man we nem Batimyɔs bin sidɔm klos di rod de beg; na bin Timeyɔs in pikin. 47Wɛn i yɛri se na Jizɔs we kɔmɔt Nazarɛt de pas, i bigin ala se, “Jizɔs, yu we na Devid in pikin, sɔri fɔ mi, sa!”#10:47 Devid in pikin min wan pan Devid in pikin pikin dɛn, na so di Ju dɛn bin de kɔl di Mɛsaya.
48Plɛnti pipul ala pan am fɔ sɛt in mɔt, bɔt na di mɔ i ala lawd wan se, “Yu, we na Devid in pikin, sɔri fɔ mi, sa!”
49Jizɔs tinap, i tɛl di pipul dɛn se, mek dɛn kɔl di blɛnyay man. Di pipul dɛn tɛl di man se, “Nɔ wɔri igen, grap! Jizɔs de kɔl yu.”
50Di man pul di klos we i bin wɛr pantap kɔmɔt, i grap kwik go mit Jizɔs.
51Jizɔs aks am se, “Wetin yu want mek a du fɔ yu?”
Di blɛnyay man se, “Ticha, a want mek yu mɛn mi yay, so dat a go ebul si.”
52Jizɔs se, “Go, di biliv we yu biliv dɔn mek yu wɛl.”
I bigin si wantɛm, i fala Jizɔs.
Currently Selected:
Mak 10: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
