Matyu 7

Una Nɔ fɔ Jɔj Ɔda Pipul

(Lyuk 6:37-38, 41-42)

1“Una nɔ jɔj ɔda pipul, so dat Gɔd nɔ go jɔj una. 2Aw una jɔj ɔda pipul, na di sem we Gɔd go jɔj unasɛf. 3Wetin du yu de luk di smɔl tik we de insay yu brɔda in yay, wɛn yu gɛt big bod insay yu yon yay? 4Aw yu go tɛl yu brɔda se, ‘Bo, mek a pul da smɔl tik de na yu yay,’ wɛn yu gɛt big wan na yu yon yay? 5Yu ipokrit! Yu pul da big tik we de insay yu yon yay fɔs, da tɛm de yu go si klia wan fɔ pul di smɔl tik we de insay yu brɔda in yay.

6“Una nɔ fɔ gi dɔg dɛn tin we una dɔn gi Gɔd, if una du dat di dɔg go tɔn pan una ɛn bɛt una. Una nɔ fɔ gi ɔg una fayn fayn bid dɛn, if una du dat, di ɔg go jɛs mas mas dɛn.

Jizɔs Lan Pipul fɔ Aks, Luk ɛn Kɔnk

(Lyuk 11:9-13)

7“Una aks Gɔd fɔ ɛnitin, i go gi una; una luk gud, una go fɛn wetin una de luk fɔ; una kɔnk, Gɔd go opin di do fɔ una. 8Ɛnibɔdi we aks, go gɛt wetin i want; ɛnibɔdi we luk gud, go gɛt wetin i de luk fɔ; ɛn ɛnibɔdi we kɔnk, Gɔd go opin di do fɔ am. 9Una dɛn papa, if una pikin aks una fɔ bred, una go gi am ston? 10Ɔ if una pikin aks una fɔ fish, una go gi am snek? 11If una we bad no aw fɔ gi una pikin dɛn gud tin dɛn, Gɔd we na una Papa we de na ɛvin, mɔs gi dɛn wan we aks am gud, gud tin dɛn pas dat.

12“Dɛn tin we una want mek ɔda pipul du to una, nain una fɔ du to dɛn. Na dat di Lɔ we Gɔd gi Mozis ɛn dɛn prɔfɛt se.

Di Smɔl Get

(Lyuk 13:24)

13“We una de go, una pas na di smɔl get, bikɔs di get we pipul de pas fɔ go na ɛl wayd, ɛn da rod de izi fɔ fala; plɛnti pipul de waka na da rod de. 14Bɔt di get we pipul de pas fɔ go usay tru layf de, smɔl, ɛn di rod traŋa fɔ waka pan, ɛn di pipul dɛn we dɔn fɛn am ɛn we go fɛn am, nɔ plɛnti.

Di Tin we Tik de Bia

(Lyuk 6:43-44)

15“Una tek tɛm wit dɛn prɔfɛt we nɔ de tɔk tru; wɛn una luk dɛn, dɛn tan lɛkɛ ship, bɔt insay dɛn at, dɛn tan lɛkɛ wulf we wayl bad bad. 16Una go no dɛn bay wetin dɛn de du. Pɔsin nɔ go pik greps na chuk chuk bush ɔ pɔsin nɔ go pik fig na chuk chuk tik. 17Tik we gud go bia gud tin fɔ it, ɛn tik we nɔ gud go bia bad tin fɔ it. 18Tik we gud nɔ go bia bad tin fɔ it ɛn tik we nɔ gud nɔ go bia gud tin fɔ it. 19Dɛn go kɔt ɛni tik we nɔ de bia gud tin fɔ it ɛn trowe am na faya. 20Una go no dɛn prɔfɛt we nɔ de tɔk tru bay wetin dɛn de du.

A Nɔ No Yu!

(Lyuk 13:25-27)

21“Nɔto ɔlman we de kɔl mi, ‘Masta, Masta’ go go usay Gɔd de rul na ɛvin. Na dɛn wan nɔmɔ we du wetin mi Papa, we de na ɛvin, want, go go de. 22Di de we Gɔd go jɔj ɔlman, plɛnti pipul go aks mi se, ‘Masta, Masta! Nɔto bay yu pawa wi bin de tɛl pipul wetin Gɔd se? Nɔto bay yu pawa wi bin de du plɛnti wɔndaful wok? Nɔto bay yu pawa wi bin de drɛb dɛbul?’ 23Da tɛm de a go tɛl dɛn se, ‘A nɔ no una, una kɔmɔt klos mi, una we dɔn du bad.’

Di Tu Kayn Os dɛn we Pipul Kin Bil

(Lyuk 6:47-49)

24“Ɛnibɔdi we de yɛri mi wɔd ɛn du wetin a tɛl am, da pɔsin de tan lɛk pɔsin we gɛt sɛns ɛn bil in os pan rɔk. 25Ren kam, agbara prɛd ɔlɔbɔt, big briz blo pan di os, bɔt di os nɔ fɔdɔm bikɔs dɛn bil am pan rɔk.

26“Bɔt ɛnibɔdi we yɛri wetin a tɔk ɛn i nɔ du wetin a tɛl am, da pɔsin de tan lɛk fulman we bil in os pan sansan. 27Wɛn ren kam, agbara prɛd ɔlɔbɔt ɛn briz blo pan di os, di os fɔdɔm ɛn i pwɛl pata pata.”

Wetin Jizɔs Tɔk Gɛt Pawa

28Wɛn Jizɔs dɔn tɔk dɛn wɔd ya dɔn, di pipul dɛn we bin lib de, bin lɛf de wɔnda pan aw Jizɔs lan dɛn. 29I nɔ lan dɛn lɛkɛ di Ju Lɔ ticha dɛn, i lan dɛn lɛkɛ pɔsin we gɛt di rayt fɔ lan pipul dɛn tin ya.

Currently Selected:

Matyu 7: KRIO13

Highlight

Copy