Matyu 26

Dɛn Tay Bagin pan Jizɔs

(Mak 14:1-2; Lyuk 22:1-2; Jɔn 11:45-53)

1Wɛn Jizɔs dɔn tɔk ɔl dɛn wɔd ya, i tɔk to in lanin bɔy dɛn, i se, 2“Una no se i lɛf tu de fɔ mek di Pasova ɔlide kam, ɛn dɛn go an ova Mɔtalman Pikin gi pipul we go nel am pan di krɔs.”

3Di bigman dɛn we de mek sakrifays fɔ pipul sin ɛn di ɔda Ju bigman dɛn mek mitin na Kaye fas in os; Kaye fas na bin edman fɔ dɛn man we de mek sakrifays fɔ pipul sin. 4Dɛn bagin fɔ ol Jizɔs ɛn kil am, mek plɛnti pipul nɔ no. 5Bɔt dɛn gri se dɛn nɔ go du am wɛn dɛn de pan di Pasova ɔlide, fɔ mek di pipul dɛn nɔ go fɛt.

Wan Uman Tɔn Dia Sɛnt na Jizɔs In Ed

(Mak 14:3-9; Jɔn 12:1-8)

6Jizɔs bin de Bɛtani na Saymɔn in os; tɛm bin de we Saymɔn bin gɛt bad sik nain skin. 7As Jizɔs de it, nain wan uman kam. Di uman bin gɛt dia sɛnt na wan ston bɔtul we dɛn tek ala ba sta mek; i tɔn di sɛnt na Jizɔs in ed. 8Di lanin bɔy dɛn vɛks wɛn dɛn si wetin bi, dɛn se, “Wetin mek di uman wes di sɛnt? 9I bin fɔ gɛt plɛnti kɔpɔ if i bin sɛl di sɛnt, ɛn sheb di kɔpɔ gi dɛn pipul we nɔ gɛt natin.”

10Jizɔs bin no wetin dɛn de tɔk, so i aks dɛn se, “Wetin du una de ambɔg di uman? I dɔn du fayn ɛn big wok fɔ mi. 11Dɛn pipul we nɔ gɛt natin go de wit una ɔltɛm, bɔt mi nɔ go de wit una ɔltɛm. 12Dis uman tɔn dis dia sɛnt pan mi, so dat i go rɛdi mi bɔdi fɔ di tɛm we dɛn go bɛr mi. 13A de tɛl una se, ɔlɔbɔt na wɔl we dɛn go tɛl pipul dis gud nyuz, dɛn mɔs mɛmba dis uman fɔ dis wok ya we i dɔn du.”

Judas Gri fɔ Sɛl Jizɔs

(Mak 14:10-11; Lyuk 22:3-6)

14Wan pan Jizɔs in lanin bɔy dɛn we nem Judas Iskariɔt go mit di bigman dɛn we de mek sakrifays fɔ pipul sin. 15I aks dɛn se, “Ɔmɔs una go pe mi if a mek una ol Jizɔs?” Dɛn pe am tati silva kɔpɔ. 16Frɔm da tɛm de, Judas bigin de fɛn gud chans fɔ sɛl Jizɔs gi dɛn.

Jizɔs It di Pasova It wit In Lanin Bɔy dɛn

(Mak 14:12-21; Lyuk 22:7-14, 21-23; Jɔn 13:21-30)

17Di fɔs de pan di ɔlide we di Ju dɛn kin it bred we nɔ gɛt yist, di lanin bɔy dɛn go aks Jizɔs usay i want dɛn fɔ go rɛdi di Pasova it.

18Jizɔs se, “Wan man de na dis tɔŋ we una fɔ go to, una go to am ɛn tɛl am se, ‘Wi Ticha se, di tɛm dɔn kam klos we dɛn go kil mi. Mi ɛn mi lanin bɔy dɛn go it di Pasova it na yu os.’”

19Di lanin bɔy dɛn go du wetin Jizɔs tɛl dɛn ɛn rɛdi di it fɔ mɛmba di Pasova.

20Wɛn i rich ivintɛm, Jizɔs ɛn in lanin bɔy dɛn sidɔm de it. 21Wɛn dɛn de it, Jizɔs se, “A de tɛl una se, wan pan una go sɛl mi.”

22Di lanin bɔy dɛn sɔri bad, dɛn bigin aks Jizɔs wan bay wan se, “Masta, na mi?”

23Jizɔs se, “Na wan pan una we de put an insay di sem dish wit mi go sɛl mi. 24Mɔtalman Pikin go day lɛkɛ aw dɛn rayt bɔt am na Gɔd in Buk, bɔt i go bad fɔ di pɔsin we go sɛl Mɔtalman Pikin! I bin fɔ bɛtɛ if da pɔsin de nɔ bin bɔn!”

25Judas we sɛl Jizɔs se, “Masta, na mi go sɛl yu?”

Jizɔs se, “Na so yu se.”

Di It we Wi de It fɔ Mɛmba di Masta

(Mak 14:22-26; Lyuk 22:14-20; 1 Kɔrint 11:23-25)

26We dɛn de it, Jizɔs tek bred, i pre ɛn tɛl Gɔd tɛnki. I kɔt kɔt am ɛn gi in lanin bɔy dɛn ɛn se, “Una tek am ɛn it am, dis na mi bɔdi.”

27Dɔn i tek di kɔp ɛn pre ɛn tɛl Gɔd tɛnki. I gi in lanin bɔy dɛn ɛn se, “Una ɔl drink di wayn we de na dis kɔp; 28dis na mi blɔd we a tek mek di agrimɛnt we Gɔd mek wit in pipul dɛn, a dɔn sakrifays am fɔ padin plɛnti plɛnti pipul dɛn sin. 29A de tɛl una se, a nɔ go drink wayn igen sote di tɛm we a go drink di nyu wayn wit una na di ples we mi Papa de rul.”

30Dɛn siŋ wan Gɔd siŋ, dɔn dɛn go na Mawnt Ɔliv.

Jizɔs Tɛl Pita Se I Go Dinay Am

(Mak 14:27-31; Lyuk 22:31-34; Jɔn 13:36-38)

31Dɛn Jizɔs tɛl dɛn se, “Dis nɛt una ɔl go lɛf mi, lɛkɛ aw dɛn rayt na Gɔd in Buk se, ‘Gɔd go strayk di shɛpad, mek i day, ɛn ɔl di ship dɛn go skata!’ 32Bɔt wɛn a rayz frɔm di grev, a go go na Galili, una go mit mi de.”

33Pita se, “If ɔlman lɛf yu sɛf, mi nɔ go go lɛf yu.”

34Jizɔs se, “A de tɛl yu se, dis nɛt bifo fɔl kro, yu go dɔn tɔk tri tɛm se yu nɔ no mi.”

35Pita se, “A nɔ go tɔk dat, if na fɔ day sɛf a go day na di ples we yu go day.”

Ɔl di ɔda lanin bɔy dɛn tɔk di sem tin.

Jizɔs Go Pre na Gɛtsemani

(Mak 14:32-42; Lyuk 22:39-46)

36Dɛn Jizɔs go na wan ples we dɛn kɔl Gɛtsemani wit in lanin bɔy dɛn. I se, “Una sidɔm na ya, a de go pre oba yanda.” 37Wɛn i de go, i kɛr Pita ɛn Zɛbidi in tu pikin dɛn go wit am. I bigin fil sɔri ɛn in at ebi. 38Nain i se, “Mi at so ebi dat a fil fɔ day. Una wet na ya, una wek ɛn pre wit mi.”

39I lɛf dɛn ɛn go bifo say lili bit, i ledɔm flat wit in fes na grɔn, ɛn pre se, “Mi Papa, if we de, pul dis sɔfa we a fɔ sɔfa kɔmɔt, ɛniwe, nɔto wetin mi want, na wetin yu want.”

40I tɔn bak go mit in lanin bɔy dɛn, bɔt i mit dɛn de slip; i aks Pita se, “Aw una de slip, una nɔ ebul de wan awa we una go wek ɛn pre wit mi? 41Una nɔ slip, una pre, so dat Setan nɔ go tray una fɔ mek una sin. Una want du di rayt tin bɔt una nɔ gɛt di pawa fɔ du am.”

42Jizɔs go pre bak, i se, “Mi Papa, if we nɔ de fɔ pul dis sɔfa we a gɛt fɔ sɔfa kɔmɔt, mek wetin yu want bi.” 43I tɔn bak go to in lanin bɔy dɛn, i mit dɛn de slip, dɛn nɔ ebul opin dɛn yay sɛf.

44Jizɔs lɛf dɛn igen, i go pre di sem pre we i bin dɔn pre; dat mek tri tɛm. 45I tɔn bak go mit in lanin bɔy dɛn ɛn aks dɛn se, “Una nɔ blo dɔn te nɔ? Una de slip te nɔ? Di tɛm dɔn rich we dɛn go sɛl Mɔtalman Pikin gi dɛn bad pipul. 46Una grap, lɛ wi go. Una luk di pɔsin we go sɛl mi, de kam naw!”

Dɛn Ol Jizɔs

(Mak 14:43-50; Lyuk 22:47-53; Jɔn 18:3-12)

47Jizɔs bin de tɔk wɛn Judas we na wan pan in twɛlv lanin bɔy dɛn, kam. I kam wit plɛnti pipul we ol sɔd ɛn tin dɛn fɔ tek fɛt. Na di bigman dɛn we de mek sakrifays fɔ pipul sin ɛn di ɔda Ju bigman dɛn bin sɛn dɛn pipul ya. 48Judas we sɛl Jizɔs gi dɛn pipul ya, bin dɔn tɛl dɛn se, “Di pɔsin we a go kis, na di man dat we una want, una ol am.”

49Wɛn dɛn rich, Judas go tret to Jizɔs ɛn se, “Masta, gud ivin,” dɔn i kis am.

50Jizɔs se, “Padi, du wetin yu want du kwik!”

So dɛn kam ol Jizɔs. 51Wan pan Jizɔs in lanin bɔy dɛn we bin de wit am pul in sɔd ɛn kɔt di edman fɔ dɛn man we de mek sakrifays fɔ pipul sin in bɔy in yes, kɔmɔt. 52Jizɔs tɔn to di lanin bɔy, i se, “Put yu sɔd bak nain ples, ɛnibɔdi we fɛt wit sɔd, na sɔd dɛn go tek kil am. 53Yu nɔ no se if a aks mi Papa fɔ ɛp mi, i go sɛn twɛlv bataliɔn enjɛl dɛn fɔ kam ɛp mi wantɛm? 54Bɔt if a du dat, aw wetin rayt na Gɔd in Buk go bi, we dɛn se na so Gɔd want wetin de bi naw fɔ bi?”

55Jizɔs aks di krawd se, “Wetin mek una ol sɔd ɛn tin dɛn fɔ tek fɛt fɔ kam ol mi lɛkɛ na tifman una de kam ol? A bin de wit una ɔl di tɛm de lan una na Gɔd in Os, bɔt una nɔ ol mi. 56Ɔl dis bi so dat wetin di Prɔfɛt dɛn bin rayt na Gɔd in Buk go bi.”

Wɛn i dɔn tɔk dɔn, nain ɔl di lanin bɔy dɛn lɛf am ɛn rɔnawe.

Dɛn Jɔj Jizɔs na di Ju Gran Kot

(Mak 14:53-65; Lyuk 22:54-55, 63-71; Jɔn 18:13-14, 19-24)

57Di pipul dɛn we ol Jizɔs kɛr am go na Kaye fas in os. Kaye fas na di edman fɔ dɛn man we de mek sakrifays fɔ pipul sin. Di Ju Lɔ ticha ɛn di ɔda Ju bigman dɛn bin dɔn gɛda de. 58Pita fala Jizɔs sote dɛn rich na di edman fɔ dɛn man we de mek sakrifays fɔ pipul sin, in yad, bɔt i nɔ bin de klos dɛn wɛn dɛn de go. Wɛn Pita dɛn rich insay di edman fɔ dɛn man we de mek sakrifays fɔ pipul sin in yad, i go sidɔm wit di gyad dɛn fɔ si wetin go bi. 59Di bigman dɛn we de mek sakrifays fɔ pipul sin ɛn ɔl di bigman dɛn we de jɔj na di Ju gran kot fɛn witnɛs fɔ lay pan Jizɔs, fɔ mek dɛn go kil am; 60bɔt dɛn nɔ gɛt pɔsin we tɔk bad tin we fɔ mek dɛn kil Jizɔs pan ɔl we plɛnti pipul go lay pan am. Nain tu pipul dɛn grap, 61dɛn tɔk se, “Dis man se in ebul brok Gɔd in Os, dɔn i go tek tri de fɔ bil am bak.”

62Di edman fɔ dɛn man we de mek sakrifays fɔ pipul sin, tinap ɛn aks Jizɔs se, “Yu dɔn yɛri wetin dɛn tu pipul ya se, yu gɛt ɛni ansa?” 63Bɔt Jizɔs nɔ tɔk natin. Nain di edman fɔ dɛn man we de mek sakrifays fɔ pipul sin tɔk igen se, “A de tek Gɔd we gɛt layf sote go, tɛl yu fɔ tɛl wi if yu na di Mɛsaya we na Gɔd in Pikin, fɔ tru.”

64Jizɔs se, “Na so yu se. Bɔt a de tɛl una se frɔm naw sote go, una go si Mɔtalman Pikin sidɔm na Gɔd we gɛt pawa pas ɔl, in raytan, ɛn i go rayd pan di klawd wɛn i de kam!”

65Wɛn di edman fɔ dɛn man we de mek sakrifays fɔ pipul sin yɛri wetin Jizɔs tɔk, i vɛks ɛn chɛr in klos, i se, “Dis man dɔn tɔk bad bɔt Gɔd. Wi nɔ want mɔ witnɛs fɔ tɔk wetin i du! Una ɔl jɛs yɛri we i tɔk bad bɔt Gɔd! 66Wetin una se?”

Di mɛmba dɛn na di Ju gran kot se, “Dis man dɔn du bad, dɛn fɔ kil am.”

67Sɔm pan dɛn pit pan Jizɔs in fes, sɔm bit am ɛn sɔm slap am. 68Dɛn se, “Mɛsaya, if yu na prɔfɛt, tɛl wi udat nak yu!”

Pita Tɔk Tri Tɛm Se In Nɔ No Jizɔs

(Mak 14:66-72; Lyuk 22:56-62; Jɔn 18:15-18, 25-27)

69Pita bin sidɔm na di edman fɔ dɛn man we de mek sakrifays fɔ pipul sin, in yad, na de wan pan di savant-gyal dɛn we de wok fɔ di edman fɔ dɛn man we de mek sakrifays fɔ pipul sin kam mit Pita ɛn se, “Yusɛf bin de wit Jizɔs we kɔmɔt Galili.”

70Bɔt Pita dinay bifo ɔlman. I se, “A nɔ no sɛf wetin yu de tɔk bɔt.” 71Nain Pita kɔmɔt de, i go tinap klos di get na di yad. Wan ɔda gyal we de wok na di ples mit am de, i tɛl di man dɛn we bin tinap klos de se, “Dis man bin de wit Jizɔs we kɔmɔt Nazarɛt.”

72Bɔt Pita dinay igen. I se, “A swɛ, a nɔ no da man de!”

73I nɔ tu te igen, nain sɔm man dɛn we bin tinap de kam mit Pita ɛn se, “Fɔ tru, yu na wan pan dɛn man we bin de wit Jizɔs, aw yu de tɔk sɛf dɔn sho wi se yu bin de wit am.”

74Nain Pita bigin swɛ. I se, “Na tru a de tɔk! Mek Gɔd pɔnish mi if a nɔ tɔk tru! A nɔ no da man de sɛf!”

Da sem tɛm de, nain fɔl kro. 75Pita mɛmba wantɛm wetin Jizɔs bin tɛl am: I bin se, “Bifo fɔl kro, yu go dɔn tɔk tri tɛm se yu nɔ no mi.” Pita kɔmɔt na do, i bɔs kray bita wan.

Currently Selected:

Matyu 26: KRIO13

Highlight

Copy