Matyu 25

Di Parebul bɔt di Tɛn Yɔŋ Gyal dɛn

1“Gɔd in rul tan lɛkɛ we tɛn yɔŋ gyal we nɔ mared, tek dɛn lamp fɔ go mit di ɔkɔ. 2Fayv pan di yɔŋ gyal dɛn bin ful, bɔt fayv bin gɛt sɛns. 3Wɛn di ful wan dɛn de kɛr dɛn lamp go, dɛn nɔ kɛr ɛkstra ɔyl fɔ dɛn; 4bɔt di wan dɛn we gɛt sɛns kɛr ɛkstra ɔyl fɔ dɛn lamp we dɛn de go. 5Di ɔkɔ bin let, so di yɔŋ gyal dɛn slip go.

6“Sɔmbɔdi ala midul nɛt se, ‘Luk, di ɔkɔ de kam! Una kam go mit am!’ 7Di tɛn yɔŋ gyal dɛn wek ɛn rɛdi dɛn lamp. 8Di wan dɛn we ful tɛl di wan dɛn we gɛt sɛns se, ‘Una gi wi sɔm pan una ɔyl, bikɔs wi lamp dɛn de ɔt.’ 9Bɔt di wan dɛn we gɛt sɛns tɛl dɛn se, ‘Nɔ, o, wi ɔyl nɔ du fɔ sheb, una go bay una yon na shap.’ 10So di fayv ful yɔŋ gyal dɛn go fɔ bay dɛn ɔyl na shap; wɛn dɛn de go na di shap, nain di ɔkɔ kam mit di fayv yɔŋ gyal dɛn we bin dɔn rɛdi, i tek dɛn go insay di ples we di mared pati bin de bi, dɔn dɛn lɔk di do.

11“Afta dat, di fayv ful yɔŋ gyal dɛn kam bak, dɛn se, ‘Masta, masta opin di do fɔ wi!’ 12Bɔt di Masta se, ‘A de tɛl una fɔ tru se, a nɔ no una!’”

13Afta dat, Jizɔs tɔk to di pipul dɛn, i se, “Una fɔ waydawek, bikɔs una nɔ no di de ɔ di awa we Mɔtalman Pikin go kam.

Di Parebul bɔt di Tri Bɔy dɛn

(Lyuk 19:11-27)

14“Gɔd in rul go tan lɛkɛ we wan man bin de go patrol, i kɔl in tri bɔy dɛn ɛn tɛl dɛn fɔ luk ɔl in prɔpati. 15Di man gi ɔl di bɔy dɛn kɔpɔ bay aw dɛn sabi wok. I gi wan bɔy fayv tawzin gold kɔpɔ, i gi di sɛkɛn bɔy tu tawzin gold kɔpɔ, dɔn i gi di tɔd bɔy wan tawzin gold kɔpɔ. Dɔn i go di patrol. 16Di bɔy we gɛt di fayv tawzin gold kɔpɔ go tredin wit in kɔpɔ, i gen ɔda fayv tawzin gold kɔpɔ mɔ. 17Semwe so, di wan we gɛt di tu tawzin gold kɔpɔ go tredin wit in kɔpɔ, i gen tu tawzin gold kɔpɔ mɔ. 18Bɔt di bɔy we gɛt wan tawzin gold kɔpɔ go dig ol na grɔn ɛn ayd di kɔpɔ we in masta gi am.

19“Wɛn i dɔn te, nain di masta kam bak, i aks di bɔy dɛn fɔ tɛl am wetin dɛn du wit di kɔpɔ we i gi dɛn. 20Di bɔy we i bin gi fayv tawzin gold kɔpɔ kam gi am fayv tawzin gold kɔpɔ mɔ, i se, ‘Masta, yu bin gi mi fayv tawzin gold kɔpɔ, bɔt luk, a dɔn gen fayv tawzin pantap am, sa!’ 21In masta se, ‘Yu du wɛl, yu na gud bɔy we tru to in masta; yu dɔn du wɛl pan smɔl wok we a gi yu fɔ du, naw a go gi yu plɛnti big wok fɔ du. Kam ɛnjɔy wit yu masta!’

22“Nain di bɔy we di man bin gi di tu tawzin gold kɔpɔ kam tɛl am se, ‘Yu bin gi mi tu tawzin gold kɔpɔ, bɔt luk, a dɔn gen tu tawzin gold kɔpɔ mɔ pantap am, sa!’ 23Di masta se, ‘Yu du wɛl, yu na gud bɔy we tru to in masta; yu dɔn du wɛl pan smɔl wok we a gi yu fɔ du, naw a go gi yu plɛnti big wok fɔ du. Kam ɛnjɔy wit yu masta!’

24“Di bɔy we di man gi di wan tawzin gold kɔpɔ kam tɔk se, ‘A no se yu biznɛs traŋa, sa, yu de kɔt ɛn gɛda usay yu nɔ plant. 25A bin fred yu, so a go ayd di wan tawzin gold kɔpɔ we yu bin gi mi na grɔn; luk di kɔpɔ we yu bin gi mi.’

26“Di masta se, ‘Yu na bad ɛn les wokman! Yu bin no se a de kɔt ɛn gɛda usay a nɔ plant? 27Wɛl, yu bin fɔ go put mi kɔpɔ na bank, so bay di tɛm we a kam bak, a bin fɔ gɛt ɔl mi kɔpɔ wit intrɛst pantap.’ 28I tɔn to di ɔda bɔy dɛn ɛn i se, ‘Una tek di kɔpɔ nain an ɛn gi di bɔy we gɛt di tɛn tawzin gold kɔpɔ. 29Ɛnibɔdi we gɛt sɔntin, Gɔd go gi am mɔ, so i go gɛt plɛnti; bɔt di pɔsin we nɔ gɛt, di lili bit sɛf we i gɛt, Gɔd go tek am nain an. 30Da bɔy de we nɔ bɛtɛ, mek dɛn trowe am na dak ples, usay i go kray bita wan ɛn bɛt in tɔŋ!’

Mɔtalman Pikin Go Jɔj Ɔlman

31“Di tɛm we Mɔtalman Pikin go kam lɛkɛ Kiŋ wit ɔl Gɔd in enjɛl dɛn, i go sidɔm nain wɔndaful chia fɔ jɔj ɔlman. 32Ɔlman go gɛda bifo am, dɔn i go sheb dɛn tu say lɛkɛ aw di man we de mɛn ship ɛn got de sheb dɛn, di ship wansay ɛn di got wansay. 33I go put dɛn pipul we tret na Gɔd in yay nain raytan, ɛn i go put di ɔda wan dɛn we nɔ tret, nain lɛfan. 34Dɔn di Kiŋ go tɛl dɛn pipul we tret na Gɔd in yay se, ‘Una kam, una we mi Papa dɔn blɛs! Una kam, tek di ples we una fɔ gɛt ɔnda Gɔd in rul, i bin dɔn rɛdi da ples de fɔ una frɔm we i mek di wɔl. 35Wɛn a bin aŋri, una gi mi tin fɔ it; wɛn a bin tɔsti, una gi mi wata fɔ drink; wɛn mi na bin trenja, una bin gladi fɔ tek mi na una os; 36wɛn a nɔ bin gɛt natin fɔ wɛr, una gi mi klos fɔ wɛr; wɛn a bin sik, una kam ɛp mi; ɛn wɛn a bin de na jel, una kam fɛn mi.’

37“Di pipul dɛn we du wetin Gɔd want dɛn fɔ du go ansa am se, ‘Masta, ustɛm yu bin aŋri we wi gi yu sɔntin fɔ it, ustɛm yu bin tɔsti we wi gi yu wata fɔ drink? 38Ustɛm yu na bin trenja we wi gladi fɔ tek yu na wi os, ustɛm yu nɔ bin gɛt natin fɔ wɛr we wi gi yu klos? 39Ustɛm yu bin sik we wi ɛp yu, ustɛm yu bin de na jel we wi go fɛn yu?’ 40Di Kiŋ go se, ‘Ɛnitɛm we una bin du dɛn tin ya fɔ ɛni wan pan dɛn pipul ya we pipul nɔ tek mek natin, we tan lɛkɛ brɔda to mi, na fɔ mi una bin du dɛn.’

41“Di Kiŋ go tɛl di wan dɛn nain lɛfan se, ‘Una kɔmɔt to mi, Gɔd dɔn kɔndɛm una, una go na da faya we de sote go, Gɔd bin dɔn rɛdi da faya de fɔ Setan ɛn in enjɛl dɛn. 42Wɛn a bin aŋri, una nɔ gi mi tin fɔ it; wɛn a bin tɔsti, una nɔ gi mi wata fɔ drink. 43Wɛn mi na bin trenja, una nɔ gladi fɔ tek mi na una os; wɛn a nɔ bin gɛt natin fɔ wɛr, una nɔ gi mi klos fɔ wɛr; wɛn a bin sik, una nɔ ɛp mi; ɛn wɛn a bin de na jel, una nɔ go fɛn mi.’

44“Dɛn go ansa am se, ‘Masta, ustɛm wi bin no se yu aŋri ɔ tɔsti ɔ yu na trenja ɔ yu nɔ gɛt natin fɔ wɛr ɔ yu sik ɔ yu de na jel, ɛn wi nɔ bin ɛp yu?’ 45Di Kiŋ go tɛl dɛn se, ‘Ɛnitɛm we una nɔ bin gri fɔ ɛp ɛni wan pan dɛn pipul we pipul nɔ tek mek natin, we tan lɛkɛ brɔda to mi, na mi una nɔ bin gri fɔ ɛp.’” 46Dɛn Jizɔs se, “A go mek dɛn pipul ya go say we dɛn go pɔnish sote go, bɔt di wan dɛn we du wetin Gɔd want dɛn fɔ du go go na di say we dɛn go gɛt layf sote go.”

Currently Selected:

Matyu 25: KRIO13

Highlight

Copy