Lyuk 23

Dɛn Kɛr Jizɔs Go bifo Paylet

(Matyu 27:1-2, 11-14; Mak 15:1-5; Jɔn 18:28-38)

1Na de ɔl di pipul dɛn we bin de jɔj na di Ju gran kot grap ɛn kɛr Jizɔs go bifo Paylet. 2Dɛn tɛl Paylet se, “Wi mit dis man de put wɔd na di pipul dɛn yes fɔ mek dɛn strayk ɛn i se wi nɔ fɔ pe taks to di kiŋ na Rom. I tɔk se in na di Mɛsaya ɛn dat min se in na kiŋ.”

3Paylet aks Jizɔs se, “Yu na dɛn Ju pipul dɛn kiŋ?”

Jizɔs ansa am se, “Na so yu dɔn tɔk.”

4Paylet tɛl di bigman dɛn we de mek sakrifays fɔ pipul sin ɛn ɔl di pipul dɛn we bin lib de se, “A nɔ si ɛni bad tin we dis man du.”

5Di pipul dɛn we kɛr Jizɔs go to Paylet se, “Jizɔs mek di pipul dɛn strayk bay di tin dɛn we i de lan pipul na Judia. I bigin na Galili ɛn naw i dɔn rich Jerusɛlɛm.” Dɛn pin.

Dɛn Kɛr Jizɔs Go bifo Ɛrɔd

6Wɛn Paylet yɛri wetin di pipul dɛn tɔk, i aks if na Galili Jizɔs kɔmɔt. 7Wɛn dɛn tɛl am se na di kɔntri we Ɛrɔd de rul Jizɔs kɔmɔt, Paylet sɛn Jizɔs go to Ɛrɔd mek i jɔj am; Ɛrɔd insɛf bin de na Jerusɛlɛm da sem tɛm de. 8Ɛrɔd gladi bad wɛn i si Jizɔs bikɔs i bin dɔn yɛri bɔt am ɛn insɛf bin dɔn want si am bad, ɛn i bin want si am we i de du sɔm wɔndaful wok. 9Ɛrɔd aks Jizɔs plɛnti kwɛshɔn, bɔt Jizɔs nɔ ansa am. 10Nain dɛn bigman we de mek sakrifays fɔ pipul sin ɛn dɛn Ju Lɔ ticha kam bifo ɛn bigin tɔk traŋa wan to Ɛrɔd de tɛl am wetin Jizɔs du. 11Ɛrɔd ɛn in soja man dɛn bigin du Jizɔs tin we go mek i fil smɔl ɛn dɛn bigin tek am tɔn an. Dɔn Ɛrɔd mek dɛn wɛr fayn klos pan Jizɔs, ɛn mek dɛn kɛr am go bak to Paylet. 12Ɛrɔd ɛn Paylet nɔ bin lɛk dɛnsɛf, bɔt frɔm da tɛm de we Ɛrɔd sɛn Jizɔs go to Paylet bak, dɛn tu kam bi padi.

Dɛn Kɔndɛm Jizɔs

(Matyu 27:15-26; Mak 15:6-15; Jɔn 18:39–19:16)

13Paylet kɔl dɛn bigman we de mek sakrifays fɔ pipul sin, dɛn pipul we de rul, ɛn di pipul dɛn na di kɔntri, na wan mitin. 14I tɛl dɛn se, “Una dɔn briŋ dis man ya kam to mi ɛn una tɛl mi se i de mek pipul dɛn strayk, bɔt wɛn a kwɛshɔn am bifo una, a si se i nɔ du nɔn pan di tin dɛn we una se i du. 15Ɛrɔd insɛf nɔ si ɛnitin bad we i du, so i dɔn sɛn am kam bak to wi. Jizɔs nɔ du natin fɔ mek dɛn kil am. 16A go jɛs mek dɛn bit am nɔmɔ, ɛn lɛf am lɛ i go.”

[ 17Paylet kin gɛt fɔ mek dɛn fri wan jelman we di Ju pipul dɛn want wɛn dɛn de pan di Ju ɔlide we dɛn kɔl Pasova.] 18So ɔl di pipul dɛn ala se, “Kil dis man ɛn fri Bara bas.” 19Bara bas na man we dɛn bin jel bikɔs i bin mek pipul dɛn strayk na di tɔŋ ɛn i bin kil pɔsin wɛn dɛn de strayk.

20Paylet bin want fri Jizɔs so i tɔk to di pipul dɛn bak, 21bɔt di pipul dɛn ala big wan se, “Nel am pan di krɔs! Nel am pan di krɔs!”

22Paylet tɔk to dɛn wan tɛm mɔ mek tri ɛn aks dɛn se, “Wetin du, us bad tin dis man du? A nɔ si se dis man du bad tin we fɔ mek dɛn nel am pan di krɔs; a go jɛs mek dɛn bit am nɔmɔ ɛn lɛf am.”

23Bɔt di pipul dɛn ala ɛn pin se dɛn fɔ kil Jizɔs pan di krɔs. So na wetin di pipul dɛn tɔk, nain Paylet bin gɛt fɔ du. 24So Paylet pas sɛntɛns se in go du wetin dɛn tɛl am fɔ du. 25I fri Bara bas, di man we dɛn bin jel fɔ di strayk ɛn fɔ di pɔsin we i kil, we di Ju pipul dɛn se i fɔ fri, dɔn i tɛl in soja man dɛn fɔ kil Jizɔs lɛkɛ aw di Ju pipul dɛn bin want am fɔ du.

Dɛn Nel Jizɔs pan di Krɔs

(Matyu 27:32-44; Mak 15:21-32; Jɔn 19:17-27)

26Wɛn dɛn bin de kɛr Jizɔs go, dɛn ol wan man na rod we nem Saymɔn we bin bɔn na Sayrini; i bin kɔmɔt wan vilej de go Jerusɛlɛm. Di soja man dɛn fos am fɔ mek i tot Jizɔs in krɔs fala am.

27Plɛnti plɛnti pipul fala Jizɔs go, sɔm uman dɛn we fala am bin de kray bita wan fɔ am. 28Jizɔs tɔn to dɛn ɛn se, “Una dɛn uman na Jerusɛlɛm, una nɔ kray fɔ mi, una kray fɔ unasɛf ɛn fɔ una pikin dɛn. 29Di tɛm de kam we dɛn go se, ‘I bɛtɛ fɔ dɛn uman we nɔ de bɔn pikin ɛn dɛn uman we nɔ bɔn pikin yet ɛn dɛn uman we nɔ gi pikin bɔbi wande!’ 30Pipul go tɛl dɛn big il se, ‘Una fɔdɔm pan wi!’ Ɛn dɛn go tɛl dɛn smɔl il se, ‘Una kɔba wi!’ 31If dɛn du dis to di rɔ tik, dat na mi; wetin dɛn go du to di dray wan, dat na una?”

32Wɛn dɛn de kɛr Jizɔs go fɔ go kil am, dɛn bin kɛr tu wikɛd man dɛn go wit am fɔ kil dɛn ɔl tri. 33Wɛn dɛn rich na di ples we dɛn kɔl “Di ples we tan lɛkɛ mɔtalman ed,” na de dɛn nel dɛn tri, ɔlman pan in yon krɔs. Dɛn put wan wikɛd man na Jizɔs in raytan, dɛn put di ɔda man na Jizɔs in lɛfan. 34Jizɔs se, “Papa, padin dɛn pipul ya bikɔs dɛn nɔ no wetin dɛn de du.”

Di soja man dɛn ib days fɔ pik di pɔsin we go gɛt Jizɔs in klos. 35Pipul dɛn bin tinap de luk, bɔt dɛn bigman we bin de rul na di kɔntri bin de laf Jizɔs, de se, “I kin sev ɔda pipul, mek i sev insɛf if in na di Mɛsaya, di pɔsin we Gɔd dɔn pik, fɔ tru!”

36Di sojaman dɛnsɛf laf am, dɛn gi am viniga fɔ drink 37ɛn se, “If yu na di Ju pipul dɛn kiŋ, sev yusɛf.”

38Dɛn rayt sɔntin ɛn nel am pan di krɔs oba in ed. Na di tin dis we dɛn rayt: “DIS NA DI JU PIPUL DƐN Kiŋ.”

39Wan pan di tu wikɛd man dɛn we bin ɛŋ pan krɔs tɔk bad bɔt Jizɔs, i se, “Yu na di Mɛsaya, nɔto so? Wɛl, sev yusɛf ɛn sev wi!”

40Bɔt di ɔda wikɛd man we insɛf bin ɛŋ pan krɔs, tɔk pan in kɔmpin. I se, “Yu nɔ de fred Gɔd? Dɛn dɔn kɔndɛm yusɛf fɔ day lɛkɛ dis man ya. 41Dɛn kɔndɛm mi ɛn yu na ya fɔ wetin wi du ɛn wi de gɛt wi pe fɔ ɔl dɛn bad tin we wi du, bɔt dis man ya nɔ du ɛni bad tin.” 42Dɛn i tɔn to Jizɔs ɛn se, “Jizɔs, duya, mɛmba mi, sa, wɛn yu kam wit pawa fɔ rul lɛkɛ Kiŋ!”

43Jizɔs ansa am se, “A de tɛl yu se, fɔ tru, tide yu go de wit mi na ɛvin.”

Jizɔs Day

(Matyu 27:45-46; Mak 15:33-41; Jɔn 19:28-30)

44Na bin lɛkɛ twɛlv oklɔk santɛm so, di san tap fɔ shayn, ɔl di kɔntri dak sote tri oklɔk. 45Di tik, tik kɔtin we bin ɛŋ insay Gɔd in Os chɛr midul kam dɔŋ. 46Jizɔs ala se, “Papa, na day a de day so, tek mi spirit!” As i tɔk dɔn so, nain i day.

47Wɛn di bigman fɔ dɛn soja man si wetin bi, i tɛl Gɔd tɛnki, i se, “Fɔ tru, dis man ya nɔ bin du ɛnitin bad.”

48Wɛn ɔl di pipul dɛn we bin go luk si wetin bi, dɛn ɔl kɔmɔt de saful go na dɛn os, ɛn wɛn dɛn de go dɛn bin de nak dɛn chɛst fɔ sho se dɛn at ebi. 49Ɔl Jizɔs in padi dɛn ɛn dɛn uman we fala am kɔmɔt Galili, bin tinap fawe de luk ɔltin we bi.

Josɛf Bɛr Jizɔs

(Matyu 27:57-61; Mak 15:42-47; Jɔn 19:38-42)

50Wan Ju man bin de we bin nem Josɛf. I bin kɔmɔt na wan tɔŋ we nem Arimatia we de na Judia; na bin mɛmba na di Ju gran kot. I bin gud ɛn i bin de waka tret, 51i nɔ bin gri wit di tin we in kɔmpin dɛn bin mekɔp fɔ du ɛn we dɛn du. I bin de wet fɔ di tɛm we Gɔd go rul dis wɔl. 52Josɛf go to Paylet ɛn aks am fɔ mek dɛn gi am Jizɔs in bɔdi fɔ mek i bɛr am. 53I pul Jizɔs in bɔdi kɔmɔt na di krɔs, i rap am wit nyu linin klos ɛn bɛr am insay big ston grev we dɛn nɔ bin bɛr pɔsin yet. 54Dat bi di de we dɛn de rɛdi fɔ di de fɔ pre ɛn blo.

55Dɛn uman we bin kɔmɔt Galili wit Jizɔs, fala Josɛf go, dɛn si di grev ɛn aw i le Jizɔs in bɔdi, 56dɛn tɔn bak fɔ go tek spays ɛn sɛnt fɔ kam put dɛn pan di bɔdi.

Na bin di de fɔ pre ɛn blo, so dɛn du lɛkɛ aw di Ju Lɔ se, dɛn blo.

Currently Selected:

Lyuk 23: KRIO13

Highlight

Copy