Lyuk 15

I Tot Am Na In Sholda

(Matyu 18:12-14)

1Dɛn pipul we de gɛda taks ɛn dɛn ɔda pipul we di Ju pipul dɛn nɔba miks wit bikɔs dɛn tink se dɛn nɔ de kip di Ju Lɔ aw dɛn fɔ kip am, bin de kam fɔ yɛri wetin Jizɔs de tɔk. 2Dat mek dɛn Faresi ɛn dɛn Ju Lɔ ticha bigin grɔmbul, dɛn se, “Dis man de mek padi wit dɛn bad pipul we wi nɔ de miks wit, ɛn i de it wit dɛn.” 3So Jizɔs pul parebul. I se:

4“If pɔsin gɛt wan ɔndrɛd ship, wan lɔs, da pɔsin de nɔ go lɛf di ɔda naynti-nayn ship dɛn na fil go luk fɔ di wan we lɔs sote i fɛn am? 5Wɛn i fɛn in ship we bin lɔs, i go tot am, put am pan in sholda, ɛn i go de gladi. 6Wɛn i rich nain os, i go kɔl in padi dɛn ɛn in neba dɛn kam ɛn tɛl dɛn se, ‘Una kam ɛp mi gladi bikɔs a dɔn fɛn mi ship we bin lɔs!’ 7Semwe so, di gladi we go de na ɛvin fɔ wan pɔsin we bin de pan sin we sɔri fɔ di bad we i du ɛn tɔn to Gɔd pas di gladi we de fɔ naynti-nayn pipul we fil se dɛn tret na Gɔd yay.

I Go Swip in Os

8“If wan uman gɛt tɛn silva kɔpɔ ɛn wan pan dɛn lɔs, i nɔ go layt lamp, swip ɔl in os, ɛn tek tɛm luk fɔ di silva kɔpɔ we lɔs sote i si am? 9Wɛn i dɔn fɛn am, i go kɔl ɔl in padi dɛn ɛn in neba dɛn kam ɛn tɛl dɛn se, ‘Una kam gladi wit mi bikɔs a dɔn fɛn mi silva kɔpɔ we bin lɔs!’ 10Semwe so, Gɔd in enjɛl dɛn go gladi bikɔs wan pɔsin we bin de pan sin sɔri fɔ di bad we i du ɛn tɔn to Gɔd.”

Wewɔd Bɔy Pikin

11Jizɔs tɛl dɛn se, “Wan man bin de we bin gɛt tu bɔy pikin. 12Di smɔl brɔda kam to in papa ɛn tɛl am se, ‘Papa, gi mi mi yon pat pan yu prɔpati we a fɔ gɛt.’ So di papa sheb di prɔpati ɛn gi di tu brɔda dɛn yon pat. 13I nɔ lɔŋ igen afta dat, di lili brɔda sɛl ɔl in yon pat pan di prɔpati, gɛda di kɔpɔ ɛn go na wan kɔntri we de fawe. Na de i wes ɔl wetin i bin gɛt pan fulish layf. 14Wɛn ɔltin dɔn dɔn nain an, natin nɔ bin de fɔ it na di kɔntri we i de, so i bin aŋri ɛn i nɔ bin gɛt ɛnitin we i want. 15So i beg wan pan dɛn bigman na di tɔŋ fɔ mek i fɛn wok fɔ am. Di man sɛn am go nain fam fɔ go luk in ɔg dɛn ɛn gi dɛn it. 16I bin so aŋri bad dat i bin want it di it sɛf we di ɔg dɛn de it, bɔt nɔbɔdi nɔ gi am pan am. 17Wɛn i si wetin bi, i tɔk nain at se, ‘Mi papa in lebra dɛn de it te dɛn bɛlful, ɛn it kin lɛf, bɔt mi de day wit aŋri! 18A nɔ go sidɔm igen, a go go to mi papa ɛn tɛl am se, Papa, a dɔn sin to Gɔd ɛn a dɔn sin to yu. 19A nɔ fit fɔ bi yu pikin igen, duya, tek mi lɛkɛ wan pan yu lebra dɛn.’ 20I kɔmɔt na di kɔntri we i bin de ɛn go bak to in papa.

“Wɛn i de go, i bin stil de fawe wɛn in papa si am. In papa sɔri fɔ am, so i rɔn go mit am, i grip am ɛn kis am. 21Di pikin tɛl in papa se, ‘Papa, a dɔn sin to Gɔd ɛn a dɔn sin to yu. A nɔ fit fɔ mek yu kɔl mi yu pikin igen.’ 22Bɔt di papa tɛl in bɔy dɛn se, ‘Una rɔn go briŋ da klos we fayn pas ɔl dɛn ɔda klos kam wɛr am pan dis mi pikin ya, una put riŋ nain fiŋa ɛn wɛr sus nain fut. 23Una briŋ da lili kaw we fat pas ɔl, kam; una kil am, lɛ wi it ɛn gladi! 24Dis mi pikin ya bin dɔn day, bɔt i dɔn gɛt layf bak. I bin lɔs, bɔt a dɔn fɛn am.’ Dɛn bigin siŋ ɛn dans.

25“Di big brɔda bin de wok na fam ɔl da tɛm de. Wɛn i dɔn kɔmɔt na di fam de kam klos dɛn os, i yɛri dɛn de siŋ ɛn dans. 26I kɔl wan pan di bɔy dɛn ɛn aks am wetin mek dɛn de siŋ ɛn dans. 27Di bɔy tɛl am se, ‘Yu smɔl brɔda dɔn kam ɛn yu papa dɔn kil da lili kaw we fat pas ɔl, bikɔs yu brɔda dɔn kam bak wit in layf ɛn i wɛl.’

28“Wɛn di big brɔda yɛri dat, i vɛks ɛn i nɔ gri fɔ go insay di os, so in papa go mit am na do ɛn koks am fɔ go insay. 29I tɛl in papa se, ‘Papa, luk ɔmɔs ia naw we a de wok fɔ yu, wande a nɔ jomp yu wɔd, bɔt yu nɔ wande tek wan lili got sɛf gi mi fɔ mek mi ɛn mi padi dɛn go kam it ɛn mek wi ɔl gladi. 30Wɛn dis yu pikin ya we dɔn go wes yu prɔpati pan dɛn trit uman, kam, yu kil di lili kaw we fat pas ɔl fɔ am!’ 31In papa tɛl am se, ‘Bɔbɔ, yu de na ya wit mi ɔltɛm ɛn ɔl wetin a gɛt na yu yon. 32Aw wi nɔ fɔ ɛnjɔy wisɛf ɛn gladi, dis yu brɔda bin dɔn day, bɔt i dɔn gɛt layf bak; i bin lɔs, bɔt wi dɔn fɛn am.’”

Currently Selected:

Lyuk 15: KRIO13

Highlight

Copy