Lyuk 14

Jizɔs Mɛn Wan Sik Man

1Wande we fɔ pre ɛn blo, Jizɔs bin go it na wan dɛn Faresi dɛn bigman in os; di pipul dɛn na di os bin de wach am. 2Wan sikman we in an ɛn fut bin swɛl kam to Jizɔs. 3Jizɔs aks dɛn Ju Lɔ ticha ɛn dɛn Faresi se, “Di Lɔ se fɔ mɛn pɔsin ɔ nɔ fɔ mɛn pɔsin di de fɔ pre ɛn blo?”

4Bɔt di Ju Lɔ ticha ɛn di Faresi dɛn nɔ se fiŋ! Jizɔs mɛn di sik man ɛn mek i go. 5Jizɔs aks di pipul dɛn se, “Uswan pan una we in bɔy pikin ɔ in kaw fɔdɔm insay wɛl di de fɔ pre ɛn blo nɔ go pul am kɔmɔt insay de wantɛm?”

6Di pipul dɛn nɔ ebul ansa Jizɔs in kwɛshɔn.

Put Yusɛf Dɔŋ, Gɔd Go Es Yu Ɔp

7Wɛn Jizɔs si se sɔm pan di pipul dɛn na di os lɛk fɔ sidɔm na dɛn chia we de bifo we dɛn bigman kin sidɔm, i pul parebul se: 8“Wɛn dɛn kɔl yu na mared, yu nɔ fɔ sidɔm na dɛn chia we de bifo we dɛn bigman fɔ sidɔm pan, bikɔs sɔntɛm dɛn dɔn kɔl pɔsin we impɔtant pas yu na di mared, 9ɛn wɛn da pɔsin de kam, di pɔsin we kɔl yu na di mared go kam mit yu tɛl yu se, ‘Mi padi, grap mek dis man ya sidɔm!’ Da tɛm de na shem yu go tek grap go sidɔm na di chia we de biɛn biɛn. 10Wɛn dɛn kɔl yu na mared, go sidɔm na di chia we de biɛn, so wɛn di pɔsin we kɔl yu kam si usay yu sidɔm, nain go se, ‘Mi padi, grap kam sidɔm bifo ya!’ Da tɛm de ɔl dɛn pipul we de na di mared go si se yu gɛt ɔna. 11Da pɔsin we put insɛf ɔp, Gɔd go put am dɔŋ; ɛn da pɔsin we put insɛf dɔŋ, Gɔd go es am ɔp.”

12Jizɔs tɛl di Ju bigman we bin kɔl am fɔ go it nain os se, “Wɛn yu de kɔl pipul fɔ kam it, nɔ kɔl yu padi dɛn, nɔ kɔl yu brɔda dɛn, nɔ kɔl yu fambul dɛn ɔ yu jɛntri neba dɛn, bikɔs dɛnsɛf go kɔl yu fɔ go it bak, so i go bi se dɛnsɛf go pe yu bak. 13Bɔt wɛn yu de kɔl pipul fɔ kam it, kɔl dɛn pipul we nɔ gɛt natin, dɛn wan we nɔ gɛt sɔm pat pan dɛn bɔdi, dɛn wan we nɔ ebul waka, ɛn dɛn wan we blɛn. 14If yu du so, yu go gɛt blɛsin bikɔs dɛn kayn pipul de nɔ go ebul fɔ tɔn di gud we yu du fɔ dɛn gi yu bak. Gɔd go gi yu di pe bak fɔ di gud we yu du, da de we in pipul dɛn go rayz frɔm dɛn grev.”

Parebul bɔt Wan Man we Kuk Big Kuk

(Matyu 22:1-10)

15Wɛn wan pan dɛn pipul we bin de it wit Jizɔs yɛri wetin Jizɔs tɔk, di pɔsin tɛl Jizɔs se, “Blɛsin de pan da pɔsin we go it bred na di ples we Gɔd de rul!”

16Jizɔs tɛl di pɔsin se, “Wan man bin mek big kuk ɛn kɔl plɛnti pipul fɔ kam it. 17Wɛn di tɛm rich we di it dɔn rɛdi, i sɛn in bɔy fɔ go tɛl dɛn pipul we i bin dɔn kɔl fɔ kam it, se, ‘Una kam, di it dɔn rɛdi!’ 18Bɔt ɔlman we di bɔy mit ɛn tɛl fɔ kam it se dɛn nɔ go kam ɛn dɛn tɔk wetindu. Wan se, ‘A dɔn bay grɔn ɛn a jɛs gɛt fɔ go luk am. Go tɛl yu masta se a nɔ go ebul go it to am.’ 19Wan ɔda wan se, ‘A dɔn bay tɛn kaw ɛn a want fɔ go luk dɛn fɔ si aw dɛn de wok, so, duya, tɛl yu masta se na dat mek a nɔ go ebul go it to am.’ 20Wan ɔda wan se, ‘A jɛs mared, na dat mek a nɔ go ebul go it to am.’

21“Di bɔy tɔn bak go tɛl in masta wetin dɛn ɔl tɔk. In masta vɛks, so i tɛl am se, ‘Rɔn go na dɛn trit ɛn dɛn kɔna na di tɔŋ ɛn briŋ dɛn pipul we nɔ gɛt natin, dɛn blɛnyay pipul, dɛn wan we nɔ ebul waka ɛn dɛn pipul we nɔ gɛt sɔm pat pan dɛn bɔdi!’ 22Wɛn di bɔy kam bak, i tɛl in masta se, ‘Masta, a dɔn du ɔl wetin yu tɛl mi fɔ du, bɔt ples lɛf fɔ mɔ pipul, sa.’ 23Di masta se, ‘Go na dɛn big rod ɛn dɛn bush rod na dɛn vilej say ɛn beg di pipul dɛn de fɔ kam, so dat di ples go ful. 24A de tɛl una fɔ tru se, ɔl dɛn pipul we a bin kɔl fɔs fɔ kam it nɔ go tes natin pan di it we dɛn dɔn kuk!’”

Pɔsin Fɔ Lɛf Ɔltin na Wɔl ɛn Fala Jizɔs

(Matyu 10:37-38)

25Wɛn Jizɔs de go, plɛnti plɛnti pipul fala am. Jizɔs tɛl dɛn se, 26“If ɛnibɔdi want fɔ fala mi, da pɔsin de fɔ lɛk mi pas in papa ɛn in mama, i fɔ lɛk mi pas in pikin dɛn ɛn in brɔda ɛn sista dɛn ɛn i fɔ lɛk mi pas in yon layf sɛf. If nɔ so, i nɔ go bi mi lanin bɔy. 27Ɛnibɔdi we nɔ ebul tot in krɔs, na pɔsin we nɔ ebul fɔ sɔfa ɛn day fɔseka Mi ɛn du ɔl wetin a de du; da pɔsin de nɔ go bi mi lanin bɔy.

28“Uswan pan una go want bil os, we nɔ go sidɔm tink if di kɔpɔ we i gɛt go du fɔ bil di os? 29If di pɔsin jɛs grap ɛn bigin bil, bɔt i nɔ ebul dɔn di os, dɛn pipul we go si di os we nɔ dɔn go laf di man we de bil. 30Pipul dɛn go se, ‘Dis man bin bigin bil os, bɔt i nɔ ebul fɔ dɔn am!’

31“Us kiŋ we gɛt tɛn tawzin soja man nɔ go sidɔm mekɔp if i go ebul fɔ fɛt in kɔmpin kiŋ we gɛt twɛnti tawzin soja man? 32If i nɔ go ebul fɛt ɛn i dɔn yɛri se in kɔmpin we gɛt soja man pas am de kam fɛt am, bifo dɛn rich klos in kɔntri i go sɛn mɛsenja go beg fɔ mek dɛn go mek agrimɛnt mek wa nɔ go bi. 33Na dat mek, ɛnibɔdi we nɔ lɛf ɔltin na wɔl fɔseka mi, nɔ go bi mi lanin bɔy.

Sɔl we Nɔ Gud

(Matyu 5:13; Mak 9:50)

34“Sɔl gud, bɔt if i lɔs in tes, aw fɔ du fɔ mek i gɛt tes bak? 35I nɔ gud fɔ put na grɔn wɛn dɛn de plant ɛn i nɔ gud fɔ maniɔ sɛf, i jɛs bɛtɛ mek dɛn trowe am. Ɛnibɔdi we gɛt yes fɔ yɛri, mek di pɔsin lisin!”

Currently Selected:

Lyuk 14: KRIO13

Highlight

Copy