Jɔn 21
21
Jizɔs Sho Insɛf to Sɛvin Lanin Bɔy dɛn
1Afta dat, Jizɔs sho insɛf bak to in lanin bɔy dɛn, wɛn dɛn bin de klos Lek Taybiryɔs. Na di tin dis we bi: 2Saymɔn Pita; Tɔmɔs, we dɛn kɔl “Twin”; Natanyɛl we kɔmɔt Kena we de na Galili; Zɛbidi in pikin dɛn; ɛn tu ɔda wan pan Jizɔs in lanin bɔy dɛn ɔl bin de wan ples. 3Saymɔn Pita tɛl dɛn se, in de go fishin. Dɛn se, “Wi go fala yu go.” So dɛn tek bot go fishin ol nɛt, bɔt dɛn nɔ kech natin. 4Na mɔnin bifo san kɔmɔt, Jizɔs go tinap na di bich, bɔt di lanin bɔy dɛn nɔ bin no se na Jizɔs. 5Nain Jizɔs se, “E padi! Una nɔ kech natin?”
Dɛn ansa se, “Wi nɔ kech natin.”
6Jizɔs se, “Una sɛn una chen na una raytan say, una go kech fish.” So dɛn sɛn di chen na di say we Jizɔs tɛl dɛn; dɛn nɔ ebul drɔ di nɛt kam insay di bot, bikɔs di fish dɛn bin tu plɛnti.
7Di lanin bɔy we Jizɔs lɛk tɛl Pita se, “Na di Masta tinap yanda so na di bich!” Pita bin dɔn pul in klos we i wɛr pantap, so wɛn i yɛri se na di Masta, i jɛs rap am bak rawnd insɛf, ɛn jomp na di wata. 8Di ɔda lanin bɔy dɛn tek di bot go na di bich, ɛn wɛn dɛn de go, dɛn bin de drɛg di nɛt wit di fish. Di bich nɔ bin de fa, i bin jɛs de lɛkɛ wan ɔndrɛd yad so frɔm di say we dɛn bin de. 9Wɛn dɛn rich na di bich, dɛn si fish de ros pan faya kol, ɛn sɔm bred. 10Jizɔs tɛl dɛn fɔ go briŋ sɔm pan di fish we dɛn bin jɛs kech.
11Saymɔn Pita go bak insay di bot ɛn ɛp fɔ drɔ di nɛt kam na di bich. Na wan ɔndrɛd ɛn fifti-tri big big fish bin ful di nɛt. Pan ɔl dat, di nɛt nɔ chɛr. 12Jizɔs kɔl dɛn fɔ go it. Nɔn pan di lanin bɔy dɛn nɔ bin gɛt di maynd fɔ aks am se, “Udat na yu?” Bikɔs dɛn bin no se na di Masta. 13Jizɔs go tek di bred gi dɛn, dɔn i gi dɛn di fish.
14Na di tɔd tɛm dat we Jizɔs sho insɛf to in lanin bɔy dɛn, afta i rayz frɔm di grev.
Jizɔs Tɔk to Pita
15Wɛn dɛn dɔn it dɔn, Jizɔs se, “Saymɔn, yu we na Jɔn in pikin, yu lɛk mi pas aw ɔl dɛn ɔda lanin bɔy ya lɛk mi?”
Pita ansa se, “Yɛs, Masta, yu no se a lɛk yu.”
Jizɔs se, “Mɛn mi ship pikin dɛn.” 16Jizɔs aks Pita sɛkɛn tɛm se, “Saymɔn, yu we na Jɔn in pikin, yu lɛk mi?”
Pita se, “Yɛs, Masta, yu no se a lɛk yu.”
Jizɔs se, “Mɛn mi ship dɛn.” 17Jizɔs aks Pita di tɔd tɛm se, “Saymɔn, yu we na Jɔn in pikin, yu lɛk mi?”
Pita in at pwɛl bikɔs Jizɔs aks am tri tɛm se if i lɛk am, so i ansa di Masta se, “Masta, yu no ɔltin, yu no se a lɛk yu!”
Jizɔs se, “Mɛn mi ship dɛn. 18A de tɛl yu se, wɛn yu bin yɔŋ, yu kin jɛs rɛdi ɛn go ɛni say we yu want go, bɔt wɛn yu dɔn ol, yu go tret yu an dɛn, ɛn ɔda pɔsin go tay dɛn ɛn kɛr yu go say we yu nɔ want go.” 19(Wɛn Jizɔs tɔk dat, i bin de sho aw Pita go day, ɛn ɔna Gɔd.) Dɛn Jizɔs tɛl am se, “Du wetin a tɛl yu fɔ du.”
Jizɔs ɛn di Ɔda Lanin Bɔy
20Pita tɔn rawnd ɛn si di lanin bɔy we Jizɔs lɛk biɛn am. Na da lanin bɔy de bin sidɔm klos Jizɔs wɛn dɛn bin de it, ɛn nain bin aks Jizɔs se, “Masta, udat go sɛl yu?” 21Wɛn Pita si am, i aks Jizɔs se, “Masta, wetin go bi to dis man ya?”
22Jizɔs ansa se, “If a want mek i de na wɔl sote a kam bak, uswan na yu yon de? Yu du wetin a tɛl yu fɔ du.”
23Di wɔd go rawnd to ɔl di pipul dɛn we bin biliv pan Jizɔs se, di lanin bɔy we Jizɔs lɛk nɔ go day. Bɔt Jizɔs nɔ bin se di lanin bɔy nɔ go day, i bin jɛs se, “If a want mek i de na wɔl sote a kam bak, uswan na yu yon de?”
24Na di lanin bɔy dat we si ɛn yɛri ɔl dɛn tin ya, nain rayt dɛn na dis buk, ɛn wi no se ɔl wetin i rayt na tru.
Jizɔs Du Plɛnti Ɔda Tin dɛn
25Plɛnti ɔda tin dɛn de we Jizɔs du. If dɛn bin rayt dɛn ɔl wan bay wan, a tink se di wɔl nɔ bin fɔ gɛt ples fɔ ɔl di buk dɛn we dɛn bin fɔ yus fɔ rayt dɛn.
Currently Selected:
Jɔn 21: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
