Uumama 43

1Beelti lafa Kanaani haga qarale ira hammaatte, 2duuba eegi worri Yakobo mid'aani Misiri galateeni kaani nyaate fit'e, Yakobooni waan ilmaani isaatini jed'e, Beena, dachaa, mid'aani diqo toko ammalle nuu bita.

3Ammo Yudaani waan jed'eeni, Namichi aka jaba nuti d'aame waan nuuni jed'e, Oboleesa keesaniini d'uftani male, fuula kiyya dura imbahiina. 4Yo atini oboleesa keenna nu gula ergite, nu deemne sagale sii binna. 5Yo didde, nu iyyaanuyu, wonti akanatiifi namichi waan nuuni jed'e, Oboleesa keesaniini d'uftani male, fuula kiyya dura imbahiina.

6Yakobooni waan jed'eeni, Isani maafi namichaani, Oboleesa d'ibi qamna jettani na gaargalchitani? 7Worri waan jed'eeni, Namichi waan worra keenna gaafate lakisu dide. Abbaani keesani inuma jira? Oboleesa d'ibi qabdu? nuuni jed'e. Nu gaafi isa gula akasi jenneeni. Nu akamiini beena, aka inni, Oboleesa keesaniini koota nuuni jed'u?

8Yudaani waan abbaani jed'e, Gurba na gula ergi, ammuma tana yaana, aka nu nami diqafi guddaani tokoleeni beelaani indoone. 9Dua jireenni isaa gubbaa tiyya. Yo anini nagayaani sii galche si dura ind'aabiini, haga jiru jireennale wollaali ha kiyya tahu. 10Ato akana turu baanne, sila maro lamale ya yaane dachaane.

11Abbaani waan worrani jed'e, Yo akasi male intaatu jettani, waan lafti teenna baaftu dansa ch'ufa, ta aka hampefa, dammafa, qumbifa, waan aka ogomdifa qolaatifa guura, namicha guddaa geesa. 12Ammalle beese tana male, beese subba keesati isanii deebisani taanile fuud'a, hegeri wollaalafi isanii deebisani. 13Oboleesa keesani fud'ad'a, beena yaa. 14Waaqi Guddaani namicha isani naasisinna, aka inni Benjaminifi oboleesa keesani kaani gadi deebisu. Yo ilmaani tiyya d'abu male, ha d'abuti.

15Jennaani worri waan namichaa geesani sunifi beese mid'aaniini bitatani haga duri kaani ira maro lama fuud'ani, Benjaminile woliini kaani, lafa Misiri d'aqani, fuula Yusufu dura d'ufani. 16Yusufuuni Benjamini worra birati arge jennaani waan hojattu isaatini jed'e, Worra kana mana kiyya geesa, arra saa jaa sagale woliini nyaanna, tanaafi hori qala, waan ch'ufa kurfeesa. 17Hojattuuni taani aka iti himani kaani guute worra mana Yusufuu geesite.

18Ato manati geesanu, worri nahe waan jed'e, Waan armaani nu d'ufanifi maro beese subba keenna keesati deebisanifi, amma hegeri maruma toko nu had'ani harrele teenna guuratani tisse nu tolfatani. 19Duuba fulla balbala mana isaa gahani jennaani waan nama huji mana suniti matatiini jed'ani, 20Aabbo, nu qara sagale binna jenne arma d'umne. 21Duuba karaati bulti miha hiikhanne jennaani nu namu beese qara mid'aaniini bitanne taani afaani subba keennati argine, beeseeni suni tokochi qubaleeni inhamne, amma layu sitiini d'umne. 22Ammalle beese sagaleeni bitannu d'ibiini ya d'umne. Nama beese teenna nuu deebise nu imbeennu.

23Inni waan jed'eeni, Iyyaaliina, insodaatina, Waaqi keesani, Waaqi abba keesani, beese teesani hegeri subba keesaniti deebise. Anini ufi tiyya beese teesani ya fud'ad'e jed'e, Simeoni worratiini d'ufe. 24Duuba inni worra kaani mana Yusufutiini d'ufe bisaani worri miila d'iqatu kenneefi harrele worrale mid'aani kenne. 25Duuba worri waan Yusufu d'ufeeni kaani, aka saa jaa hojja inni d'ufu iti kennu, kurfeese. Wonti akanatiifi aka worri sagale isa woliini nyaatu ya iti himani. 26Yusufuuni gale jennaani waan d'ufaninifi kaani kurfeesani itiini d'ufani durati gadi jejed'ani. 27Inni nagaya worra fuud'e waan jed'eeni, Jaarsi abba keesani ka isani baantani kaani jira? Inni baraa fayyaa? 28Aabbo, abbaani keenna inuma jira, baraa fayyaa jed'ani durati gajejed'ani.

29Yusufuuni oboleesa isaa Benjamini, ka isaani garaa, arge jennaani waan jed'e, Ila, gurbaani isani baantani, ka oboleesa keesani kaani, kana? Waaqi si eebisinna, gurba kiyya. 30Akasi jed'e jennaani maro oboleesa isaatiifi onneeni laafte bohu fed'e, worra biraa deeme dinqa olseene bohe. 31Jennaani fuula d'iqate gabahe ufi d'owe, Sagale nuu baasa jed'e. 32Yusufu sagale kobaa baasani, oboleyaani isaale akasuma kobaa baasani, worra Misirile, ka achiti nyaatu kobaa baasani, wonti akanatiifi worri Misiri worra Ebraniatini woliini nyaachaani worraa falfala. 33Oboleyaani Yusufu isati fuula deebisani tetesisani, akuma isiini d'aloota wolti aantuuni. Akasi argani jennaani woli mimilatani mamani maadefatani. 34Duuba sagale mesa Yusufuuni irati nyaatu iraa fuud'ani worra ch'ufaa kennani, ammo sagale Benjamini kennani ta worra kaani ira maro shani dabarsani. Duuba nyaatani d'ugani quufani, Yusufu woliini gammadani.

Muduunu d'abani

Currently Selected:

Uumama 43: BOR

Highlight

Copy