Uumama 42

1Yakobooni aka mid'aani Misiri jirani d'agaye jennaani waan ilmaani isaatini jed'e, Isani maani ufumaa ch'iiftani woli laaltani? 2#Huji 7.12 Lafti Misiri mid'aani qabdi d'agaye, achi d'aqa nu bita, aka nu garaachaani inhobaane. 3Duuba oboleyaani Yusufu kud'ani lafa Misiri mid'aani bitachu d'at'e. 4Ammo Yakobooni Benjamini, ka Yusufuuni garaa, Nagayaani nati ingalu karaati wo taha jed'e, oboleyaani isaa gula ergu dide.

5Akanaani ilmaani Yakobo, waan lafa Kanaanile beelti seenteefi, biyya d'ibi woliini mid'aani bitachu d'ufte. 6Yusufuuni, ka gudda lafa Misiri nama lafa ch'ufa keesaa d'ufe mid'aani iti gurgure. Jennaani oboleyaani isaa d'ufte durati lafaa gajejette. 7Yusufuuni oboleyaani isaa arge beekhe, ammo nama imbeenne ufi tolche, dubbini woworaane, Isani eesaa d'uftani? jed'e. Nu lafa Kanaaniti lafa tana sagale bitachu d'umne, jed'aniini.

8Ato Yusufuuni oboleyaani isaa fuula beekhele, worri isa fuula imbeenne. 9#Uum 37.5-10 Yusufuuni oobju waan worra oobjate taani qaabate waan jed'eeni, Isani lafa tana dooya d'uftani, aka lafti teenna woma inqamne laalu d'uftani? 10Aabbo, akananiti, nu hojattu tanteeti, sagale bitachu d'umne. 11Nuuni ch'ufti oboleyaani, nu nama d'ugaati, hameenna womaatifu ind'umne jed'aniini.

12Inni waan jed'eeni, Lakisa, akasiniti, isani akuma lafti woma inqamne laalu d'uftani. 13Worri waan jed'eeni, Nu oboleyaani kud'ani lamaati, Aabbo, ilmaani abba toko, lafa Kanaani keesati. Maand'ichi aabbo birati hafe, ammo toko injiru.

14Yusufuuni waan jed'eeni, Akuma ani qara jed'e, laki, isani dooya. 15Kara kanaani d'uga teesani laala: anini maqa Faraotiini kakhad'a, aka isani haga oboleesa keesani diqaani d'uftaniti armaa iyyaane. 16Isani nami toko deema, isa fuud'a, isani kaani inhid'ani, haga d'uga dubbi teesani arganiti. Yokhaani Maqa Faraotiini kakhad'a, isani dooyuma. 17Duuba haga guyya sadi worra hid'e.

18Guyya sadeeso Yusufuuni waan jed'eeni, Waan isani taatani, anini Waaqa sodaad'a. 19Yo isani nama d'ugaa taatani, nama toko hid'aansa keesati lakisa; isanini kaani sagale bita, worra keesani, ka garaachi fit'e, sunitini gala. 20Duuba oboleesa keesani ka maand'atiini nati koota, aka akanaani d'ugaani teesani mullatte dooti isanii hanqattu.

Worri dubbi tana ee jed'e 21waan woliini jed'ani, Me laala, nu gati daba keenna argachu jirra, ta gaafa nu oboleesa keenna dabsine, inni gaafasi naasu nu kad'ate, nu ammo nahuufi dinne; tanaafi amma gaargali kunini nu qabate.

22 # Uum 37.21-22 Reubeniini waan jed'e, Anini gaafasi, Waan tokole isa intolchina jed'e, ammo na ch'aqasu diddani. Amma gati d'iiga isaatiifi nu gaargalchani. 23Yusufuuni waan worri jed'e hubate, ammo worri aka inni hubate imbeekanne, waan afaani worra isaa deebisanifi. 24Yusufuuni worra biraa garagale bohe. Jennaani iti deebie worrani haasae Simeoni fuud'e fuula worra durati harkaafi miila wolti hid'e.

Aka oboleyaani Yusufu Kanaaniti dachaate

25Yusufuuni hojattu ufii yaame, Subba worra mid'aaniini guuta, duuba nama ch'ufa beese isaa subba isaati deebisaafi woreegale kennaafi jed'eeni; worri akasuma tolche. 26Oboleyaani taani mid'aani harreleti faate gala kaate. 27Fulla bultiti worri nami toko harre mid'aani kenna subba ufii hiikhe jennaani beese qara mid'aaniini bitate taani keesati arge. 28Oboleyaani ufiiti iyye, Kuno, beese tiyya ya naa deebisani, afaanuma subbaa teeti jed'eeni. Worra lubbuuni d'ufte, holatani waan woliini jed'ani, Aard'aa, isii Waaqi maani nuti buuse?

29Lafa Kanaaniti gara abba galani, waan tahani argani ch'ufa iti himani waan jed'ani, 30Guddaani lafa Misiri dubbi jajabdu nuuni jed'e nuti kae, Isani dooya lafa tiyya d'uftani nuuni jed'e. 31Nu dooyaniti, nama d'ugaati jenne dinne. 32Nu qara oboleyaani kud'ani lamaati, abba tokotu nu d'ale, oboleesi keenna toko injiru, ammalle maand'ichi lafa Kanaani abba keenna birati hafe jenne. 33Ammalle namichi waan nuuni jed'e, Aki anini d'uga teesani argu akana: isani nami toko ha na woliini hafu, isaniini kaani mid'aani fud'ad'a worra keesani, ka beelti balleesite suniti geesa. 34Ammo oboleesa keesani natiini koota, akanaani aka isani dooya intahiini, nama d'uga, beekha. Duuba yo suni, oboleesa keesani isanii deebise, isani yo feetani lafa tana teetani bunat'ani nuuni jed'e.

35Jennaani yo worri subba ufii hiikhe mid'aani keesaa jisse, kuno, beeseeni worri biteeni taani tana. Beese arginaani worrafi abbaaleeni nahani bakhakhani. 36Abbaani waan jed'eeni, Isani aka anini ilmaani tiyya ch'ufa d'abu feetani? Yusufuuni injiru, Simeonileeni injiru, amma Benjamini harkaa na fuud'u feetani? Jireenni ya na hammaate.

37Jennaani Reubeniini waan jed'eeni, Yo anini Benjamini siti ingaliini, ilmaani tiyya lamaanu fit'i; isa harka kiyyati lakisi, natu sitiini gala. 38Ammo Yakobooni waan jed'eeni, Gurbaani kiyya isani gula indeemu, oboleesi isaa qara due, isa ch'allati hafe. Hegeri karaati wo taha, anini ya jaare hobae, lubbu isaa dandae iraa inhafu.

Aka oboleyaani Yusufu Benjamini woliini lafa Misiriti dachaate

Currently Selected:

Uumama 42: BOR

Highlight

Copy