Uumama 39

1Duuba worri gosa Ishmaeli kaani Yusufu fuud'e lafa Misiriti geese, achiti hojattu hayyuu, ka gudda askarti mana isaa eeddu, ka Potifa jed'aniti gurgure. 2#Huji 7.9AABBO Waaqi Yusufu woliini jira, waan inni tolche ch'ufa keesa kayo kenneefi. Inni mana namicha hojatufi, ka gosa Misiri, keesati gale. 3Nami sunini aka AABBO Waaqi Yusufu woliini jiru, yokhaani aka waan inni tolche ch'ufa keesati kayo kenneefi, arge. 4Potifaani adabafi huji isaa maache, huji mana isaa harka isati lakise, waan qabu ch'ufa gudda iti tolche. 5Haga guyya suniti asi AABBO Waaqi Yusufu jed'e worra namicha Misiri sunifi waan inni manafi oobru keesa qabu ch'ufa eebiseefi. 6Duuba Potifaani waan ch'ufa harka Yusufuti lakise, sagale ufii male waan isaa kaani tokole, Maani? jed'e ira imbaane.

Yusufuuni nama d'aabafi fuula qajeela. 7Inni diqo fulla worraa tae jennaani niitiini namicha suni Yusufu guddo jaalatte, Kooti, woliini ramna jetteeni. 8Ammo inni waan jed'eeni, Akasi naa imfakaattu; guddaani kiyya waan anini arma jirufi waan mana kana tokole iraa imbahu, inni waan ch'ufa ya harka kiyyati lakise. 9Mana kana keesa naafi inni qit'e. Sii, niiti isaa male, inni waan mana kana keesa jira tokole na ind'owine. Anini duuba akami dandae waan hamtu akana kana tolche Waaqa durati ch'ubbama? 10Isiini guyya ch'ufa iti gamte, ammo inni isiini rafu dide, fulla isiini teetule tau dide.

11Ammo guyya toko, ka inni hujifi mana olseene, ka nami mana keesa hojattu tokole achi injirre, 12isiini woya isaa qabde waan jetteeni, Kooti, woliini rafna. Ammo inni woya ufii harka isiiti lakise baqate alati gabahe. 13Aka inni woya isaa harka isiiti lakise mana keesaa alati baqate agarte jennaani 14hojattu mana keesa hojatu ch'ufati iyyite, D'iiro, ilaala, namichi Ebrania ka d'iirsi kiyya mana kiyyatiini gale kaani ya nu miid'e. Reefu tana nati olseene na buufachu fed'e, ammo anini haguma dandau iti iyye. 15Aka anini iyye d'agaye jennaani woya keesaa bahe alati baqate jette.

16Jennaani haga d'iirsi galuti, woya isaa ufi bira olkeete. 17Inni gallaani, akuma kaani iti himte waan jetteeni, Tissichi gosa Ebrania, ka atini nutiini galte kaani, nati olseene na miid'e. 18Ammo anini qonqo olfud'ad'e iyye, jennaani woya keesaa bahe alati baqate.

19Namichi Yusufuuni hojatufi kaani, niitiini isaa waan Yusufu isi tolche kaani iti himnaani guddo dallane bobae. 20Inni Yusufu qabsise fulla hayyuuni iti nama hid'uti isa hid'e achumati lakise. 21#Huji 7.9 Ammo AABBO Waaqi Yusufu jaalate lakisu dide, gudda mana hid'aansale naasiseefi. 22Inni kaani nama hid'ani ch'ufa harka Yusufuti lakise, huji achiti tolchani ch'ufa gubbaa isaa tolche. 23Duuba guddaani mana hid'aansaa kaani waan Yusufuti lakise tokole ira imbaane, wonti akanatiifi AABBO Waaqi Yusufu woliini jira, waan inni tolche ch'ufa keesati kayo kenneefi.

Aka Yusufuuni oobju worra hid'ani hime

Currently Selected:

Uumama 39: BOR

Highlight

Copy