Uumama 38

1Gaafasi Yudaani oboleyaani isaa biraa deeme nama toko ka Hira jed'ani, ka Adulamuti d'alate, woliini tae. 2Achiti Yudaani intala gosa Kanaani, ta abbaani isii Shua jed'ani, arge fuud'e. 3Isiini ilma Eri jed'ani d'alteefi. 4Ammalle garaachoofte ilma lameeso d'alteefi, maqa Onani baafteefi. 5Ammalle gaafa Yudaani Kesibu jiru, ilma d'alteefi maqa Shela baafteefi.

6Yudaani ilma isaa ka angafa, ka Eri jed'ani, intala Tamari jed'ani toko kad'ateefi fuusise. 7Eriini nama hama, hameenni isaa suni Waaqa dallansiise, tanaafi Waaqi isa ijeese. 8Jennaani Yudaani waan Onani oboleesa Eritiini jed'e, Niiti oboleesa kanketi d'aali, ilme kosi lakisiifi. 9Ammo Onaniini aka ijoolleeni sunini ta isaa intaane beennaani, yo niiti suni bira bule ch'ufa gudeeda d'iira lafati naqe, aka oboleesi isaa ijoolle inarganne. 10Wonti inni tolche suni AABBO Waaqa diqole ingammachiimne, tanaafi AABBO Waaqi isale ijeese. 11Jennaani Yudaani waan niiti ilma isaa, ta Tamari jed'aniini jed'e, Worra si d'aleti gali, haga gurbaani kiyya Shelaani guddatuti d'iirsa male tai. Wonti inni akasi jed'eefi, waan hegeri much'a kanale, akuma oboleyaani isaa ijeesani, isale ijeesani sehe sodaate. Eegi suni Tamariini worra isii d'aleti galte.

12Eegi bulti diqo niitiini Yuda doote. Hamtu baafannaani isaafi jaala isaa Hiraani, ka worra isaani Adulamu, gara Timna, fulla ree isaa dabassa iraa ch'irani d'aqani. 13Namichi toko waan Tamariini jed'e, Abbaani d'iirsa keeti ya gara Timna dabassa ree iraa ch'irachu d'aqe. 14Duuba isiini woya hamtu taani baafatte woya d'ibi keeyatte fuula hagogatte fullo Enaimu, ka karaani Timna ke bahu, ke teete. Wonti isiini akasi taateefi, aka Shelaani ato guddatele isi imfuune beeti.

15Yudaani isi arginaani sharmut'a sehe, waan isiini fuula hagogatteefi. 16Inni kara d'aatuti isii gore waan jed'eeni, Hori hagami nama iraa fud'atta? (Inni aka isiini niiti ilma isaa imbeekhu.) Isiini waan jetteeni, Hagami naa kennita? 17Inni waan jed'eeni, Ilme toko ree tiyya keesaa sii kenna. Jennaani isiini waan jette, Qabdo naa kenni, haga reeni d'uftuti. 18Inni, Maani aka qabdo sii kenna? jed'e gaafate. Isiini waan jetteeni, Beesisa morma qabdufi haada isaatiifi ule deemtuuni suni. Duuba inni iti kenne bira bule garaacheese. 19Tamariini galte hagogo taani ufiraa fuute woya ufii ta hamtu taani keeyatte.

20Eegi suni Yudaani jaala ufii Hira ilme reetini erge, aka niitiini miha qabdo kaani deebiftufi, ammo Hiraani isi barbaade d'abe. 21Inni waan worra lafa sunitini jed'e, Sharmut'itiini onana kara kana d'aatu teetu me? Nu takuma sharmut'a asi ingarre jed'aniini.

22Inni Yudati deebie waan jed'eeni, Anini ya isi barbaade, d'abe, worri lafa sunileeni, Sharmut'i taka achi ind'umne naani jed'e. 23Yudaani waan jed'eeni, Nu nama nu koblu imfeenu, laki, waan suni ch'ufa ha taatuuni. Anini ya ilme ree isii erge, ammo siti isi d'abe male.

24Eegi jii sadi dabre, nami toko waan Yudaani jed'e, Intalti tante Tamariini ya sharmut'a taate garaachoofte. Yudaani waan jed'e, Gabaasa, guba yoosi. 25Ato gabaasu jiranu, qonqo gara abba isii Yuda ergite waan jette, Nami na garaacheese abba miha kana, ilaali, abba miha kana mid'aafad'u, beesisa kanafi haada isaatiifi ule tanale abba himi.

26Yudaani waan kana hubate waan jed'e, D'ugaani tama isiiti, anati wollaale, sila ilmi kiyya Shelaani isi fuud'uu male. Duuba Yudaani iti deebie isiiti indeebine.

27Guyyaani ala hobae jennaani, aka isiini lakoole d'altu argani. 28Ato isiini ch'ininfattu, daimi toko harka gabaafate. Niitiini deesisu jirtu harka daima suni qabde liilana diima iti hite waan jette, Kuno, ka angafa kana. 29Ammo daimi kaani harka keesa deefate, oboleesi isaa durati d'alate. Jennaani niitiini deesiftu taani waan jette, Atini akanuma irreeni keesaa baata! Tanaafi maqa Peresi baasanifi. 30Duuba oboleesi isaa ka liilana diima harkaa qabu d'alate, maqa isaa Zera baasanifi.

Yusufufi niiti Potifa

Currently Selected:

Uumama 38: BOR

Highlight

Copy