VAROMA 16

Milembe chia Paulu

1Mbikhanga mu makhono kenyu mwana wi shikhana weru Fwebe, uli murumishi wi likanisa lia Kengureha. 2Mumwinjilitsi khuvirila mu lira liu Mwami, khuli vandu va Nyasaye vakholanga. Mumukhonye shia shindu shiosi shia yenyanga mumuhe; shichila wakhonya vandu vanyishi, khali inzi mwene nanyolakhu vukhonyi khurula khuye.

3Mbananga milembe chianje khu Prisila nende Akwila, nivali vahinzili vashianje mu muhinzilu kwa Yesu Kristo. 4Vihonolokha khukhutsa shichila inzi. Shikali ninzi wonyene wenyanga khuvasanditsa tawe; navutswa khali makanisa koosi ka vandu vi tsimbia tsindi nako ka vasanditsanga. 5Mbananga milembe khu likanisa livukanilanga mu inzu yavo.

Muhaane milembe khu mulina wanje wa nayaanza Epaheneta, wali wukhuraanga mu lusomo lwa Asia khusuuvila mu Kristo. 6Muhaane milembe khu Mariya, wakhola muhinzilu kwekwe ni tsingulu shichila munyi. 7Muhaane milembe khandi khu Andulonika nende Yunia, nivali Vayahudi vashianje va khwavohwa navo mucheela. Ni vandu vamanyikhana muno mu varumwa; khandi navo vali vu khuraanga khuva Vakristayo inzi nishili.

8Muhaane milembe chianje khu Ampiliata, mulina wanje wa nayaanza mu Mwami. 9Muhaane milembe khandi khu Uribanu, uli murumishi washianje mu muhinzilu kwa Kristo; khandi khu Sitaku, uli mulina wanje wa nayaanza. 10Muhaane milembe khu Apele, uli musuuvilwa wayaanza Kristo. Muhaane milembe chianje khu vandu voosi varulanga mu inzu ya Arisitobula. 11Muhaane milembe khu Herodioni, uli Muyahudi washianje; khandi khu Vakristayo vali mu inzu ya Narikisu.

12Muhaane milembe chianje khu Turufena nende Turufosa, vakholanga muhinzilu ku Mwami; khandi khu mulina wanje wa nayaanza Perisi, wakhola ni tsingulu tsiosi muhinzilu ku Mwami. 13Muhaane milembe chianje khu Rufu, wamanyikhana akholanga ni tsingulu muhinzilu ku Mwami; khandi khu mama wewe, umbukulanga shia khase khosi khuli mwana wewe. 14Muhaane milembe chianje khu Asinikurita, Fulekoni, Herime, Paturoba, Herima, nende vasuuvili vandi vamenyanga navo. 15Muhaane milembe khu Filoloku, Yulia, Nireha nende mbotso wewe, khandi khu Olimpa khandi khu vandu va Nyasaye voosi vamenyanga navo.

16Muheelelane vene khuvene milembe chi shimanyilu shiu vuyaanzi. Makanisa koosi ka Kristo kamuheele milembe.

Mivaalo Kukhumalilikha

17Vasuuvili vashianje, musayanga numuyaanza: Muheenze mumanye vandu valeranga liavukhana khandi vakoyanyinya lisuuvila lia vandu khwambakhana khulonda mechitso ka mwechitswa. Muve ihale wene khurula khuvo! 18Vandu vakholanga vindu khuli vienevo, shikali varumishilanga Mwami weru Kristo tawe; navutswa likomba li mivili chiavo vene. Valomolomanga vulahi nivakaatilitsa vandu vavula vutamanu vwosi. 19Shia mundu wosi wahulila makhuva khulondokhana khuli muli vasuuvilwa khu Ivanjeli; khandi shichila shivune shienesho ndi nu vuyaanzi vunyishi shichila munyi. Navutswa nyenyanga muve nu vusitsa khu kali malahi, khandi muvuli khuva nu vutamanu mu vindu vitamanu. [ 20Nyasaye, uli shirula shieru shi milembe, aliitsa khumukhonya khukuura Shetani. Timbavasi tsiu Mwami weru Yesu tsive na munyi voosi.]#16:20 Mahandiko kandi kavula luvaso lwa 20.

21Muhinzili washianje Timoteo, umuheele milembe chiechie; khali Lukia, Yasoni, nende Sosipateri, nivali Vayahudi vashianje, vamuheele milembe.

22Inzi Teritia, uli muhandichi wahandika ibarwa iyi, muheele milembe chianje khuvirila mu Mwami.

23Mundu wa nzinjilitsa ulaangwangwa Gayo, wi likanisa livukanilanga munzu mwemwe umuheele milembe chiechie. Erasito, mundu uvikhanga tsisenti mu litaala likali, halala nu musuuvili washieru Kwarita, vamuheele mulembe chiavo. [ 24Tsimbavasi tsiu Mwami weru Yesu Kristo tsive na munyi voosi].#16:24 Mahandiko kandi kakhale kavula luvaso 24, kandi kameetakhu luvaso yulu imbeli wu luvaso 27.

Lisaala Liukhumalilikha liu Khwitsominya

25Chendi khuhaane vukhumi khu Nyasaye! Ali nu vunyali vu khumulomba khuva ni tsingulu mu lisuuvila lienyu, shichila Ivanjeli ya nzilwatsanga khulondokhana khu Yesu Kristo; khandi khuli khwamanyinywa katoto kali nikaviswa mumatukhu kavira. 26Navutswa nunundi, katoto kenako kalerwa havulavu khuvirila mu mahandiko ka vaprofeti; khandi khuvirila mu lilako lia Nyasaye wi mihika ni mihika kamanyikhane khu vandu vi tsimbia tsiosi mu shivala, khu voosi valisuuvila khandi valikalonda.

27Nyasaye, uli nu vusitsa vwosi, aheelwi vukhumi khuvirila mu Yesu Kristo mihika ni mihika. Amina.

Currently Selected:

VAROMA 16: LLLCATHOLIC

Highlight

Copy