VAROMA 15

Muyanzitsikhu Vandi, Muvuli Khwiyaanzitsa Vene

1Khutsi va khuli ni tsingulu mu lisuuvila khutukha khukhonye vandu vateteshele mu matiinyu kavo. Khuvuli khwiyaanzitsa vene. 2Shia mulala khu khutsi khutukha ayaanzitsi mureende wewe khumukholela malahi, khandi khumumbakha mu lisuuvila. 3Shikali Kristo yali wayiyaanzitsa mwene tawe. Navutswa khuli Mahandiko Matakatifu kavoolanga,

“Manyeko ka mwanyekwa nako khandi ka nanyekwa.”

4Shia shindu shiosi shiahandikwa mu Mahandiko Matakatifu, shiahandikwa khulu khwechitsa khutsi, khu khuve ni lisuuvilitswa khuvirila mulikhutsila nende litinyilitswa lia Mahandiko Matakatifu ka khuheetsanga. 5Nyasaye uli khuli shirula shiu vwikhutsili nende litinyilitswa, amuhe mwoyo ku khumukhola muhambane mu limenya lienyu, khulondokhana khuli Yesu Kristo yakholanga, 6khu munyi voosi khuvirila mu mwoyo mulala mulikhuminya Nyasaye, uli Tata wu Mwami weru Yesu Kristo.

Ivanjeli ni ya Vandu vi Tsimbia Tsindi

7Khulwa yako, mwinjilitsane vene khuvene, khuli Kristo yamwinjilitsa, khwenya khuhaana vukhumi khu Nyasaye. 8Muvoolelanga ndi Kristo yali murumishi wa Vayahudi, khumanyinya ndi Nyasaye nu musuuvilwa, khandi khurweshitsa lilaaka lia yali ni yalaaka vakuuka vavo; 9khulwa yako, vandu vi tsimbia tsindi valikhuminya Nyasaye, shichila tsimbavasi tsietsie. Khuli Mahandiko Matakatifu kavoolanga,

“Khulwa yako, niitsa khukhwitsominyila mu vandu vi tsimbia tsindi;

khandi khwimbile tsinyimbo tsiu khukhwitsominya.”

10Mahandiko Matakatifu kavoolanga khandi,

“Munyi vandu vi tsimbia tsindi, muve nu vuyaanzi,

halala na vandu va Nyasaye!”

11Kavoolanga khandi,

“Munyi vandu vi tsimbia tsindi tsiosi, mwitsominye Mwami;

mumwitsominye, munyi vandu voosi!”

12Muprofeti Isaya atsilililanga khuvoola,

“Mwitsukhulu wa Yese aliitsa khulolekha;

neye uliitsa khwamiha vandu vi tsimbia tsindi,

neye wa valiitsa khuvikhamu lisuuvilitswa.”

13Nyasaye, uli shirula shi lisuuvilitswa, amukhole khuva nu vuyaanzi vwosi nende milembe khurulana khu lisuuvila lienyu, khu mutsililile khuva ni lisuuvilitswa linyishi khuvirila mu Roho Mutakatifu.

Muhinzilu kwa Paulu

14Vasuuvili vashianje, ndi ni lisuuvilitsa liatoto shichila munyi, lwa mukholanga vindu vilahi mu vunyishi, mwayitsula vucheli khulondokhana khu shia shindu shiosi, khandi munyala khwechitsana vene khuvene. 15Navutswa muhandichilikhu shindu vuchila khuria, khwenya khumwitsushitsa mumanyekhu shindu, shichila tsimbavasi tsia Nyasaye yamba 16khu mbe murumishi wa Yesu Kristo khu vandu vi tsimbia tsindi. Kholanga muhinzilu khuli musalisi, lwa nzilwatsanga Ivanjeli ya Nyasaye, khu shihanwa shia vandu vi tsimbia tsindi valihaana shilihuchililwa, nishili shihanwa shiatakaswa khuye, khuvirila mu Roho Mutakatifu. 17Khulwa yako, nzilolelanga muhinzilu kwakholelanga Nyasaye khuvirila mu Kristo. 18Shinyala khuria khuvoolakhu shindu shiosi tawe. Navutswa navoola vutswa makhuva khulondokhana khu ka Kristo yarweshitsa khuvirila mwinzi, khulomba vandu vi tsimbia tsindi khusuuvila mu Nyasaye, khuvirila mu ka navoola nende vikholwa, 19khuvirila mu tsingulu tsi viloleshitsu nende vindu viu khuchenyinya; khandi khuvirila mu tsingulu tsia Roho wa Nyasaye. Khulwa yako, lwa narula Yerusalemi nimbotokhana khutsia khutukha mu litaala lia Ilurikumu, ni kilikali, nayilwatsa Ivanjeli khulondokhana khu Kristo. 20Nzikombanga shia khase khosi khwilwatsa Ivanjeli havundu ha Kristo ashili khumanyikhanakhu khali hati hene, khu mbuli khuva nzilwatsanga havundu ha vandu vandi vilwatsa khale. 21Khuli Mahandiko Matakatifu kavoolanga,

“Vandu vali nivashili khuvoolelwakhu shindu khulondokhana khuye, valiitsa khulola,

khandi yavo vashili khuhulilakhu shindu khulondokhana khuye, valiitsa khuva ni limanya.”

Paulu Yaloshitsa Khuli Acheniha Roma

22Nashio shivune shinzikalilanga shia khase khosi nimbula khwitsa khumuchendelela. 23Navutswa nunundi, lwa mali khukhola muhinzilu kwanje mu tsisomo tsinu; khandi shichila nali na mahulu khumihika minyishi khwitsa khumulolakhu, 24ndi ni lisuuvilitswa liu khwitsa khumulolakhu lwa mba ninzitsanga mu shivala shia Sipania. Ndi ninganakani yu khumuchendelela, lwa niitsa khuva nimbiranga khandi nakhayaanzi mukhonye khu luchendo lwanje lu khutsia iweneyo, nimenyikhu na munyi khumatukhu mati. 25Navutswa nunundi, ndi khu luchendo lu khutsia Yerusalemi khu muhinzilu ku khukhonya vandu va Nyasaye vamenyayo. 26Makanisa mu tsisomo tsia Mekadonia nende Akaya kayirulitsa nu mwoyo mulala khuhaana vukhonyi khu vandu vamanani mu vandu va Nyasaye vali Yerusalemi. 27Kayaanzitswa khukhola ndio; khandi toto ni likoovi khuko. Navutswa khuli kuli mwiima, khutukha ka vakhonye. Niiva Vayahudi vasanganga mu tsikhaavi tsia Nyasaye, halala na vandu vi tsimbia tsindi, khutukha vandu vi tsimbia tsindi varumishile miandu chiavo khukhonya Vayahudi. 28Lwa mba ninakhamala muhinzilu yuku, khandi ninakhavaha tsisenti tsiosi tsiasololwa khuvakhonya, niitsa khutsia mu shivala shia Sipania; niitsa khumuchendelela lwa mba nindi khu luchendo lwanje. 29Lwa muchendelela, manyi ndi niitsa khumulerela mu vunyishi tsikhaavi tsia Kristo.

30Vasuuvili vashianje, musayanga numuyaanza khuvirila mu Mwami weru Yesu Kristo, khandi khuvirila mu vuyaanzi vwa Roho ahaananga, ndi musanje ninzi khusaala nu mwoyo kwosi khu Nyasaye. 31Musaalilikhu ndi nzihonoloshe khurula mu vandu vambakhana khusuuvila mu lusomo lwa Yudeya; khandi ndi muhinzilu kwanje kulihuchililwa na vandu va Nyasaye vamenyanga mu Yerusalemi. 32Khulwa yako, niiva ni lienya lia Nyasaye, niitsa khumuchendelela nindi nu vuyaanzi khandi nilihulukha na munyi. 33Nyasaye uhaananga milembe ave na munyi voosi. Amina.

Currently Selected:

VAROMA 15: LLLCATHOLIC

Highlight

Copy