VAROMA 14

Muvuli Khwikhalachila Vene Khuvene

1Mwinjilitsi mundu wateteshela mu lisuuvila; navutswa vuchila khuhangalitsana mulilomoloma khu ka ali nako mu mwoyo kwekwe. 2Mundu mulala ali ni lisuuvila liu khulia shia shindu shiosi, navutswa mundu wateteshela mu lisuuvila, aliitsanga tsingutsa tsionyene. 3Mundu uliitsanga shia shindu shiosi, avuli khulechelitsa mundu ukhaliitsanga. Mundu uliitsanga shia shindu shiosi, avuli khukhalachilakhu mundu uliitsanga tsingutsa tsionyene; shichila Nyasaye wamuhuchilila. 4Yivi uli viina khukhalachila murumishi wurumishilanga wundi? Muruchi wewe mwene neye unyala khumanya niiva anyala khukuura inoho khuvula khukuura. Khulwa yako, anyala khukuura, shichila Muruchi ali ni tsingulu tsiu khumukhonya khukuura.

5Mundu mulala akanakananga ndi litukhu lilala ni lilahi muno khuvira kandi; navutswa wundi akanakananga matukhu koosi khuva malala. Nu vulahi shia mulala khu munyi nalondi mwene tsinganakani tsietsie. 6Mundu ukanakananga litukhu lilala ni lilahi muno, akholanga ndio khulu khuha Mwami luyali. Mundu uliitsanga shia shindu shiosi, akholanga ndio khulu khuha Mwami luyali, shichila asanditsanga Nyasaye. Mundu ukhaliitsanga shia shindu shiosi, akholanga ndio khulu khuha Mwami luyali, khandi asanditsanga Nyasaye. 7Mundu avulakhuho khu khutsi wimenyelanga mwene, khandi avulakhuho unyala khukhutsa shichila ye mwene. 8Niiva khuli mwoyo, kalolekhanga khuli mwoyo shichila Mwami. Niiva khukhutsanga, khukhutsanga shichila Mwami. Khulwa yako, niiva khuli mwoyo inoho khukhutsanga, voosi khuli vu Mwami. 9Nashio shivune shiachila Kristo nakhutsa, khandi niyisimukha khurula mu likhutsa, khu aliva Mwami wa vandu vakhutsa nende vali mwoyo. 10Shichila shina ukhalachilanga musuuvili woshio? Inoho shichila shina umulechelitsanga? Khutsi voosi khuliitsa khusinjila imbeli wa Nyasaye khukhalachilwa. 11Mahandiko Matakatifu kavoolanga,

“Mwami avoolanga, ‘Toto, lwa ndi Nyasaye uli mwoyo

shia mundu wosi aliitsa khusikamila,

khandi shia mulala aliitsa khunzitsominya inzi Nyasaye.’ ”

12Khulwa yako, shia mulala khu khutsi aliitsa khuvoolela Nyasaye shia shindu shiosi shia ye mwene yakhola.

Uvuli Khwisikaritsa Woshio

13Chendi khuvuli khwikhalachila vene khuvene. Navutswa khuchelitsi khuli khunyala khulekha khulomba musuuvili woshio khwisikarila inoho khukwa mu vwoni. 14Lwa ndi mu Yesu Kristo, ni kilikali manyi ndi shiukhulia shivulakhuho shitamanu. Navutswa niiva mundu aliitsa khusuuvila ndi shiukhulia shilala ni shitamanu, nalwo lwa shiukhulia shienesho shiliitsa khuva shitamanu khuye. 15Niiva uliitsa khusalilitsa musuuvili woshio, shichila shiukhulia shiuliitsanga, kalolekhanga uvula vuyaanzi khuye. Uvuli khuhuchililakhu shiukhulia shiuliitsanga khwononyinya mundu wa Kristo yakhutsila! 16Ukhahuchililakhu shindu shia ulolanga ni shilahi khulolwa na vandi khuva shitamanu tawe. 17Vwami vwa Nyasaye shiuvulikhuho shichila khulia nu khung'wa tawe; navutswa vuliho shichila likhola liu vulunji, milembe, nende vuyaanzi khuvirila mu Roho Mutakatifu. 18Mundu wurumishilanga Kristo munjila khuli iyi, ayaanzitsanga Nyasaye, khandi neye wa vandu vahuchililanga.

19Khulwa yako, khutukha khukhole shia khase khosi vindu vileranga milembe, khandi vikhukhonyanga khuva ni tsingulu vene khuvene. 20Muvuli khwononyinya muhinzilu kwa Nyasaye, shichila shiukhulia. Ni kilikali, shia shindu shiosi ni shilahi, navutswa nu vutamanu khu mundu khulia shindu shinyala khuchila vandi vakwi mu vwoni. 21Nu vulahi khuvula khulia inyama inoho khung'wa idivai inoho khukhola shindu shindi shiosi shinyala khuchila musuuvili woshio akwi mu vwoni. 22Lisuuvila lia uli nalio, khutukha ulilombe live liolio mwene nende Nyasaye wowo. Ali ni ikhaavi mundu uvula shivune shinyala khumukhola khwikhalachila mwene khulondokhana khu koosi ka alolanga malahi. 23Navutswa mundu uhaya hayanga mu mwoyo kwekwe, aliitsa khukhalachilwa niiva aliitsa khulia, shichila shialiitsanga shiukhulia shienesho khurulana khu lisuuvila tawe. Shia shindu shiosi shikharulananga khu lisuuvila, nu vwoni.

Currently Selected:

VAROMA 14: LLLCATHOLIC

Highlight

Copy