LUKA 14

Yesu Yahonyinya Mundu Walwala

1Khulitukhu lindi li Lisabato, Yesu yasimukha natsia khulia mu inzu yu mulala khu vimilili va Vafarisayo; vandu nivamuheenzishitsi. 2Mundu wali niyavimba makhono nende vilenje yitsa khu Yesu. 3Yesu yalomoloma khu veechitsi va Malako nende Vafarisayo, navareeva, “Malako keru kahuchililanga khuhonyinya khulitukhu li Lisabato inoho khuvula khuhonyinya?”

4Navutswa vahonjela. Khulwa yako, Yesu yavukula mundu mwenoyo, namuhonyinya, namuvoolela atsi. 5Yesu yareeva vandu, “Niiva mulala khu munyi ali nu mwana#14:5 mwana: Mahandiko kandi kakhale kavoolanga “Ipunda.” inoho ihili ikwili mu vwina khulitukhu li Lisabato, aliitsa khulekha khumukhwesesa khurulamu?” 6Navutswa vakhaywa khumuchipa.

Vwichehitsi nende Vwinjilitsi

7Lwa Yesu yalola khuli vacheni vavukula visoko viu luyali hamesa, yavavoolela lukanu yulu: 8“Lwa mundu avetsanga namulaanji mu shiselelo shiu khuhilana, muvuli khwikhalakhu havundu hali nu luyali, shichila mundu wundi uli nu vunyali khumuvira anyala khuva ni yalaangwa; 9khandi mundu wamulaanga munyi vavili, anyala khwitsa amuvoolele, ‘Sinjilila mundu uyu,’ na uliitsa khulola tsisoni luvoolelwa wikhale havundu hakhatushili. 10Navutswa lwa uvetsanga nulaanjilwi, yikhala havundu hakhatushili, khu lwa mundu wakhulaanga yitsa, akhuvoolele, ‘Mulina, yikhala havundu hali nu luyali yaho’; ma uheelwi luyali mu vacheni voosi valaangwa. 11Mundu wikalihitsanga mwene khuvira vandi, aliitsa khuchehitswa, khandi mundu wichehitsanga mwene, aliitsa khuheelwa luyali.”

12Yesu yavoolela mundu wali namulaanji, “Lwa uvetsanga nuhaana shiukhulia shiu mbasu inoho shiu khulukolovo, uvuli khulaangakhu valina vovo inoho vamwavo vovo inoho viikho vovo inoho vareende vovo vahinda; shichila navo valiitsa khukhulaanga khandi, vave vakhurunji ka wakhola. 13Navutswa lukholanga mulukha kwi lilia, laanga vandu vamanani, vafwokoya, valema, nende vavekhu; 14khandi uliitsa khukasitswa, shichila vavula lwa vanyala khukhurunga. Nyasaye aliitsa khukhurunga khulitukhu lia vandu valahi valiitsa khwisimushitswa khurula mu likhutsa.”

Lukanu khu Mulukha Kwililia Mukali

(Mat 22:1-10)

15Lwa mulala khu vandu vali nivikhale nivaliitsanga shiukhulia ha mesa na Yesu yahulila ndio, yavoolela Yesu, “Vali ni ikhaavi yavo vikhalanga nivalia mu mulukha kwi lilia mu Vwami vwa Nyasaye!”

16Navutswa Yesu yamuvoolela, “Litukhu lindi, mundu mulala yalomba mulukha kwi lilia mukali, nalaanga vandu vanyishi. 17Lwa litukhu liu mulukha kwi lilia liali ni liakhatukha, mundu mwenoyo yaruma murumishi wewe khuvoolela vandu vali nivalaanjilwi, ‘Hambi; shichila vindu viosi vimali khwirecheshitswa nunundi.’ 18Navutswa vandu voosi varaanga khuhaana vivune viavo viu khuvula khwitsa. Mundu wukhuraanga yamuvoolela, ‘Nguli mulimi; khutukha nzi khukulola; khusayanga nuyaanza umbele, mbula vwiyangu.’ 19Wundi khandi navoola, ‘Nguli tsihili likhomi tsiu khulimila khandi nyenyanga khutsia khutsichelitsa; khusayanga nuyaanza umbele, mbula vwiyangu.’ 20Wundi yavoola, ‘Mbili mukhali vwangu yuvu, khulwa yako, shinyala khwitsa khukhulola tawe.’

21“Murumishi woyo yakalukha navoolela muruchi wewe shia shindu shiosi shia vali nivavooli. Muruchi mwenoyo yali nu vurima, navoolela murumishi wewe, ‘Simukha utsi vwangu mu mihaanda nende tsinjila tsianyeleha tsi litaala; khandi ulere hanu vandu vamanani, vafwokoya, vavekhu nende valema.’ 22Murumishi woyo yavoola, ‘Mwami, mali khukhola shia shindu shiosi shiumbolele; navutswa khushilimu nu vwiyangu vwa vandi.’ 23Khulwa yako, muruchi mwenoyo yamuvoolela, ‘Simukha utsi mu mihaanda nende tsinjila tsianyeleha, uvoolele vandu khwitsa khwinjilamu, khu inzu yanje yitsuli. 24Muvoolelanga munyi voosi ndi khali mulala khu vandu vali nivalaangwa venavo, aliitsa khuvula khuliakhu shiukhulia shianje.’ ”

Khuva Mwechi wa Yesu Nukhuvoola Shina?

(Mat 10:37-38)

25Vituma vikali via vandu valonda Yesu. Yesu yishevukha navavoolela, 26“Niiva mundu yenyanga khunonda khutukha yambakhane tata wewe nende mama wewe, mukhali wewe, vamwavo veve nende vambotso veve, khali vulamu vwevwe mwene; nakhayilwi khukhola ndio, shianyala khuva mwechi wanje tawe. 27Mundu wambakhananga khuchinga musalaba kwekwe nu khunonda, shianyala khuva mwechi wanje tawe.

28“Niiva mulala khu munyi yenyanga khumbakha munaara, aranganga khwikhala hasi amanye vukuuli vu munaara kwenoko kunyala khuvukula, niiva ali ni tsisenti tsinyala khumala muhinzilu kwenoko. 29Nikakhavele kario, niyaraanjitsa musinji, navutswa shiali nu vunyali vukhumala khumbakha tawe, vandu vavetsanga nivaloli kakholekhanga varaanganga khumukholela shihenye henye; 30nivavoola, ‘Mundu uyu yilukhachila khumbakha, navutswa yakhaywa khumala muhinzilu.’

31“Inoho, nu mwami shina, atsitsanga khukwana nu mwami wundi, avulanga khwikhala hasi nu khwireevana niiva alarumishila vasikali veve tsiheelefu likhomi khutsia khukwana nu mwami wundi uli na vasikali tsiheelefu makhomi kavili? 32Niiva avula tsingulu tsiu khumukwana, lwa mwami wundi woyo avetsanga nashili ihale wene, arumanga murumwa wewe khutsia khureeva makhuva ku khulera milembe. 33Munjila indala yeneyo, mundu avulakhuho mu munyi unyala khuva mwechi wanje, nakhaleshi shia shindu shiosi shiali nashio.

Munyu Kwakoritsa Shinochi

(Mat 5:13; Mk 9:50)

34“Munyu nu mulahi; navutswa niiva munyu kwakoritsa shinochi shiakwo, kwa khakholwa kurina khuva munyu khandi? 35Kuvulakhu vukhonyi vwosi khu mulimi inoho khuva imboleya; shichila vandu vakusiuvanga ihale. Mundu uli na maroyi ku khuhulila, ahulishitsi.”

Currently Selected:

LUKA 14: LLLCATHOLIC

Highlight

Copy