LUKA 13

Khwenya Vandu Khwikanila

1Mumatukhu kenako, vandu valala vali nivaliho vali nivavoolela Yesu makhuva khulondokhana khu Vagalilaya va Pilato yali ni yiira, lwa vali nivahaananga vihanwa viu khukholela misango khu Nyasaye. 2Yesu yavareeva, “Mukanakananga Vagalilaya venavo vali vakhola vwoni vunyishi khuvira Vagalilaya vandi voosi, kachila viirwa munjila yeneyo? 3Muvoolelanga, shikali kario tawe! Navutswa niiva mushili khwikanila khurula mu vwoni vwenyu, khali munyi voosi muliitsa khukhutsa khuli vo vakhutsa. 4Inoho ni shina shia khunyala khuvoola khulondokhana khu vandu likhomi na munane vakhutsa lwa munaara kwa Silohamu kwakwa khuvo? Mukanakananga navo vakhola vwoni vunyishi khuvira voosi vamenyanga mu Yerusalemi? 5Muvoolelanga, shikali kario tawe! Navutswa nu mushili khwikanila khurula mu vwoni vwenyu, khali munyi voosi muliitsa khukhutsa khuli vo vakhutsa.”

Lukanu khu Musala ku Mukhuyu Kwakhama Matunda

6Nalwo lwa Yesu yavoola lukanu yulu: “Khwaliho nu mundu wali niyaraaka musala ku mukhuyu mu mulimi kwekwe kwi misabibu. Mundu mwenoyo yasimukha natsia khwatuula litunda khu musala kwenoko, navutswa avulakhu litunda liosi lia yanyola khu musala kwenoko. 7Khulwa yako, yavoolela musembeleli wu mulimi kwekwe, ‘Lola, khumihika chivaka yichi menyi ninzitsanga khwatuula litunda khurula khu musala ku mukhuyu yuku: navutswa mbulakhu litunda liosi lianyolakhu. Kureemele hasi! Shichila shina kutsililile khumala vunuulu vwa malova?’ 8Navutswa musembeleli mwenoyo yachipa mwene mulimi, ‘Mwami, kwivale kuve, mukuhe muhika kundi; nzitsanga khukusembelela khandi ndekhu imboleya. 9Niiva kulama matunda khumuhika kulondakhu, vuliitsa khuva vulahi muno! Navutswa niiva shiukunyala khwama matunda tawe, unyala khukureemela hasi.’ ”

Yesu Yahonyinya Mukhali Walema Khulitukhu li Lisabato

10Litukhu lindi li Lisabato, lwa Yesu yali niyechitsanga mu lisinagogi, 11yalola mukhali wundi nalimu wi litimoni liali ni lialwalitsa khumihika likhomi na munane. Yali wakokhoma mukongo khandi avulakhu khuli yali wanyala khukololokha. 12Lwa Yesu yamulola, yamulaanga, namuvoolela, “Mukhali yivi, umali khuhona khurula mu vulwale vwovwo.” 13Khulwa yako, Yesu yavikha makhono keke khuye, nakololokha vwangu, khandi niyitsominya Nyasaye.

14Navutswa mwimilili wi lisinagogi yali nu vurima, shichila Yesu yali nahonyinyi mundu khulitukhu li Lisabato. Yavoolela vandu, “Khuli na matukhu sita ku khukhola mihinzilu. Hambi mumatukhu kenako muhonyinywi, navutswa khulitukhu li Lisabato tawe.”

15Mwami yamuchipa, “Munyi vamwikhola kholanga khuva valunji! Mulala khu munyi shia vohololanga ihili inoho ipunda yeye khurula mushiko, khuchihila khung'wa matsi khulitukhu li Lisabato? 16Mukhali uyu shiali mwitsukhulu wa Aburahamu, wa Shetani yanyashitsa khumihika likhomi na munane; shianyala khuvula khuhonyinywa khurula mu vulwale vwevwe khulitukhu li Lisabato?” 17Lwa Yesu yali nashivoolanga ndio, vatsiku veve voosi valola tsisoni; ma vandu voosi nivikhoya khulondokhana khu vindu viosi viu khuchenyinya via yali nakholi.

Lukanu khu Lukuutsa Luti Muno

(Mat 13:31-32; Mk 4:30-32)

18Yesu yareeva, “Vwami vwa Nyasaye vuli khuli shina? Ni shina shia khunyala khusasanyinyakhu? 19Vuli khuli lukuutsa lutititi muno lwa mundu yavukula namitsa mu mulimi kwekwe. Lwameela nu kuva musala, ma manyonyi kiitsa, nikumbakha vitsu viako mutsisia tsiakwo.”

Lukanu khu Mamela

(Mat 13:33)

20Yesu yareeva khandi, “Ni shina shianyala khusasanyinya khu Vwami vwa Nyasaye? 21Vuli khuli mamela ku mukhali yavukula natsukanyinya mutsilita makhomi kane tsiu vusi khutukha lwa shinokho shiosi shiavimba.”

Muliango Munyelele

(Mat 7:13-14,21-23)

22Yesu yasimukha nakhalakanyila mu mataala nende mu michitsi niyechitsanga nali khu luchendo lwelwe lu khutsia Yerusalemi. 23Mundu wundi yamureeva, “Mwami, ni isavu indititi yonyene ya vandu valiitsa khuhonyinywa?” Yesu yavachipa, 24“Muchelitsi khwinjila khuvirila mu muliango munyelele; shichila ni kilikali vandu vanyishi valiitsa khuchelitsa khwinjila khuvirilamu, navutswa valiitsa khukhaywa khwinjila. 25Mwene inzu aliitsa khusinjila yikale muliango; lwa muliitsa khuva numusinjile ilwanyi numwikulitsanga muliango, numuvoola, ‘Mwami, khwikulili muliango!’ Aliitsa khumuchipa, ‘Shinyala khumanya wamuruli tawe!’ 26Muliitsa khuraanga khuvoola, ‘Khwalia nu khung'wa nivi, khandi nu wechitsa mu mataala keru!’ 27Navutswa mwene inzu aliitsa khuvoola, ‘Shinyala khumanya wamuruli tawe. Munyi vandu vooni voosi, ruli hanu!’ 28Muliitsa khulilila havundu henaho, numwikhula, lwa muliitsa khulola Aburahamu, Isaka nende Yakobo nende vaprofeti voosi nivali mu Vwami vwa Nyasaye; navutswa munyi numusiuvilwi ilwanyi. 29Vandu valiitsa khwitsa khurula mu tsimbeka tsili ivukwi nende imbo, ivuluka nende ikuvanda mavikhale khulia mu mulukha kwi lilia mu Vwami vwa Nyasaye. 30Yavo vali vukhumalilikha nunundi valiitsa khuva vu khuraanga, khandi yavo vali imbeli nunundi valiitsa khuva vukhumalilikha.”

Yesu Yayaanza Yerusalemi

(Mat 23:37-39)

31Mumatukhu kenako, Vafarisayo valala vitsa, nivavoolela Yesu, “Rula hanu utsi havundu handi, shichila Herode yenyanga khukhwiira.”

32Yesu yavavoolela, “Simushi mutsi muvoolele shivwe yeshio: ‘Lola, khunganga matimoni khandi mbonyinyanga vandu valwala nunundi khandi mukamba; khandi khulitukhu lia khavaka nava nimali muhinzilu kwanje.’ 33Khulwa yako, khutukha nzi khu luchendo lwanje nunundi, mukamba khandi khulitukhu lilondakhu; shichila shiuvuli vulahi muprofeti khwiirilwa ihale wene khurula Yerusalemi tawe.

34“Yivi litaala likali lia Yerusalemi, Yivi litaala likali lia Yerusalemi! Wiiranga vaprofeti, ulesa na machina yavo varumwa va Nyasaye akhurumilanga! Hali khanga ninjelitsanga khuvunjelitsa halala vandu vovo voosi, khuli ingokho ivunjelitsanga viminyoli viayo mu tsimbaha tsiayo; navutswa wayambakhana! 35Lolakhu! Litempeli liolio lialekhwa shikhaya. Khuvoolelanga ndi uliitsa khuvula khundolakhu matukhu nikashili khutukha lwa uliitsa khuvoola, ‘Nyasaye akasitse woyo witsanga khuvirila mu lira liu Mwami!’ ”

Currently Selected:

LUKA 13: LLLCATHOLIC

Highlight

Copy