LUKA 12

Lichelihitswa khu Khwikhola khola Khuva Valunji

(Mat 10:26-27)

1Lwa vandu vanyishi mu tsihelefu vali nivakani halala, nivaraanga khuseenana vene khuvene, Yesu yavoolela veechi veve lukhuraanga, “Muve vacheli khu mamela ka Vafarisayo, nakhwo khuvoola khwikholakhola khwavo khukhuva valunji. 2Shindu shiosi shia khunikhwa shilitsa khukhunulwa; khandi shiosi shiaviswa shiliitsa khumanyikhana havulavu. 3Khulwa yako, shindu shiosi shia mwavoolela mu shisuundi shilitsa khuhulilikhana mbasu nukhwakhanga. Shindu shiosi shia mwamoonya muvwivisi munzu yikalwa, shilitsa khulaanjilitswa khurulila mu visechese vi tsinzu.

Wenyekhanga Khuheelwa Luyali

(Mat 10:28-31)

4“Valina vaanje, muvoolelanga, muvuli khuria vandu viiranga mmbili, navutswa nivamali kenako, shivali ni shindu shiosi shitamanu shia vanyala khukhola tawe. 5Navutswa namumanyinya wamuha luyali: muhe Nyasaye luyali, shichila namali khwiira, ali nu vunyali vu khusiuva mu shihatisi. Muvoolelanga kilikali ndi neye wamuha luyali! 6Mushili khumanyakhu ndi manyonyi ki viyundi karanu kakuulitswangwa tsisendi tsivili? Khali Nyasaye shianyala khwivilila linyonyi lilala khuko tawe. 7Khali liswi liosi lili khu mirwi chienyu liavaalitswa. Muvuli khuria; muli nu vukuuli vululu muno khuvira viyundi vinyishi.

Khwiyema nende Khwambakhana Kristo

(Mat 10:32-33; 12:32; 10:19-20)

8“Muvoolelanga ndi mundu uvoolanga havulavu imbeli wa vandu nu wanje, Mwana wu Mundu aliitsa khukhola malala mele khuye imbeli wi tsinjelosi tsia Nyasaye. 9Navutswa mundu unzambakhananga imbeli wa vandu, Mwana wa Mundu aliitsa khumwambakhana imbeli wi tsinjelosi tsia Nyasaye.

10“Mundu unyekanga Mwana wu Mundu, aliitsa khusemehwa; navutswa mundu unyekanga Roho Mutakatifu, aliitsa khuvula khusemehwa.

11“Lwa vamuleranga imbeli wa masinagogi inoho khu vagavana inoho vamihi, muvuli khuheenda mwoyo khuli lwa mwishinga vene inoho shiamuvoola; 12shichila Roho Mutakatifu aliitsa khumwechitsa isaa yeneyo shia mwenyekhanga muvoole.”

Lukanu lu Mundu Muhinda

13Mulala mu shituma shia vandu yavoolela Yesu, “Mwechitsi, voolela amwavo wanje angavulilikhu miandu chia tata weru yakhuleshela inzi naye.”

14Navutswa Yesu yamuchipa, “Mulina wanje, ni viina wamba vunyali vu khuva mukhalachi inoho khukavulila munyi vavili miandu?” 15Nalwo lwa yavavoolela, “Muheenze vulahi; khandi muve vacheli shichila vung'wang'wa lukanu lwosi; shichila vulamu vwatoto vu mundu shikali vuliho shichila vunyishi vwi miandu chiechie tawe.”

16Khulwa yako, Yesu yavavoolela lukanu yulu: “Litukhu lindi, khwaliho nu mundu muhinda wali nu mulimi munuulu kwamanga viraakwa vilahi. 17Yaraanga khukanakana mwene, ‘Ni shina shianyala khukhola, lwa mbula havundu hanganjila viraakwa vianje.’ 18Yavoola, ‘Manyi vulahi shia nzitsanga khukhola! Nasambula viachi vianje, khandi nzumbashe vikali. Namwo mwanganjila imu yanje nende vindu viosi viandi navio; 19nu khwivoolela mwene, uli ni vindu vinyishi vinyala khuvukula mihika minyishi. Vulamu vulava vulahi; nang'wa ninzikhoya.’ 20Navutswa Nyasaye yamuvoolela, ‘Musilo yivi! Lelo vutukhu ulakhutsa. Ni viina uliitsa khunyola vindu viosi via wivishila mwene?’ ”

21Yesu yamalila navoola, “Nindi katsitsanga khwikholekha khu mundu wivishilanga mwene miandu, navutswa shiali muhinda imbeli wa Nyasaye tawe.”

Suuvili mu Nyasaye

(Mat 6:25-34)

22Nalwo lwa Yesu yavoolela veechi veve, “Muvoolelanga ndi muvuli khuheendakhu mwoyo mu limenya lienyu, khulondokhana khu shiukhulia shiamulia inoho tsinguvu tsia mwifwala. 23Vulamu vuli nu vukhonyi muno khuvira shiukhulia; khandi mmbili kuli nu vukhonyi muno khuvira tsinguvu. 24Lolikhu makhokho: shikaraakanga vukuutsa inoho khuchesa; kavula inzu yu khuvikhamu vindu inoho viachi; nikhali, Nyasaye akalindanga vulahi. Mutushili khunyola mu vunyishi khuvira manyonyi. 25Ni viina khu munyi wi liheenda mwoyo lielie linyala khumulomba amenye khuluhono? 26Niiva shiumunyala khukhola khali shindu shitititi khuli shienesho tawe, shichila shina muheendelanga vindu vindi mwoyo? 27Lolikhu khuli mawua kumbulimu kameelanga: shikahinzilanga inoho khwifwala tsinguvu tawe. Navutswa muvoolelanga ndi khali Mwami Solomoni ni miandu chiechie chiosi shiyalikhu ni tsinguvu tsindahi muno khuli lilala khu mawua yaka tawe. 28Munyi vandu vamuli ni lisuuvila litititi! Navutswa niiva Nyasaye afwalanga vunyasi vuli hanu mushikuri lwenulu khandi mukamba vusiuvwa mu mulilu, aliitsa khumufwala khuvirana muno. 29Muvuli khukanakanakhu mu mioyo khulondokhana khu shindu shiamulia inoho shiamung'wa, inoho khuheenda mwoyo khulondokhana khu kenako. 30Vandu vi tsimbia tsiosi mu shivala shinu vaheendelanga vindu vienevo mwoyo khumatukhu koosi. Navutswa Tata wenyu wamanya ndi mwenyanga vindu vienevo. 31Nikhali, muheendele mwoyo Vwami vwevwe, khu amuhe vindu vienevo viosi.

Miandu chiu Mwikulu

(Mat 6:19-21)

32“Munyi vamuli khuli shiayo shitititi shia makondi, muvuli khuria; shichila Tata wenyu ayaanzitswangwa khumuha Vwami. 33Mukuulitsi vindu via muli navio viosi, muhe vandu vamanani tsisenti tsienetso. Mwinyolele vene visiko vi tsisenti vikhanyala khurandukha tawe; khandi mwivishili livishilu likhavwetsanga mwikulu, wa shihuuvi shiakhanyala khutukhaho, khandi tsinguyi tsivuli khwononyinya. 34Mwoyo kwenyu kuliitsa khuvetsanga shia khase khosi wa miandu chienyu chili.

Varumishi Vacheliha

35“Muve vandu virechekha khukhola shia shindu shiosi, numwifwala khukhola muhinzilu ni tsitaaha tsienyu nitsiakhanga, 36khuli varumishi valindanga muruchi wavo khurula mu shiselelo shiu khuhilana; khu vamwikulili muliango vwangu, lwa yitsa khwikulitsa khu muliango. 37Vali ni ikhaavi varumishi vu muruchi wavo anyola ni vateminyanga khandi nivirechekha lwava nakalukhanga! Muvoolelanga ndi aliitsa khunavula likoti lielie, avavoolele vikhale hasi; khandi avahe shiukhulia shia valia. 38Niiva aliitsa khwitsa hakari mu vutukhu inoho tsisaa tisa tsiu vutukhu khandi, avanyole nivirechekha vario, varumishi venavo vali ni ikhaavi! 39Navutswa khutukha mumanye ndi niiva mwene inzu, aliitsa khuva namanyi isaa yi shihuuvi shitsanga, shiyakhaleshi inzu yeye khwinjililwa tawe. 40Munyi khandi, mwirecheshe; shichila Mwana wu Mundu aliitsa khwitsa isaa ya mwakorwa khumanya yitsanga.”

Murumishi Musuuvilwa inoho Ukhali Musuuvilwa

(Mat 24:45-51)

41Petro yareeva, “Mwami, lukanu yulu luli khu khutsi vonyene inoho khali khu vandi voosi?”

42Mwami Yesu yachipa, “Ni viina uli murumishi musuuvilwa khandi uli nu vusitsa? Nu murumishi wu muruchi wewe aha vunyali vu khusinjilila vandu vi inzu yeye khandi ahe varumishi vandi shiukhulia shiavo khu isaa yenyekhanga. 43Ali ni ikhaavi murumishi wu muruchi wewe aliitsa khukalukha anyole nakholanga ndio. 44Muvoolelanga katoto ndi muruchi mwenoyo aliitsa khumuha vunyali vu khusinjilila miandu chiechie chiosi. 45Navutswa niiva murumishi mwenoyo aliitsa khwivoolela mwene, ‘Muruchi wanje ucheleve khukalukha,’ araanje khurumula varumishi vasatsa nende vakhali khandi khulia nu khutanda, 46khu muruchi wu murumishi mwenoyo aliitsa khukalukha khulitukhu liu murumishi yakorwa nende isaa ya yakorwa. Muruchi mwenoyo aliitsa khumureema mu vitonye nu khumukhola khusanga halala na vandu vavula vusuuvilwa mu vutiinyu vwavo.

47“Murumishi wamanya ku muruchi wewe yenyanga akhole, navutswa yambakhananga khukhola, aliitsa khushutwa shivoko shilulu muno. 48Navutswa murumishi wakorwa ka muruchi wewe yenyanga, nikhali akholanga shindu shinyala khumukhola asalilitswi, shialiitsa khushutwa vululu tawe. Vinyishi vienyekhanga khurula khu mundu waheelwa mu vunyishi; vinyishi khuvira shichelo vienyekhanga khurula khu mundu waheelwa vinyishi khuvira shichelo.

Milembe Tawe, Navutswa Liavukhana

(Mat 10:34-36)

49“Namala khwitsa khuhaambitsa mulilu khulilova; khali nzikombanga kuve nukwakha khale! 50Ndi ni libatiswa liambirilamu; khandi nyakhananga mu mwoyo kwanje, lwa shili khurweshitsa kenako! 51Mukanakananga namala khwitsa khulera milembe mu shivala? Shikali ni milembe tawe, navutswa liavukhana; 52khuraanjila nunundi shia inzu ya vandu varanu iliitsa khwavukhanamu, vavaka khu vavili khandi vavili khu vavaka. 53Vatata valiitsa khwavukhana na vaana vavo; khandi vaana vi shikhana na vamama vavo, vakukhu va vayayi nende va nakukhulu va vakhana, va nakukhulu vayayi nende vakukhu vavo.”

Khumanya Inyinga

(Mat 16:2-3)

54Yesu yavoolela khandi shituma shia vandu, “Lwa mulolanga malesi nikarula imbo, muvoolanga vwangu, ‘Imbula yenyanga khukhuva’, makava kario. 55Lwa mulolanga imbuutsa nihuutsa khurula ikuvanda, muvoolanga, ‘Khuliitsa khuva nuluya lunyishi’, makava kario. 56Munyi vamwikhola kholanga khuva valunji! Munyala khuheenza khulilova nende malesi numuvoola khuli shivala shitsitsanga khuva. Shichila shina mwakorwa khwivaala shia matukhu kanu kavoolanga?

Uhuchilitsane nu Mutsiku Wenyu

(Mat 5:25-26)

57“Shichila shina mwambakhananga khwikhalachila vene khukhola ku vulunji? 58Lwa muliitsa khuva nu mutsitsanga nu mutsiku wenyu khu mukhalachi, chelitsi khuli munyala khuhulishitsana naye lwa muli khunjila, nashili khukhuhila khu mukhalachi ma mukhalachi akhuhile khu musikali unyala khukhuvoha mucheela. 59Muvoolelanga ndi shiumunyala khulakhulwakhu numushili khurunga tsisenti tsiosi tsi shivaso tawe.”

Currently Selected:

LUKA 12: LLLCATHOLIC

Highlight

Copy