VIKHOLWA 6

Vandu Saba Varovolwa Khukhonya Varumwa

1Mumatukhu kenako, lwa veechi vameetekhanga mu vunyishi, valala khu Vayahudi valomolomanga Luguriki varaanga khulembana na Vayahudi valomolomanga Luheburania, shichila vakhutsakhali va Vayahudi valomolomanga Luguriki shivaheelwa shiukhulia shia vaheelwangwa khu shia litukhu tawe. 2Khulwa yako, varumwa likhomi na vavili venavo valaanga halala shituma shia vasuuvili voosi; nivavoola, “Nu vutamanu khu khutsi khulekha muhinzilu ku khwilwatsa likhuva lia Nyasaye, khutsia khukavula shiukhulia khu vandu. 3Khulwa yako, vasuuvili vashieru, murovole khurula mu munyi vene vandu vasatsa saba vali ni lira lilahi, vitsula Roho Mutakatifu khandi vali nu vusitsa, va khutsitsanga khuha vunyali vu khukhola muhinzilu yuku. 4Khutsi vene, khuliitsa khuvukula vwiyangu vweru khusaala nu khukhola muhinzilu ku khwilwatsa likhuva.”

5Makhuva ka vavoola kayaanzitsa shituma shia vandu voosi. Varovola Stefano, mundu wali niyitsula lisuuvila, khandi wali niyitsula Roho Mutakatifu. Varovola khandi Filipu, Purokora, Nikanori, Timona, Parumenasi, nende Nikolasi wi litaala lia Antiokia, wali niyakholwa khulonda idini ya Vayahudi. 6Shituma shia vandu vavahila khu varumwa. Varumwa vasaala nivavikha khuvo makhono kavo.

7Likhuva lia Nyasaye liatsililila khulanda shia havundu hosi. Veechi vameetekha mu vunyishi mu Yerusalemi; khali vasalisi vanyishi nivahuchilila lisuuvila.

Stefano Yakumilwa

8Nyasaye yali walolela tsimbavasi Stefano; khandi yali wamuha tsingulu tsinyishi tsiu khukhola viloleshitsu vinyishi nende vindu viu khuchenyinya mu vandu. 9Navutswa valala khu vandu vi lisinagogi lia Vandu Vavoholole (khuli valaangwangwa) vahinganyinya Stefano. Valala khu vandu venavo vali Vayahudi khurula mu mataala ka Kurene nende Alekisandaria, khandi yavo varulanga mu tsisomo tsia Kilikia nende Asia. Vandu venavo varaanga khuhangalitsa Stefano mulilomoloma. 10Navutswa vakhaywa khukuura Stefano; shichila Stefano yali nu vusitsa khandi Roho ya mwimililanga mulilomoloma. 11Khulwa yako, vahaana asoya khu vandu valala vavoole, “Khumuhulile nalomolomanga manyeko khulondokhana khu Musa khandi khu Nyasaye!” 12Vavwanyinya mulilu mu vandu nende vasakhulu, halala na veechitsi va Malako. Vakumila Stefano nivamuhila imbeli wi Shikhaalo. 13Valeramu vashiahidi vu vuvehi nivavoola, “Shia khase khosi mundu uyu wamenya nalomolomanga manyeko khulondokhana khu Litempeli lieru litakatifu khandi khu Malako ka Musa. 14Khumuhulile navoolanga ndi Yesu wa Nazareti uyu, aliitsa khupomolanyinya Litempeli nu khukalukhanyinya miima chia khwechitswa khurula khu Musa.” 15Vandu vi Shikhqalo voosi varaangalala tsimoni tsiavo khu Stefano, nivalola yang'ang'anga mumoni mwemwe khuli injelosi.

Currently Selected:

VIKHOLWA 6: LLLCATHOLIC

Highlight

Copy