VIKHOLWA 5

Anania nende Safira

1Navutswa mundu mulala walaangwangwa Anania nende mukhali wewe Safira, vakuulitsa khandi mulimi kwavo. 2Mwene yahulishitsana nu mukhali wewe khuvisa tsisenti tsindala khu tsia vali nivanyoli. Yavukula tsisenti tsiali nitsirikale naha varumwa. 3Navutswa Petro yamuvoolela, “Anania, shichila shina nuhuchilila Shetani khukhwimilila khukaata Roho Mutakatifu, lwa wavisa tsisenti tsindala, tsia wali nunyoli nu wakhakuulitsa mulimi? 4Lwa wali nushili khukuulitsa mulimi kwenoko, ni kilikali, kwali nu kushili kwokwo. Navutswa lwa wakuulitsa, tsisenti tsiali tsiotsio tsiu khurumishila khuli wenyi. Shichila shina nukhola shindu khuli shienesho? Shikali ukaati vandu tawe, navutswa Nyasaye!” 5Lwa Anania yahulila makhuva kenako, yakwa hasi nakhutsa. Shia mundu wosi wahulila makhuva kikholekha yaria. 6Vasatsa vavukha vatukhaho, nivalinga mmbili kwekwe, nivakuhila ilwanyi, khutsia khukuyeveela mu shilindwa.

7Himbi tsisaa tsivaka nitsiakhavira, mukhali wewe yinjilamu, vuchila khumanyakhu shindu shiosi khu kali nikakholeshe. 8Petro yamureeva, “Mbolela niiva yitsi natsio tsisenti tsiosi tsia yivi nende Anania mwanyola, lwa mukuulitsa mulimi kwenyu?” Yamuvoolela, “Natsio tsiosi tsia khwanyola.”

9Navutswa Petro yavoolela Safira, “Shichila shina nuhulishitsana nu musatsa wowo khuchelitsa Roho wu Mwami Nyasaye? Lola! Vandu vasimukha nivatsia khuyeveela mu shilindwa mmbili ku musatsa wowo, vali ha muliango nunundi. Valavukula mmbili kwokwo khukuhila khandi ilwanyi!” 10Safira yakwa vwangu hasi ha vilenje via Petro, nakhutsa. Lwa vayayi vavukha vinjilamu, vanyola namali khukhutsa khale. Varulitsa mmbili kwekwe, nivakuyeveela mu shilindwa himbi ha shilindwa shiu musatsa wewe. 11Vandu vi likanisa liosi nende vandi voosi vatechela, lwa vahulila makhuva khulondokhana khu vindu viali nivikholeshe vienevo.

Varumwa Vachila Vandu Vanyishi Nivahona

12Varumwa vakhola viloleshitsu nende vindu vinyishi viu khuchenyinya mu vandu. Vasuuvili voosi vakanila halala mu Lusimbu lwa Solomoni. 13Mundu avulakhuho khuvo wachelitsa khwiyunga navo, navutswa vandu vali nivavaha luyali. 14Navutswa vandu vasatsa nende vakhali vanyishi vasuuvila mu Mwami, vameetekha mu vunyishi khu shituma shiavo. 15Khurulana khu ka varumwa vakholanga, vandu valwala valerwa mu tsinjila tsi litaala, nivalishitswi khu vitali nende viseelo, khu nikanyalikha shinini shia Petro shivirili khu valala khuvo lwa ava nachendanga naviraho. 16Vandu vanyishi valiho khandi khurula mu mataala kali himbi Yerusalemi, nivalera vandu valwala nende va matimoni kanyashitsanga; ma voosi nivahonyinywa.

Varumwa Vatambitswa

17Navutswa Mukali wa vasalisi voosi, na veshie va yali navo, nu kuli mukaanda kwa Vasadukayo valolela varumwa imbotokha. 18Vakumila varumwa nivavavoha mucheela ya vandu voosi. 19Navutswa mu vutukhu vwenovo, injelosi yu Mwami Nyasaye yalaminya miliango chiu mucheela, nivarulitswa ilwanyi; nivoola, 20“Simushi mutsi khusinjila mu Litempeli muvoolele vandu makhuva khulondokhana khu vulamu yuvu.” 21Lwa varumwa vahulila makhuva kenako, vinjila mu Litempeli nu kushili mu mavwevwe nivaraanga khwechitsa.

Isaa yeneyo, Mukali wa vasalisi voosi na veshie va yali nali navo valaanga Shikhaalo nende mukaanda kwosi kwa vasakhulu Vayahudi. Varumana likhuva varumwa valerwi khuvo khurula mucheela. 22Navutswa, lwa vandu venavo vatukha mucheela, vanyola varumwa nivarulimu. Navutswa vakalukha khu shikhaalo, nivavavoolela, 23“Lwa khwatukha hacheela, khuchinyoli niyikalwi vutinyu, khandi valindi nivasinjile ha miliango; navutswa lwa khwikula miliango, mundu avulakhuho wa khunyola mukari mwenomo.” 24Lwa vasalisi vakali nende mwimilili wa valindi vi litempeli vahulila ndio, vali ni lichenya linyishi, nivavula khumanyakhu shindu shiosi khulondokhana khu varumwa. 25Khulwa yako, mundu wundi yinjilamu navavoolela, “Hulishitsi! Vandu va mwavoha mucheela vali mu Litempeli, veechitsanga vandu!” 26Nalwo lwa mwimilili wa valindi mwenoyo halala na vandu veve vasimukha nivatsia khulera varumwa, vuchila khurumishila tsingulu; shichila varia vandu vanyala khuvalesa na machina.

27Lwa valera varumwa, va vasinjilitsa imbeli wi Shikhaalo. Mukali wa vasalisi voosi yavareeva mareevo. 28Yavoola, “Khwamukaya nu vululu khuvula khwechitsa khuvirila khu lira liu mundu uyu; navutswa lolikhu kamukholi! Mulanditsi mechitso kenyu shia havundu hosi mu Yerusalemi; khandi muli ninganakani yu khwenya vandu vakhuvukule khuva nu khutsi khwachila mundu uyu niyiirwa.”

29Petro nende varumwa vandi vachipa, “Khutukha khulonde malako ka Nyasaye khuvira khulonda vandu. 30Nyasaye wa vakuuka veru neye wisimushitsa Yesu khurula mu likhutsa, wa mwiira lwa mwamuvamba khu musalaba. 31Nyasaye yamuchinguula namwikhalitsa khuluveka lu mukhono kwekwe musatsa, khumukhola khuva Mwimilili khandi Muhonyinyi, khukhola Vaisraeli khwikanila nu khusemehwa khurula mu vwoni. 32Khuli vashiahidi vi vindu vienevo, khali Roho Mutakatifu, wa Nyasaye yahaana khu yavo valondanga malako keke nu mushiahidi.”

33Lwa vandu vi Shikhaalo shienesho vahulila ndio, vali nu vurima, khali nivenya khwiira varumwa. 34Navutswa mulala khu vandu vi Shikhaalo shienesho, wali Mufarisayo walaangwangwa Gamalieli, wali mwechitsi wa Malako, khandi wa vandu voosi vaheetsanga luyali, yasinjila mu Shikhaalo. Yahaana lilako varumwa vahilwi ilwanyi hatititi. 35Gamalieli yavavoolela, “Vaisraeli vashianje, muve vacheli khulondokhana khu ka mwenyanga khukhola vandu yava. 36Mumatukhu kavira, khwali nu mundu mulala walaangwangwa Tsehudasi, wali niyikhola khuva mundu wi tsingulu; khandi himbi vandu tsimia tsine viyunga naye. Navutswa yiirwa, valondi veve voosi nivasalana, khandi mukaanda kwekwe nu kuva kwi shikhaya. 37Matukhu mati nikakhavira, Yudasi wali Mugalilaya yalolekha mumatukhu ki livalitswa lia vandu; khandi vandu vanyishi nivamulonda. Navutswa khali ye mwene yiirwa, ma valondi veve voosi nivasalana shia havundu hosi. 38Khulwa yako, khulondokhana khu kaliho nunundi, nu vulahi khulekhana na vandu yava! Leshi vatsi! Niiva ka venyanga khuloshitsa inoho khukhola karulanga khu vandu, kaliitsa khuvula khurweshitswa. 39Navutswa niiva karulanga khu Nyasaye, shiumunyala khuvikalila tawe. Munyala khunyolekha numukwananga Nyasaye.”

Vandu vi Shikhaalo valonda inganakani ya Gamalieli yali navavoolele. 40Valaangamu varumwa, nivavashuta shivoko nivavakaya vavuli khulomolomakhu khandi khuvirila khu lira lia Yesu. Nivavavoholola. 41Lwa Varumwa varula imbeli wi Shikhaalo, vali nu vuyaanzi, shichila vali vatushili khunyakhana nu khukholelwa tsisoni, shichila lira lia Yesu. 42Varumwa vatsililila khwechitsa nu khwilwatsa Ivanjeli shia litukhu mu Litempeli nende mu tsingo tsia vandu, nivavoolela vandu ndi Yesu ni Masiha.

Currently Selected:

VIKHOLWA 5: LLLCATHOLIC

Highlight

Copy