VIKHOLWA 4

Petro nende Yohana Vahilwa Imbeli wi Shikhaalo

1Lwa Petro nende Yohana vali nivashilomolomanga khu vandu, vasalisi, mwimilili wa valindi vi litempeli nende Vasadukayo vatukhaho. 2Vasinyikha shichila varumwa vavili venavo veechitsanga vandu ndi Yesu wayisimukha khurula mu likhutsa, likhuva lia havulavu ndi vandu vakhutsa khale valiitsa khwisimukha khurula mu likhutsa. 3Khulwa yako, vakumila Petro nende Yohana nivavavikha mucheela khutukha khulitukhu lilondakhu, shichila shivala shiali nishimwami. 4Navutswa vanyishi mu vandu vahulila likhuva vasuuvila; vandu venavo voosi vali vandu tsiheelefu tsiranu.

5Litukhu lilondakhu, vimilili va Vayahudi, vasakhulu nende veechitsi va Malako vakanila halala mu Yerusalemi. 6Vakana nu Mukali wa vasalisi voosi wali nali Anasi, halala na Kayafa, Yohana, Alekisanda, nende vandu vandi khurula mu inzu yu Mukali wa vasalisi voosi. 7Vavoolela varumwa vasinjile imbeli wavo, nivavareeva, “Ni tsingulu tsia viina inoho lira lia viina lia mwarumishila khukhola yaka?”

8Nalwo lwa Petro, wali niyitsule tsingulu tsia Roho Mutakatifu, yavachipa, “Vimilili va vandu nende vasakhulu, 9niiva mukhureevanga mareevo nunundi khulondokhana khu shikholwa shilahi shiakholekha khu mundu walema, khandi khuli yahona, 10khutukha munyi voosi nende Vaisraeli mumanye ndi mundu wusinjile imbeli wenyu uyu, ni kilikali umali khuhona khuvirila mu tsingulu tsi lira lia Yesu Kristo wa Nazareti, wa mwavamba khu musalaba; navutswa Nyasaye yamwisimushitsa khurula mu likhutsa. 11Yesu neye wa Mahandiko Matakatifu kavoolakhu,

‘Lichina lia munyi vumbashi mwambakhana,

liakalukhana niliva nu vukhonyi khuvira kandi koosi.’

12Vuhonyinyi shiuvunyala khunyolekha khu wundi tawe; shichila lira lindi livulakhuho shia havundu hosi khulilova lia Nyasaye yakhuha linyala khuchila khuhonyinywi.”

13Lwa vandu vi Shikhaalo valola ndi Petro nende Yohana vali ni ikholo yu khulomoloma khandi shikali vatsiakhu musukulu tawe, navutswa vali vutswa khuli vandu vandi, vali ni lichenya. Vavamanyishitsa khuva vayiyunga na Yesu. 14Navutswa lwa valola mundu wali nahonyinywi nasinjileho na Petro nende Yohana, vakhaywa shia vanyala khuvoola. 15Nalwo lwa vavavoolela varuli mu Shikhaalo, manivaraanga khwireevana vene; 16nivavoola, “Ni shina shia khunyala khukhola vandu yava? Shia mundu wosi mu Yerusalemi umanyi ndi navo vakholi shiloleshitsu shiu khuchenyinya, khandi shiukhunyala khuhingana tawe. 17Navutswa nu khwenyi makhuva yaka kavuli khutsililila khuvoolwa shia havundu hosi mu vandu, nu vulahi khukaya vandu yava vavuli khuvoolelakhu mundu shindu shiosi khuvirila khu lira lia Yesu.”

18Khulwa yako, va valaangamu nivavakaya vavuli khulomoloma inoho khwechitsa shindu shiosi khuvirila khu lira lia Yesu. 19Navutswa Petro nende Yohana vachipa, “Munyi vene mwikhalachili mulole, niiva nu vulahi imbeli wa Nyasaye khuhulishitsa munyi inoho khuhulishitsa Nyasaye; 20shichila khunyala vutswa khulomoloma khulondokhana khu ka vene khuloli, nu khuhulila; navutswa makhuva kandi tawe.” 21Vandu vi Shikhaalo va vachelihitsa ni vavakhola vavoholole, vuchila khulolakhu shivune shinyala khuchila vasalilitswi, shichila vandu voosi vitsominya Nyasaye khulondokhana khu kali nikakholeshe. 22Mundu wali nahonyinywi khuvirila khu shiloleshitsu shienesho yali ni mihika makhomi kane.

Vasuuvili Vasaala khu Nyasaye Vuchila Khuria

23Lwa Petro nende Yohana vakholwa khuva vavoholole vwangu, vakalukha khu valina vavo nivavavoolela makhuva ka vasalisi vakali nende vasakhulu vali nivavooli. 24Lwa vakahulila, voosi khulala vasaala khu Nyasaye, nivavoola, “Mwami Nyasaye, nivi waloonga likulu nende lilova, inyanza nende vindu viosi vilimu. 25Nivi walomoloma khuvirila mu Roho Mutakatifu, khuvirila mu kuuka weru Daudi, wali murumishi wowo; lwa yavoola,

‘Shichila shina vandu vi tsimbia tsindi nivalola vurima;

shichila shina vandu nivakanakana khukhola vindu vi shikhaya?

26Vami vamihanga khulilova vayirechekha vene,

khandi vamihi vakanila halala,

khuhinganyinya Mwami Nyasaye nende Masiha wewe.’

27“Ni kilikali, khali Herode nende Pilato vakana halala na vandu vi tsimbia tsindi nende Vaisraeli mu litaala likali linu khuhinganyinya Murumishi wowo Mutakatifu Yesu, wa wali nu wavekha makura khuva Masiha. 28Vakana halala khukhola shia shindu shiosi shia yivi mwene wali nu waviritsa khutukha shiliitsa khwikholekha khuvirila mu tsingulu tsiotsio nende lienya liolio. 29Khulwa yako, yivi Mwami Nyasaye, nunundi heenza ulole khuli vasiomanga, khandi ukhuhavine khutsi varumishi vovo, khwilwatsa likhuva liolio vuchila khuria. 30Nyiila mukhono kwokwo khuhonyinya vandu. Khola vindu viu khuchenyinya nende viloleshitsu khuvirila mu lira liu Murumishi wowo Mutakatifu Yesu.”

31Lwa vamala khusaala, havundu ha vali nivakanile halala hatechela. Voosi vitsula tsingulu tsia Roho Mutakatifu, nivaraanga khulomoloma likhuva lia Nyasaye vuchila khuria.

Vasuuvili Vakavana Vindu via Vali Navio

32Shituma shia vasuuvili voosi vali nu mwoyo mulala khandi ninganakani indala. Mundu avulakhuho khuvo wikholela miandu khuli ni chiechie mwene wonyene; navutswa vakavana shilala shia shindu shiosi shia vali nashio. 33Varumwa vahaana vushiahidi ni tsingulu khulondokhana khuli Mwami Yesu yisimushitswa khurula mu likhutsa, khandi Nyasaye navalolela tsimbavasi mu vunyishi. 34Mundu avulakhuho khuvo wacheheelwakhu shindu. Shia mundu wosi yakuulitsanga mulimi kwekwe inoho inzu yeye, malera tsisenti tsia yali nanyoli niyakhakuulitsa, 35khandi aha varumwa. Tsisenti tsienetso tsia kavulwa khu shia mundu wosi khulondokhana khu lienya lielie. 36Litukhu lindi, khwaliho nu mundu walaangwangwa Yosefu, wa varumwa vali nivakulikha lira Baranaba, (nakhwo khuvoola, mundu uli nu vunyali vu khutinyilitsa vandi), warulanga mu vandu vu lwivulu lwa Levi, wali niyivulwa Saipurasi. 37Khali ye mwene yali nu mulimi kwekwe, manakuulitsa. Yavukula tsisenti tsia yali nanyoli, naha varumwa.

Currently Selected:

VIKHOLWA 4: LLLCATHOLIC

Highlight

Copy