VIKHOLWA 3

Petro nende Yohana Vahonyinya Mundu Walema

1Litukhu lindi, Petro nende Yohana vasimukha nivatsia mu Litempeli tsisaa tisa halukolovo, nitsili tsisaa tsiu khusaala. 2Mutsisaa tsienetso, vandu vali nivachinji mundu wali niyivulwa niyalema vamwinjilitsa mu Litempeli lienelo. Vandu vali vamenya nivamuvikhanga ha shilivwa shi Litempeli shilaangwangwa Shilivwa Shiakasa Muno, shia litukhu khusava vukhonyi khurula khu vandu vinjilanga mu Litempeli. 3Lwa mundu mwenoyo yalola Petro nende Yohana nivali himbi khwinjila mu Litempeli, yavasava vukhonyi. 4Petro nende Yohana vamuheenza vulunji; nivamuvoolela, “Khuheenze, ukhulole!” 5Mundu mwenoyo yavaheenza, nakanakananga alanyolakhu shindu khurula khuvo. 6Navutswa Petro yamuvoolela, “Mbulakhu ifetsa inoho itsahabu; navutswa shiandi nashio, nashio shia khuha. Khuvirila mu lira Yesu Kristo wa Nazareti, chenda!” 7Petro yamukumila nu mukhono kwekwe musatsa namusinjilitsa. Lwene yolo, vilenje nende masikamo ku mundu mwenoyo kanyola tsingulu. 8Mundu mwenoyo yasila ikulu, nasinjila naraanga khuchenda. Yinjila navo mu Litempeli, nachendanga khandi narumanga ikulu niyitsominya Nyasaye. 9Vandu voosi vamulola narumanga ikulu khandi niyitsominyanga Nyasaye, 10manivamumanya neye wali musavisavi wikhalanga ha Shilivwa Shiakasa Muno shi Litempeli. Voosi vali ni lichenya manivahuka khulondokhana khu kali nikakholeshe khu mundu mwenoyo.

Petro Yilwatsa khu Vandu mu Litempeli

11Lwa mundu mwenoyo yali nashihandi khu Petro nende Yohana, vandu voosi vali ni lichenya nivilukhaka khutsia havundu halaangwangwa Lusimbu lwa Solomoni. 12Lwa Petro yalola ndio, yavavoolela, “Munyi Vaisraeli vashianje, shichila shina muchenyele yaka, khandi mukhuheenzanga? Munyala khuva mukanakananga nu khuvirila mu tsingulu tsieru vene inoho vutakatifu vweru, navwo vwachila mundu uyu nachenda? 13Nyasaye wa Aburahamu, Isaka nende Yakobo, Nyasaye wa vakuuka veru, umali khuhaana vukhumi khu murumishi wewe Yesu. Navutswa neye wamwahila khu vimilili va Vayahudi, khandi neye wamwambakhana imbeli wa Pilato, khali lwa Pilato yali ninganakani yu khumuvoholola. 14Navutswa mwambakhana mundu mutakatifu, khandi wi likhola liu vulunji numureeva Pilato khumulakhulila mundu wali niyiira vandu. 15Munyi navo vamwiira shirula shiu vulamu, wa Nyasaye yisimushitsa khurula mu likhutsa. Khutsi khuli vashiahidi va makhuva kikholekha. 16Mundu wa mulolanga, khandi wa mwamanya uyu, yakholwa khuva ni tsingulu khuvirila mu lisuuvila mu lira lia Yesu. Lisuuvila liali nalio khuvirila mu lira lia Yesu, nalio liakhola mundu uyu nava mulamu mu vuseletse, khuli lwa mulolanga vene ni tsimoni tsienyu.

17“Munyi vasuuvili vashianje, manyi ndi ka munyi nende vimilili venyu mwakhola Yesu, mwakhola vuchila khumanyakhu shindu shiosi. 18Navutswa nindio Nyasaye yarweshitsa ka yali niyavoola mumatukhu kakhale khuvirila mu vaprofeti veve voosi, ndi Masiha wewe aliitsa khunyakhana. 19Khulwa yako, mwikanile khandi mukalushi khu Nyasaye, khu musemehwi khurula mu vwoni vwenyu. Niiva muliitsa khukhola ndio, 20Nyasaye aliitsa khumukhola muve nu vuyaanzi mumatukhu ka mwene yaviritsa, khandi aliitsa khumurumila Yesu, uli Masiha, wa yali niyarovola khale. 21Aliitsa khutsililila khumenya mwikulu, khutukha lwa litukhu liliitsa khutukha lwa shia shindu shiosi shilitsa khukholwa khuva shiyia, khuli Nyasaye yali niyavoola khuvirila mu vaprofeti veve vatakatifu vamenyanga mumatukhu kakhale. 22Musa yavoola, ‘Mwami Nyasaye, uli Nyasaye wenyu aliitsa khumurovolela muprofeti khuli inzi khurula mu munyi vene. Shia shindu shiosi shialiitsa khumuvoolela, nashio shia muliitsa khuhulishitsa. 23Shia mundu wosi uliitsa khwambakhana khuhulishitsa makhuva ku muprofeti mwenoyo navoole, aliitsa khukhungwa khurula mu vandu va Nyasaye.’ 24Vaprofeti voosi vanyola likhuva, khuraanjila khu Samweli khandi yavo valolekha inyuma wewe, vavoola khandi makhuva khulondokhana khu ka khulolanga nunundi. 25Malako ka Nyasaye yahaana khuvirila mu vaprofeti veve ni kenyu; khandi musanganga mu lilakano lia Nyasaye yakhola na vakuuka venyu. Khuli yavoolela Aburahamu, ‘Niitsa khukasitsa vandu voosi khulilova khuvirila mu vitsukhulu vovo.’ 26Khulwa yako, Nyasaye yarovola murumishi wewe, namuruma lukhuraanga khu munyi, khwitsa khumukasitsa; lwa yakhola shia mulala khu munyi, khwikanila khurula mu vwoni vwevwe.”

Currently Selected:

VIKHOLWA 3: LLLCATHOLIC

Highlight

Copy