VIKHOLWA 10

Petro Yacheniha Koronelia

1Khwali nu mundu mu litaala lia Kaisaria walaangwangwa Koronelia, wali mwimilili wu mukaanda kwa vasikali imia indala kwa Varoma, kwalaangwangwa “Mukaanda kwa Vataliani.” 2Koronelia yali mundu mulahi. Ye mwene nende vandu vi inzu yeye voosi vaheetsanga Nyasaye luyali. Yachelitsa khandi khukhonya Vayahudi vamanani. Yali wamenya nasaalanga khandi shia khase khosi khu Nyasaye. 3Himbi tsisaa tisa tsiu mbasu, Koronelia yalola mu malolo injelosi ya Nyasaye. Injelosi yeneyo yinjila havundu ha yali nali nimulaanga, “Koronelia!” 4Koronelia yaheenza injelosi naria. Yareeva, “Mwami, ni shina?”

Injelosi yamuchipa, “Nyasaye uyaanzitswi ni lisaala liolio nende vikholwa viovio viu khukhonya vamanani, khandi wirecheshe khukhuchipa. 5Ruma nunundi vandu khutsia mu litaala lia Yopa, khulaanga mundu ulaangwangwa Simoni Petro. 6Amenyanga mu inzu yu mulombi wa maseelo ulaangwangwa Simoni, uli na hango hehe himbi khu inyanza.” 7Lwa injelosi yali nilomolome khuye yarulaho. Koronelia yalaanga varumishi vavili khu varumishi veve nende musikali, wali niyasuuvila mu idini khurula mu vasikali vamulindanga. 8Koronelia yavavoolela kali nikakholeshe, navaruma khutsia mu litaala lia Yopa.

9Litukhu lialondakhu, lwa vali nivali khu luchendo lwavo, nivali himbi khutukha mu litaala lia Yopa, Petro yanina khu shisechese shi inzu himbi tsisaa sita tsiu mbasu khutsia khusaala. 10Petro yahulila inzala nimulumanga, niyenya shiukhulia shialia; navutswa lwa vali nivashiteekhanga shiukhulia, yalola malolo 11nalola likulu nilikushi; khandi shindu nishikhanga hasi khuli luvaala lukali nu lwishitswangwa khulilova mu tsikona tsialwo tsine. 12Khwalimu ni tsinyama tsiosi lukanu, vilombe vimolanga hasi, nende manyonyi. 13Mwoyo kwamuvoolela, “Petro, vukha; sinza nulia!”

14Navutswa Petro yavoola, “Mwami, ni kilikali, shinyala khukhola kenako tawe! Shili khuliakhu shindu shiosi shioneshe inoho shiononyinywa.”

15Mwoyo kwalomoloma khuye lwa khavili, nu kuvoola, “Shia Nyasaye amali khutakasa, uvuli khukanakana ndi shioneshe.” 16Yaka kikholekha hali khavaka; ma luvaala lwenolo nu lukalushitswa vwangu mwikulu.

17Lwa Petro yali nashichenyanga khulondokhana khu ka malolo kenako kavoolanga, vandu va Koronelia yali narumi vatukha havundu ha inzu ya Simoni yali nili; nivasinjila ha shilivwa. 18Valaanga nivareeva, “Khulikhu nu mucheni hanu ulaangwangwa Simoni Petro?”

19Lwa Petro yali nashikanakananga makhuva khulondokhana khu malolo kenako, Roho yamuvoolela, “Simoni, vandu vavaka vali hanu vakhukhavanga. 20Sinjila ukholomoshe hasi; uvalonde vwangu vuchila khuhaya haya, shichila inzi varumi.” 21Petro yakholomokha hasi, navavoolela, “Ninzi mundu wamukhavanga. Shichila shina numwitsa?”

22Vamuchipa, “Mwimilili wa vasikali imia indala imia indala va Varoma, nali Koronelia, ukhurumi. Nu mundu mulahi usaalanga khu Nyasaye; khandi Vayahudi voosi vamuha luyali. Injelosi ya Nyasaye yamuvoolela akhwinjilitsi munzu mwemwe, khu ahulili makhuva ka uvoola.” 23Khulwa yako, Petro yavinjilitsa munzu mwenomo navavoolela vakonemu.

Litukhu lialondakhu, yirechekha nasimukha natsia navo; vasimukha nivatsia khandi na vasuuvili vi litaala lia Yopa. 24Litukhu lialondakhu, vatukha mu litaala lia Kaisaria. Koronelia yali navalindililanga khandi yali ulaanji viikho veve nende valina veve vahimbi. 25Lwa Petro yali nali himbi khwinjila munzu, Koronelia yamwakanila, nasikama imbeli wewe khandi namwinamila. 26Navutswa Petro yamukumila mukhono; namuvoolela, “Sinjila; inzi nu mundu vutswa.” 27Petro yatsililila khulomoloma khu Koronelia, lwa yali niyinjilanga munzu, wa yanyola vandu vanyishi nivakanile halala. 28Petro yavavoolela, “Munyi vene mwamanya ndi khulondokhana na malako keru nu vutamanu Muyahudi khuhaambana nu mundu urulanga mu vandu vi tsimbia tsindi inoho khumucheniha. Navutswa Nyasaye umali khumanyinya mbuli khuvukulakhu mundu wosi khuva woneshe inoho wayononyinywa. 29Lwa warumana wenyanga khulola inzi, niitsa vuchila khwambakhana. Khureevanga, umbolele shivune shiachila nurumana wenyanga khulola inzi?”

30Koronelia yachipa, “Matukhu kane kaviri yako, himbi isaa khuli yinu, nali nisaalanga mu inzu yanje tsisaa tisa tsia halukolovo. Nonoho lwa mundu niyifwali tsinguvu tsindavu tsiang'ang'anga, yasinjila imbeli wanje 31nalaanga, ‘Koronelia! Nyasaye umali khuhulila lisaala liolio khandi witsushitse vihanwa viovio viu khukhonya vamanani. 32Ruma mundu atsi mu litaala lia Yopa khulaanga mundu ulaangwangwa Simoni Petro. Nu mucheni mu inzu yu mulombi wa maseelo ulaangwangwa Simoni, uli na hango hehe himbi khu inyanza.’ 33Khulwa yako, narumana witsi vwangu; khandi ukholi vulahi khwitsa. Khuli hanu voosi nunundi imbeli wa Nyasaye, ninindililanga khuhulishitsakhu shindu shiosi shiu Mwami akhuvoolele uvoole.”

Lilomoloma lia Petro

34Nalwo lwa Petro yaraanga khulomoloma navoola, “Ni kilikali, nakhamanya nunundi ndi Nyasaye shianyala khwihonelakhu mundu wosi tawe. 35Shia mundu wosi, ave arulanga mu vandu vuluhia shina, umuheetsanga luyali nu khukhola vikholwa viu vulunji neye wa ahuchililanga. 36Mwamanya likhuva lia yaruma khu Vaisraeli, nilili liu khwilwatsa Ivanjeli ileranga milembe khuvirila mu Yesu Kristo, uli Mwami wamihanga shia shindu shiosi. 37Mwamanyakhu kakholekha shia havundu hosi mu lusomo lwa Yudeya, khuraanjila mu Galilaya, lwa Yohana yilwatsa makhuva khulondokhana khuli ye mwene yabatiswa. 38Mwamanya Yesu wa Nazareti, khandi khuli Nyasaye yamurovola namuha Roho Mutakatifu nende tsingulu. Mwamanyakhu khuli yachenda chenda shia havundu hosi, nakholanga malahi khandi nahonyinyanga vandu voosi vatambitswangwa ni Ibilisi, shichila Nyasaye yali naye. 39Khuli vashiahidi va shia shindu shiosi shia yakhola mu shivala shia Vayahudi nende mu Yerusalemi. Vamwiira lwa vamuvamba khu musalaba. 40Navutswa Nyasaye yamwisimushitsa khurula mu likhutsa khulitukhu lia khavaka, namukhola khulolekha khu vandu; 41shikali vandu voosi vamulolakhu tawe; navutswa yalolwa na khutsi va Nyasaye yali niyarovola khuva vashiahidi; nakhwo khuvoola, khutsi va khwalia nu khung'wa naye ni yakhisimukha khurula mu likhutsa. 42Yesu yakhuha lilako liu khwilwatsa Ivanjeli khu vandu, nu khuhaana vushiahidi khulondokhana khuye ndi neye wa Nyasaye yarovola khuva mukhalachi wa vandu vashili mwoyo nende yavo vakhutsa. 43Vaprofeti voosi valomoloma makhuva khulondokhana khuye, nivavoola ndi mundu uliitsa khusuuvila muye, aliitsa khusemehwa khurula mu vwoni vwevwe khuvirila khu lira lielie.”

Vandu vi Tsimbia Tsindi Vanyola Roho Mutakatifu

44Lwa Petro yali nashilomolomanga makhuva kenako, vandu voosi vamuhulishitsa niyilwatsanga likhuva, vanyola Roho Mutakatifu. 45Vayahudi vasuuvili vali nivitsi halala na Petro khurula mu litaala lia Yopa vali ni lichenya; shichila Nyasaye yahaana khandi shihanwa shieshie shia Roho Mutakatifu khu vandu vi tsimbia tsindi; 46shichila va vahulila nivalomolomanga mu tsinomonomo tsindi, ni vitsominya vukhumi vwa Nyasaye. Petro yalomoloma navoola, 47“Vandu yava vanyoli Roho Mutakatifu, khuli khwanyola khandi. Khuliho nu mundu unyala khuvikalila khubatiswa na matsi?” 48Khulwa yako, Petro yahaana lilako ndi vabatiswi khuvirila mu lira lia Yesu Kristo. Vareeva Petro amenye navo khumatukhu mati.

Currently Selected:

VIKHOLWA 10: LLLCATHOLIC

Highlight

Copy