1 VAKORINZO KUKHURAANJILILA
KUKHURAANJILILA
Ibarwa Yukhuraanga ya Paulu Yahandichila Vakorinzo, yahandikwa khwenya khuchelitsa khulunjishitsa, nu khwikalila vukoyanu vwali nuvuliho, shichila limenya liu Vukristayo khandi shichila lisuuvila, vwali nuvurulili mu likanisa lia Paulu yali niyaraanjitsa mu litaala lia Korinzo. Mumatukhu kenako, Korinzo liali litaala likali mu shivala shia Vaguriki; litaala lienelo liali mu lusomo lwa Akaya, lwa Varoma vamihanga. Nalio liali litaala likali lia Varoma mu lusomo lwa Akaya. Liali liamanyikhana shichila vukhala vwalio vwakholekhanga munjila indahi, khwikhoyela miima chialio; khandi liali liamanyikhana shichila miima mitamanu chi shifwavi chiali chiamenya nichikholekhanga mulio, khandi niliva ni tsidini tsinyishi lukanu na lukanu.
Vindu vichilanga Paulu naheenda mwoyo nu vukoyanu khuli yuvu: liavukhana nende miima mitamanu chi shifwavi chili mu likanisa; mareevo khulondokhana khu liiva liu khukona liu musatsa nu mukhali nende khuhilana, makhuva shichila tsinganakani tsiu mukari, khuli likanisa lienyekhanga khwimililwa, vihanwa virulanga khu Roho Mutakatifu, nende lisimushitswa khurula mu likhutsa. Paulu alomolomanga mu vuraambi munjila yu vucheli khuli Ivanjeli yivaalanga khulondokhana khu mareevo kenako.
Muliango 13, kumanyinyanga khuli vuyaanzi vuli shihanwa shilala shilahi khu vihanwa via Nyasaye aheetsanga vandu veve; haundi, nakwo muliango kwamanyikhana mu vunyishi muno mu shitabu yishi.
Kalimu Muvwimbi
Kukhuraanjilila 1:1-9
Vwavukhani vuli mu Likanisa 1:10—4:21
Mwiima Mulahi ku Musatsa nu Mukhali wewe nende Limenya liu Munzu 5:1—7:40
Vakristayo nende Vandu Vatamanu Vakorwa Nyasaye 8:1—11:1
Liiva li Likanisa khandi Khusaala khu Nyasaye 11:2—14:40
Khwisimukha khwa Kristo Khurula mu Likhutsa khandi khwa Vasuuvili 15:1-58
Shihanwa shiu Khukhonya Vakristayo mu Lusomo lwa Yudeya 16:1-4
Makhuva khu Paulu nende Limalila li Ibarwa Iyi 16:5-24
Currently Selected:
1 VAKORINZO KUKHURAANJILILA: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013